Bautisir Juanajj walja phajjsinakaw carcelan jistʼantatäjjäna. Jesusajj Pascua fiestar 30 maran sarkäna uka qhepatwa Juanarojj carcelar jistʼantapjjäna. Juanajja, discipulonakapajj Jesusan discipulonakapar tukupjjaspa ukwa munäna. Ukampis janiw ukham lurapkänti.

Pascua fiestajj 31 maran jakʼachasinjjäna ukhajja, Juanan discipulonakapat mä qhawqhaniw Jesusan ukar sarasajj akham jisktʼapjjäna: “Nanakas fariseonakas ayunapjjapuntwa, ¿kunatsa discipulonakamajj jan ayunapki?” sasa (Mateo 9:14). Uka tiemponjja fariseonakajj religionapan utjkäna uka costumbrenakarjamaw ayunapjjerïna. Qhepatjja Jesusajj mä jachʼa jachʼa tukuri fariseon oracionapat parläna, akham sasa: “Fariseojj saytʼasisaw akham sasin chuymapan mayisïna: ‘Diosay yuspärsmawa, janiw nayajj mayni jaqenakjamäkti. [...] Nayajj semanan pä kutiw ayuntjja’” sasa (Lucas 18:11, 12). Juanan discipulonakapajj inas costumbrenakarjam ayunapjjchïna, jan ukajj inas Juanan carcelankatapat ayunapjjchïna. Ukatwa Jesusar uñjir jutapkäna uka jaqenakajj ‘¿kunatsa Jesusan discipulonakapajj jan ayunapjjpacha?’ sasin jisktʼasipjjpachäna.

Jesusajj mä uñachtʼäwimpiw jupanakar qhanañchäna, akham sasa: “Casarasir waynajj amigonakapampi chikäski ukhajja, janiw jupanakan llakisipjjañapajj wakiskiti, ¿janicha? Ukampis urunakajj purininiwa, casarasir waynajj uka amigonakapat apaqatäniwa, ukhaw niyas jupanakajj ayunapjjani” sasa (Mateo 9:15).

Juan pachpaw Jesusarojj casarasir wayna sasin säna (Juan 3:28, 29). Niyakejjay Jesusajj discipulonakamp chikäskchïnjja, janiw ayunapjjañapas wakiskänti. Ukampis Jesusajj jiwayatañapäkäna ukhaw llakisiñat jan manqʼat sarnaqapjjañapäna. Jaktayatäjjañapäna ukhajj janiw kunat llakisiñasa ni ayunañas wakisjjañapäkänti.

Uka qhepatjja, Jesusajj pä uñachtʼäwinakatwa akham sas parlarakïna: “Janiw khitis mä thantha isirojj mä machaq telamp rimjjatkaspati, ukham luraspa ukhajja, machaq telajj thantha isir waythapisajj jukʼamp chʼiyjaspa. Janirakiw khitis lipʼichit lurat thantha wayaqanakarojj machaq vino imkaspati, ukhamäspa ukhajja, uka wayaqanakajj phallaspawa, janiw kunatakis walëjjaspati, vinos wartasirakispawa. Antisas machaq vinojj machaq wayaqanakaruw imasi” sasa (Mateo 9:16, 17). ¿Kunsa Jesusajj ukampejj yatichañ munäna?

Jesusan discipulonakapajj janiw judionakan nayra costumbrenakaparjam sarnaqapjjañapäkänti janirakiw ayunapjjañapäkänsa. Uk amuyapjjañapatakiw Jesusajj Bautisir Juanan discipulonakapar yanaptʼaskäna. Jesusajja, janiw nayra costumbrenak lurasipkakiñapatak chʼamañchir jutkänti. Ukham luraspäna ukhajja, mä thantha isirojj mä machaq telampis rimjjataskaspa ukhamäspänwa. Kunjamtï Diosarojj uka tiempon adorasipkäna ukajj niya tukusiñampëjjänwa. Jesusajj janiw kunjamatï judionakajj Diosar  adorapkäna ukham lurasiñap munkänti, jupanakajj jaqenakan costumbrenakaparjamaw adorapjjäna. Ukham lurañajja, mä thantha isirus mä machaq telamp rimjjataskaspa, jan ukajj lipʼichit lurat mä thantha wayaqarus machaq vino imaskaspa ukhamäspänwa.