Le ka tsʼoʼok u tsʼakik le máak minaʼan u muukʼ u wíinkliloʼ, Jesuseʼ pʼáat wa jaypʼéel kʼiinoʼob tu kaajil Capernaum, naatsʼ tiʼ u kʼáaʼnáabil Galilea. Le máakoʼoboʼ binoʼob u yiloʼob tu kaʼatéen, letiʼ túuneʼ joʼopʼ u kaʼanskoʼob. Le táan u bin Jesús tu jáal le kʼáaʼnáaboʼ tu yilaj Mateo, kʼaj óolaʼan xan Leví, kulukbal teʼ tuʼux ku boʼotaʼal le impuestoʼoboʼ. Jesuseʼ tu yaʼalajtiʼ: «Koʼoten tin paach» (Mateo 9:9).

Maʼ xaaneʼ Mateoeʼ tsʼoʼok u yuʼubik u tsikbalil le baʼaxoʼob ku kaʼansik Jesús yéetel le milagroʼob ku beetkoʼ, jeʼex uʼuyaʼabik tumen Pedro, Andrés, Santiago yéetel Juaneʼ. Mateoeʼ tu séebaʼanil xan bin tu paach Jesús. Mateoeʼ ku yaʼalikeʼ letiʼeʼ «líikʼeʼ ka bin tu paach» (Mateo 9:9). Tu pʼataj le meyaj ku beetkoʼ ka joʼopʼ u tsaypachtik Jesús.

Ka máan kʼiineʼ, maʼ xaaneʼ utiaʼal u yeʼesik Mateo kiʼimak u yóol úuchik u tʼaʼanal tumen Jesuseʼ, tu beetaj junpʼéel kʼiinbesaj tu yotoch. Letiʼeʼ tu invitartaj Jesús yéetel u disipuloʼob, u amigoʼob yéetel le máaxoʼob kʼamik le impuestoʼob ku boʼotaʼal tiʼ u gobiernoil Romaoʼ. Ichil le impuestoʼob ku boʼotaʼaloʼ táakaʼan u kʼuchul le barcoʼoboʼ, u impuestoil le carroʼob ku máanoʼob teʼ noj bejoʼoboʼ yéetel u impuestoil u yoksaʼal baʼaxoʼob konbil teʼ luʼumiloʼ. ¿Bix u yilaʼal kaʼach le j-kʼam impuestoʼob tumen u maasil judíoʼoboʼ? Jach pʼektaʼanoʼob, tumen ku cobrartikoʼob u maasil tiʼ le unaj u boʼotaʼaloʼ. Teʼ kʼiinbesajoʼ bin tak le máaxoʼob kʼaj óolaʼanoʼob yoʼolal le baʼaxoʼob kʼaastak ku beetkoʼob kaʼachoʼ (Lucas 7:37-39).

Le táan le kʼiinbesajoʼ le fariseoʼoboʼ tu kʼáatoʼob tiʼ u disipuloʼob Jesús: «¿Baʼaxten a j-kaʼansajeʼexeʼ ku janal yéetel le j-kʼam impuestoʼoboʼ bey xan yéetel uláakʼ j-kʼeban máakoʼob?» (Mateo 9:11). Ka tu yuʼubaj Jesús baʼax ku yaʼalikoʼobeʼ, tu yaʼalaj: «Le máaxoʼob toj u yóoloʼoboʼ maʼ kʼaʼabéettiʼob juntúul doctoriʼ, baʼaleʼ le máaxoʼob kʼojaʼanoʼoboʼ kʼaʼabéettiʼob. Xeeneʼex túun, ka a kaneʼex baʼax u kʼáat u yaʼal lelaʼ: ‹In kʼáat ka a chʼaʼex óotsilil, maʼ ka a kʼubeʼexten kíimsbil baʼalcheʼobiʼ›. Tumen teneʼ maʼ taalen in tʼan máaxoʼob toj u kuxtaloʼobiʼ, baʼaxeʼ taalen in tʼan j-kʼeban máakoʼob» (Mateo 9:12, 13; Oseas 6:6). Le fariseoʼoboʼ maʼ tu jaajil u yóoloʼob tu yaʼaloʼob «j-kaʼansaj» tiʼ Jesusiʼ, baʼaleʼ u jaajileʼ yaan baʼax maʼalob tu kanoʼob tiʼ letiʼ.

Maʼ xaaneʼ Mateoeʼ tu invitartaj le j-kʼam impuestoʼob yéetel le j-kʼeban máakoʼob tu yotoch utiaʼal ka u yuʼuboʼob u kaʼansaj Jesús yéetel utiaʼal ka u natsʼubaʼob yiknal Diosoʼ, «tumen yaʼab tiʼ letiʼobeʼ ku binoʼob kaʼach tu paach» Jesús (Marcos 2:15). Jesuseʼ u kʼáat u yáantoʼob u bisubaʼob yéetel Dios. Le oʼolal maʼ tu mixbaʼalkúuntoʼob jeʼex u beetik le fariseoʼoboʼ. Baʼaxeʼ tu chʼaʼaj óotsilil tiʼob. Jeʼex u beetik juntúul doctoreʼ, tu tsʼakoʼob utiaʼal u páajtal u biskubaʼob yéetel Dios.

Jesuseʼ tu chʼaʼaj óotsilil tiʼ le j-kʼam impuestoʼob yéetel le j-kʼeban máakoʼoboʼ, maʼ tu mixbaʼalkúuntoʼobiʼ. Baʼaxeʼ taakchaj u yáantkoʼob xan jeʼel bix u beetik yéetel le kʼojaʼanoʼoboʼ. Kʼaʼajaktech bix úuchik u chʼaʼik óotsilil tiʼ le leproso ka tu machaj yéetel ka tu yaʼalajtiʼeʼ: «In kʼáat. Utschajkech» (Mateo 8:3). Toʼoneʼ unaj k-chʼaʼik óotsilil xan tiʼ le máaxoʼob kʼaʼabéet áantaj tiʼoboʼ, maases utiaʼal ka u natsʼubaʼob yiknal Dios.