Kwaciindi cisyoonto kuzwa leelyo naamana kuponya muntu uulebukide mubili, Jesu wazumanana kukkala mubusena buli mu Kapernauma kumbali aa Lwizi lwa Galilaya. Alimwi makamu-makamu aabantu aboola kulinguwe, eelyo watalika kubayiisya. Lino nayaabweenda, wabona Matayo, ooyo alimwi uutegwa Levi, kakkede aŋanda iitelelwa mitelo. Jesu wamupa coolwe citaliboteli kwiinda mukumutamba kuti: “Koba sikunditobela.”—Matayo 9:9.

Matayo ulangilwa kuti ulizizyi kale nzyayiisya Jesu alimwi amilimo njaali kucita mubusena oobu, mbubonya mbobakazyi ba Petro, Andreya, Jakobo alimwi a Johane. Mbubonya mbuli mbabo, awalo Matayo wazumina kumutobela mpoonya-mpoonya. Matayo ulacipandulula eeci mu Makani Mabotu ngaakalemba, ulaamba: “Mpoonya [Matayo lwakwe] wakanyamuka akumutobela” Jesu. (Matayo 9:9) Aboobo, Matayo wasiya mulimo wakwe wabusimutelo akuba sikwiiya wa Jesu.

Aciindi cimbi, ambweni kutegwa atondezye kulumba akaambo kabwiite oobu bwaalubazu kuzwa kuli Jesu, Matayo wacita pobwe pati muŋanda yakwe. Ino mbaani abambi ibatambwa kunze lya Jesu abasikwiiya bakwe? Kuli basimutelo bali mbobabede mbocakali kubeleka limwi a Matayo. Baalumi aaba mbababwezelela mutelo wabeendelezi ba Roma ibasulaikidwe, kubikkilizya amutelo wamato aasika kucito, mutelo waŋola ankalaki ziinda mumigwagwa mipati alimwi amitelo yazintu zinjila mucisi. Ino bunji bwaba Juda bababona buti basimutelo aaba? Tababayandi amobainda akaambo kakuti bunji bwaziindi basimutelo aaba cabumpelenge babweza mali manji kwiinda yaayo aayandika kutelwa. Kunze lyabaaba, kupobwe kuli ‘abasizibi,’ bantu ibajisi mpuwo yakuti bacita zinyonyoono.—Luka 7:37-39.

Nobamubona Jesu kupobwe antoomwe abantu bali boobu, ba Farisi abalo ibaliko aawo, aabo ibalibona kululama babuzya basikwiiya bakwe kuti: “Ino nkaambo nzi mwiiyi wanu ncalida antoomwe abasimutelo alimwi abasizibi?” (Matayo 9:11) Kamvwide ncobaamba, Jesu wabavwiila kuti: “Bantu bataciswi tabayandiki musilisi, pele aabo baciswa mbabayandika musilisi. Aboobo kamuya mukaiye ncaamba majwi aaya aakuti: ‘Ndiyanda luse kutali cipaizyo.’ Nkaambo ndakaboolela kwiita basizibi ikutali bantu baluleme.” (Matayo 9:12, 13; Hosea 6:6) Ba Farisi baupaika buyo nobaamba Jesu kuti “mwiiyi,” nokuba boobo balakonzya kwiiya cintu cimwi kuzwa kulinguwe kujatikizya cintu ciluzi.

Kulibonya kuti Matayo waita basimutelo abasizibi aaba kuŋanda yakwe kutegwa bamuswiilile Jesu akuponesyegwa munzila yakumuuya ‘nkaambo kuli banji akati kabo ibali kumutobela.’ (Marko 2:15) Jesu uyanda kuti abagwasye kuba acilongwe ciyumu a Leza. Ikwiindana aba Farisi ibalibona kululama, Jesu tabasampauli bantu bali boobu. Wabafwida luzyalo alimwi aluse; ulakonzya kuba musilisi munzila yakumuuya akubasilika boonse aabo baciswa kumuuya.

Jesu wabafwida luse basimutelo abasizibi, ikutali kuti ulazizuminizya zibi zyabo pe, pele wacita oobo akaambo kakuti uyanda kubafwida lubomba mbuli loolo ndwaakabafwida bantu baciswa kumubili. Mucikozyanyo, amuyeeye ciindi naakajata sicinsenda caluzyalo akwaamba kuti: “Ndilayanda! Kosalazyigwa.” (Matayo 8:3) Sena andiswe tatweelede kuba amoyo walubomba uuli boobu akugwasya baabo bapengede, kwaambisya kwiinda mukubagwasya munzila yakumuuya?