Suchu runata hampirusqan qipakunamanpas Jesusqa hinallam Galilea lamar quchapa patan Capernaum llaqtapi karqa. Payman hinalla runakuna asuykuptinmi Diosmanta yachachiq. Chaymantam autoridadkunapaq qullqi mañaypi llamkaq Mateota llamkayninpi rikururqa, paypa huknin sutinqa Leviymi karqa. Hinaspam payta Jesus nirqa: “Qatiqniyyá kay”, nispa (Mateo 9:9).

Mateoqa llaqtamasin Pedro, Andres, Santiago hinaspa Juan hinachusmi Jesuspa ruwasqankunamanta hinaspa yachachisqankunamantaqa yacharqaña. Chaymi Jesuspa chay tawa qatiqninkuna hina chaylla hatarispan Jesusta qatirqa (Mateo 9:9). Payqa Jesuspa qatiqnin rikuriruspanmi autoridadkunapaq qullqita mañaspan llamkaynintapas saqirurqa.

Chaymantam Mateoqa wasinpi mikuyta ruwachirqa, chaytaqa ichapas Jesuspa qatiqnin kasqanmanta kusikuspan ruwarqa. Chaymanmi Jesusta, qatiqninkunata hinaspa autoridadkunapaq qullqi mañaypi wakin llamkaqkunatapas qayachirqa. Chay qullqi mañaqkunaqa Roma nacionpi kamachiqkunapa churasqanmi karqaku, chaymi paykunaqa buqueyuqkunamanta, hatun ñanninta imayuqkunapas puriqkunamanta hinaspa negocio ruwaqkunamantam qullqita mañaqku. Chayraykum judio runakunaqa kamachiqkunata hinaspa qullqi mañaqkunataqa chiqniqku llumpayta mañasqankurayku. Mateopa wasinpiqa kachkarqakutaqmi mana allin runakunapas (Lucas 7:37-39).

Chayna runakunawan kuska Jesus mikuptinmi allin tukuq fariseo runakunaqa Jesuspa qatiqninkunata nirqaku: “¿Imanasqataq yachachiqnikichikqa mikun impuesto mañaqkunawan hinaspa huchasapakunawan?”, nispa (Mateo 9:11). Chayta uyarispanmi Jesusqa fariseokunata nirqa: “Sano runakunaqa manam necesitanchu doctortaqa, unquqkunam ichaqa necesitanku. Riychikyá, yachamuychik kay willakuypa ima ninan kasqanta: ‘Munaniqa llakipayakuq kanaykichiktam, manam animalkuna ofrecewanaykichiktachu’, niqta. Hamurqaniqa manam allin runakuna qayaqchu, aswanqa huchasapakunata qayaqmi”, nispa (Mateo 9:12, 13; Oseas 6:6). Chay fariseo runakunaqa hawa sunqullam Jesustaqa “yachachikuq” niqku. Chaywanpas Jesusqa hichu-hichu allin yachachiqmi karqa.

Mateoqa qullqi mañaypi llamkaqkunatawan mana allin ruwaqkunataqa, ichapas Jesusta kikinku uyarinankupaq hinaspa Dioswan kuyachikuyta maskanankupaq wasinman qayachirqa. Paykunamantaqa achkam Jesustaqa qatirqaku (Marcos 2:15). Chaymi Jesuspas paykuna yanapayta munarqa. Jesusqa manam fariseo runakuna hinachu chiqniq, aswanqa llakipayariykuqmi. Jesusmanqa doctorman unquqkuna asuykuchkaq hinam asuykuqku.

Qullqi mañaypi llamkaqkunapa hinaspa mana allin ruwaqkunapa huchankutaqa manam allinpaqchu Jesusqa qawaq, chaywanpas unquq runakunamanta hinam anchata paykunamanta llakipayarikuq. Chayraykum lepra unquypa tukusqan runatapas huk kutipi nirqa: “Munanim sanoyanaykita, allinyayñayá”, nispa (Mateo 8:3). Chaynayá ñuqanchikpas kallpanchakusun hukkunata llakipayaspa imapipas yanapaykunapaq, aswanraqmi Diosman asuykunankupaqqa yanapananchik.