Ohasáma haimete un áño Juan el Bautista oĩ hague kárselpe. Chupe oñemoinge kuri préso áño 30-pe, pe Páskua riremi. Juan oipota kuri idisipulokuéra omoirũ Jesúspe, péro oĩ gueteri umi ndojapóiva upéva.

Koʼág̃a hiʼag̃uíma pe Páskua del áño 31. Juan disipulokuéra oho Jesús rendápe ha heʼi chupe: “Ore roajuna jepi ha umi fariséo avei. ¿Mbaʼére piko upéicharõ nde disipulokuéra noajunái?” (Mateo 9:14). Umi fariséo ningo oajuna pórke upéva peteĩ kostúmbre irrelihionpegua. Jesús omoĩ vaʼekue voi peteĩ ehémplo oñeʼẽva peteĩ fariséo oñemosantoitereívare, ha oñemboʼéva kóicha: “Aagradesete ningo ndéve Ñandejára, ndajoguái haguére umi ótro kuimbaʼépe [...]. Aajuna dos vése káda semána” (Lucas 18:11, 12). Juan disipulokuéra ojepokuaa avei oajuna, ha ikatu voi koʼág̃a ojapo upéva ombyasýgui Juan oĩ haguére kárselpe. Péro haʼekuéra oikuaase mbaʼérepa Jesús disipulokuéra noajunái avei ohechauka hag̃ua ombyasyha Juan oĩ haguére kárselpe.

Upémarõ Jesús omoĩ chupekuéra peteĩ ehémplo: “Oĩ aja pe nóvio natekotevẽi iñamigokuéra oñembyasy, ¿ajépa? Péro og̃uahẽta pe tiémpo pe nóvio ojepeʼataha chuguikuéra ha upépe oajunáta hikuái” (Mateo 9:15).

Juan voi heʼi vaʼekue Jesús haʼeha pe nóvio (Juan 3:28, 29). Upévare Jesús oĩ aja gueteri, idisipulokuéra natekotevẽi oajuna. Péro Jesús omano vove, idisipulokuéra oñembyasýta ha ni ndokarusemoʼãi. Upéi, oñemoingove jeývo chupe, natekotevẽmoʼãvéima ojapo upéva.

Upe rire Jesús omombeʼu mokõi ehémplo: “Avave ningo ndoiporúi peteĩ téla pyahu orremenda hag̃ua peteĩ ao tuja, cháke pe téla pyahu ikatu oñemomichĩ, oitira pe ao tuja ha osoropave opytávo. Avei avave nomoĩmoʼãi víno ojejapo ramóva mbaʼyru tujápe. Omoĩramo katu pe víno oñehẽmbaitéta ha pe mbaʼyru ndovalemoʼãvéima mbaʼeverã. Pe víno ojejapo ramóva oñemoĩ mbaʼyru pyahúpe” (Mateo 9:16, 17). ¿Mbaʼérepa Jesús omoĩ koʼã ehémplo?

Jesús oipytyvõ Juan disipulokuérape ontende hag̃ua natekotevẽveimaha avave osegi umi kostúmbre hudía, por ehémplo pe ajúno. Jesús ndoúi vaʼekue osegi hag̃ua umichagua kostúmbre, hiʼarive koʼã mbaʼe ojei potaitéma. Haʼe nomboʼéi umi kristiáno osegi vaʼerãha hudiokuéra rrelihión ni umi kostúmbre yvyporakuérante omoĩ vaʼekue. Jesús omboʼéva ndaikatúi ñakompara peteĩ rremiéndo pyahúre oñemoĩva ao tujáre, ni víno pyahúre oñemoĩva mbaʼyru tujápe.