Moohipisa, nuumala onvoniha mulopwana oorakala, Yesu aahikhala okathi vakhaani oKafar-nawu waattamela Ephareya ya oGalileya. Nave muttitthi wa atthu waahimurweela, nto Yesu aahipacerya wiixuttiha. Okathi Yesu eetta awe aahinweha Matheyo yoowo-tho iitthaniwa Levi, okilanthe ene opuro aaliviha awe mpoosito. Yesu aahimulattula oriki: “Mukitthareke”.​—Matheyo 9:9.

Woonasa wene, Matheyo, Pedru, Andreya, Yakobo ni Yohani yaanisuwela sowiixuttiha ni miteko sootikiniha Yesu aapanke awe. Moohipisa, Matheyo aahimutthara Yesu. Evangelyo awe, Matheyo ohimmye wira: “Matheyo ahivenya, khumuttharaka Yesu”. (Matheyo 9:9) Tthiri, Matheyo aahihiya muteko awe wooliviha mpoosito onakhala mutthareli a Yesu.

Muhoolo mwaya, woonasa wene ophavelaka oxukhurela nlattulo nle na vameekhaaya, Matheyo aahipaka efesta yuulupale owannyawe. Ohiya paahi Yesu ni awiixutti awe, atthu xeeni-tho akina aalattunle awe? Aahaalattula atthu aavarana awe muteko. Awo yaaniliviha mpoosito waavekeliwa ni makhulupale ooRoma. Mpoosito owo, waahela muhina ole wa ikalawa saarowa elapo ele, ikaaro ni mireerelo saaruuhiwa. Vano aYuda yoonela sai mpoosito owo? AYuda khiyaasiveliwa okhala wira yaanilivihiwa musurukhu munceene. Nave ofestani iwe yaahikhala “anatampi”, yaawo yaasuweliwe okhala atthu yaapaka itthu soohiloka.​—Luka 7:37-39

Vaavo yanweha aya Yesu ori ene vafestani ni atthu awo, aFarisi yaawo yiixoona okhala anaxariya, yaahaakoha awiixutti a Yesu wira: “Vanikhala sai mwixuttihi anyu olyaka n’alipa a mpósito n’anatampi?” (Matheyo 9:11) Osuwelaka muupuwelelo aya, Yesu aahiwaakhula oriki: “Khahiyó atthu akumi amphaveleliwa mukulukhana: aretta t’amphaveleliwa. Murowé mwaixutte enihimyaya molumo ala wira: ‘Miyo onkisivela omoriwa ikharari: mikuttho nkimphavela’. Tthiri miyo nkirwenle owihana atthu òrera murima, masi alipa-òttheka”. (Matheyo 9:12, 13; Hoseya 6:6) AFarisi khiyaalavula ni murima wotheene vaavo yaamuhimya aya Yesu okhala “mwixuttihi”. Masi, hata vaari siiso, awo yaahaana wiixuttihiwa ni Yesu etthu eri yekeekhai.

Matheyo aahaalattula owannyawe alipa-ooliviha mpoosito ni anatampi, wira anwiriyane Yesu ni okhaliheriwa momunepani, “tthiri atthu awo yamutthara Yesu khiyàrere”. (Marko 2:15) Yesu aaphavela waakhaliherya atthu ale okhalana wataana wooloka ni Muluku. Moovirikana ni aFarisi yaawo yiixoona okhala anaxariya, Yesu khaathanya anatampi ale. Aamorelaka ikharari ni owoonela othunku, Yesu aanaakhaliherya ni waavoniha ale yaarina oretta womunepani.

Yesu khaapwapwenle alipa-ooliviha mpoosito ni anatampi, okhala wira aanaamorela ikharari. Nave aaniwoonela othunku atthu yaawereiwa. Mwa ntakiheryo, muupuweleke wira, omoonelaka othunku namakuttula, aahinvara khumuhimeerya wira: “Kinnitthuna: murerihiwe”. (Matheyo 8:3) Yesu oonivaha ntakiheryo nooloka. Nimutakihaka Yesu, nihaana waamorela ikharari atthu ni waakhaliherya momunepani.