Jean ayeke na da ti kanga, depuis na peko ti so Jésus ague lani na matanga ti Pâque ti ngu 30 ti ngoi ti e. Jean aye ti tene adisciple ti lo aga adisciple ti Jésus, me ala kue asara tongaso ape, ngbene ye so a bi lo Jean ni na da ti kanga.

Fadeso, tongana lango ti matanga ti Pâque ti ngu 31 ti ngoi ti e aga nduru, ambeni disciple ti Jean ague na mbage ti Jésus na ala hunda lo: “Ngbanga ti nyen si e na aFarizien e yeke mû jeûne, me adisciple ti mo amû jeûne ape?” (Matthieu 9:14). A-Farizien abâ lani mungo jeûne tongana mbeni mbage ti vorongo ti ala. Na mbeni ngoi nde na pekoni, Jésus amû même mbeni tapande so na yâ ni lo sara tënë ti mbeni Farizien so abâ tere ti lo wani mbilimbili, na so ayeke sambela, a tene: “Nzapa, mbi mû singila na mo so mbi yeke tongana tanga ti azo pëpe. . . . Mbi yeke mû jeûne fani use na yâ ti dimanche oko.” (Luc 18:11, 12). Peut-être adisciple ti Jean ayeke mû ka lakue jeûne tongaso. Wala ala mû lani jeûne ti fa mawa ti ala ndali ti so a kanga lani Jean. Me adisciple ti Jean ayeke hunda lani tere ti ala wala ngbanga ti nyen la adisciple ti Jésus ayeke mû ka jeûne ape, ti fa nga mawa ti ala ndali ti ye so a sara na Jean so.

Jésus akiri tënë na ala na mungo mbeni tapande, lo tene: “Na ngoi kue so koli so amû wali fini fini angbâ na tere ti akamarade ti lo, ala yeke sara vundu ape. Me ambeni lango ayeke ga ande so a yeke zi lo na tere ti ala; na ngoi ni so la ala yeke mû jeûne.”—Matthieu 9:15.

Jean lo wani asara lani tënë ti Jésus tongana mbeni koli so amû wali fini fini (Jean 3:28, 29). Legeoko nga, adisciple ti Jésus ayeke mû jeûne ape na ngoi kue so Jésus ayeke na tere ti ala. Me na peko ti so Jésus akui ande awe la si adisciple ni ayeke fa mawa ti ala na ala yeke na nzara ti te kobe ape. Me ye ni ayeke kiri ti changé ande tongana a zingo Jésus na kuâ! Tongaso, adisciple ni ayeke duti ande na raison oko ape ti mû encore jeûne.

Na pekoni, Jésus amû atapande use so: “Zo ayeke mû fini yanga ti bongo ti fü na lê ti kä ti ngbene bongo ape. Me tongana lo sara ni, fini yanga ti bongo ni ayeke gboto ngbene bongo ni, na lê ti kä ni akiri akono. Nga, azo ayeke tuku fini vin na yâ ti ngbene bozo ti vin pëpe. Me tongana ala tuku ni dä, bozo ni alingbi ti sungba, vin ni ayuru kirikiri nga bozo ni abuba. Ye oko, azo ayeke tuku fini vin na yâ ti fini bozo ti vin.” (Matthieu 9:16, 17). Nyen la Jésus aye ti tene so?

Jésus aye ti aidé adisciple ti Jean ti hinga so a lingbi zo oko aku pëpe na mbage ti adisciple ti lo, Jésus, ti sara ye alingbi na angbene ngobo ti aJuif, na tapande ti mû jeûne. Jésus aga pëpe ti leke yâ ti ngbene lege ti vorongo nzapa ti aJuif wala ti mû ngangu na ni si aninga. Lege ti vorongo nzapa ti aJuif abuba awe na a ga nduru lani ti ke ni awe. Lege ti vorongo so Jésus awa azo ti sara ni aluti pëpe na ndo ti angobo ti sarango ye ti aJuif. Lo yeke tara pëpe ti mû fini yanga ti bongo ti fü ni na lê ti kä ti ngbene bongo, wala ti mû fini vin ti tuku na yâ ti ngbene bozo ti vin.