28-تاراۋ
يسانىڭ شاكىرتتەرى نەگە ورازا ۇستامادى؟
ماتاي 9:14—17 مارقا 2:18—22 لۇقا 5:33—39
-
جاقيانىڭ شاكىرتتەرى ورازاعا قاتىستى يساعا سۇراق قويدى
يسانىڭ ب.ز. 30-جىلىنىڭ قۇتقارىلۋ مەيرامىنا بارىپ كەلگەنىنە ٴبىر جىل ٶتتى. جاقيا بىرنەشە ايدان بەرى تۇرمەدە جاتىر. ول شاكىرتتەرىنىڭ يساعا ەرگەنىن قالايدى، ٴبىراق تۇرمەگە جابىلعاننان كەيىن، كەيبىر شاكىرتتەرى يساعا ەرگەن جوق ەدى.
قازىر ب.ز. 31-جىلىنىڭ قۇتقارىلۋ مەيرامىنىڭ قارساڭى. جاقيانىڭ شاكىرتتەرى يساعا كەلىپ: «نەگە ٴبىز دە، پارىزشىلدار دا ورازا ۇستايدى، ال ٴسىزدىڭ شاكىرتتەرىڭىز ورازا ۇستامايدى؟»— دەپ سۇرادى (ماتاي 9:14). پارىزشىلدار ٷشىن ورازا ٴدىني عۇرىپ-ادەت ەدى. كەيىنىرەك ايتقان يسانىڭ ٴبىر مىسالىندا ٶزىن ٵدىل سانايتىن پارىزشىل بىلاي دەپ دۇعا ەتكەن: «ۋا، قۇداي، باسقالار سياقتى... بولماعانىم ٷشىن العىس ايتامىن. اپتاسىنا ەكى رەت ورازا ۇستايمىن» (لۇقا 18:11، 12). جاقيانىڭ شاكىرتتەرى ورازانى ٴدىني عۇرىپ-ادەت بولعاندىقتان نەمەسە ۇستازدارىنىڭ تۇرمەدە وتىرعانىنا قايعىرعاندىقتان ۇستاعان بولۋى مۇمكىن. ەندى ولار يسانىڭ شاكىرتتەرى — بالكىم جاقيا ٷشىن قايعىرۋدىڭ بەلگىسى رەتىندە — نەگە ورازا ۇستامايتىنىن بىلگىسى كەلدى.
يسا مىسال كەلتىرىپ: «كۇيەۋ جىگىت قاستارىندا بولعاندا، دوستارىنا قايعىرۋعا ەش سەبەپ جوق، سولاي ەمەس پە؟ ٴبىراق كۇيەۋ جىگىتتى قاستارىنان الىپ كەتەتىن كەز كەلەدى، سوندا ولار ورازا ۇستايتىن بولادى»،— دەپ جاۋاپ بەردى (ماتاي 9:15).
كەزىندە جاقيانىڭ ٶزى يسانى كۇيەۋ جىگىت دەگەن ەدى (جوحان 3:28، 29). يسا قاسىندا بولعاندىقتان، يسانىڭ شاكىرتتەرى ورازا ۇستامادى. كەيىن، يسا ولگەندە، شاكىرتتەرى قايعىدان قۇسا بولىپ، اس باتپايتىن بولادى. الايدا يسا قايتا تىرىلەدى! سوندا ولارعا ەندى قايعىرىپ، ورازا تۇتۋعا ەش سەبەپ بولمايدى.
سوسىن يسا تاعى ەكى مىسال كەلتىردى: «ەشكىم ەسكى كيىمدى جاڭا ماتامەن جامامايدى، ويتكەنى ول شۋىپ، كيىمنەن جۇلىنىپ قالادى دا، جىرتىق ودان بەتەر ۇلكەيىپ كەتەدى. سونداي-اق جاڭا شاراپتى ەسكى مەسكە قۇيمايدى، ايتپەسە مەس جارىلىپ، شاراپ اعىپ كەتەدى، مەس تە بۇلىنەدى. قايتا، جاڭا شاراپتى جاڭا مەسكە قۇيادى» (ماتاي 9:16، 17). مۇنىمەن ول نە ايتقىسى كەلدى؟
يسا بۇل مىسالدارمەن جاقيانىڭ شاكىرتتەرىنە مىنا ٴبىر جايتتى تۇسىنۋگە كومەكتەسكىسى كەلدى: ەشكىم يسانىڭ شاكىرتتەرىنەن يۋدايزمنىڭ ورازا سياقتى ەسكى عۇرىپتارىن ۇستانۋدى تالاپ ەتپەۋ كەرەك. ويتكەنى ول ەسكىنى جاماپ، ونىڭ مەرزىمىن ۇزارتۋعا كەلگەن جوق. ەسكى دەپ يسا توزىعى جەتكەن عيباداتتى، ياعني جاقىندا جارامسىز بولىپ قالاتىن عيبادات جۇيەسىن ايتتى. يسانىڭ ەنگىزبەك بولعان عيباداتى سول زامانعى ياھۋديلەردىڭ سالت-جورادان تۇراتىن عيباداتىنان بولەك. سول سەبەپتى ول «جاڭا ماتامەن ەسكى كيىمدى جاماۋعا» نەمەسە «جاڭا شاراپتى ەسكى مەسكە قۇيۋعا» تىرىسپادى.
