Ko tai leva eiloa te taimi ne nofo atu ei a Ioane te Papatiso i te falepuipui talu mai te taimi ne kau atu ei a Iesu ki te Paseka i te 30 T.A. Ne manako a Ioane ke ‵kau atu ana soko ki a Iesu, kae ne seki ‵kau atu latou katoa ki a ia i masina mai tua o te ‵peiatuga o Ioane ki te falepuipui.

I te taimi tenei ko pilipili mai ei te Paseka i te 31 T.A., ne olo atu a nisi soko o Ioane ki a Iesu kae fesili atu: “Kaia e fakaliki‵liki sāle ei matou mo Falesaio kae e se ko ou soko?” (Mataio 9:14) Ne fakaliki‵liki sāle te kau Falesaio e pelā me se sauniga fakalotu. Fakamuli ifo, ne fakaaoga ne Iesu se tala fakatusa telā ne ‵talo atu ei se Falesaio fia amiotonu: “Te Atua, au e fakafetai atu ki a koe i a au e se fai pelā mo nisi tino katoa . . . Au e fakalikiliki fakalua i te vaiaso.” (Luka 18:11, 12) Kāti ne fakaliki‵liki sāle a soko o Ioane e pelā me se faifaiga masani. Io me kāti ne fakaliki‵liki latou ke fakaasi atu ei te fanoa‵noa ki te nofo atu o Ioane i te falepuipui. Ne fia iloa foki ne tino kolā ne kilo‵kilo atu a te pogai e se fakaliki‵liki ei a soko o Iesu, kāti mai te ‵kau atu i te fakaasiga o te fanoa‵noa ki mea ne fai ki a Ioane.

Ne tali atu a Iesu mai te fakaaogaga o se fakaakoakoga: “E mata, e isi se pogai ke fanoa‵noa ei a taugasoa o te tamataene telā ka fakaipoipo i te taimi koi ‵nofo fakatasi ei latou? Kae ka oko mai a aso e ave ei keatea te tamataene ka fakaipoipo mai i a latou, ko fakaliki‵liki ei latou.”—Mataio 9:15.

Ne fakasino atu eiloa a Ioane ki a Iesu e pelā me ko te tamataene ka fakaipoipo. (Ioane 3:28, 29) E ‵tusa mo pati konā, a koi nofo mai a Iesu, ne seki ‵tau o fakaliki‵liki ana soko. Fakamuli ifo, kafai ko mate a Iesu, ka fanoa‵noa ei ana soko kae ka galo atu ei te lotou fia‵kai. Ka ‵fuli eiloa te tulaga tenā māfai ko toe fakatu aka ei a ia! Ko se toe ‵tau ei o fakaliki‵liki latou ona ko te fanoa‵noa.

Ne ‵soko atu ki ei, ne taku atu ne Iesu a tala fakatusa e lua: “E seai se tino e ‵sui ne ia se potu laugatu fou ki se gatu mago, me ka ‵futi ne te laugatu fou a te gatu mago kae ka lasi atu tena masaega. Io me utu ne tino te uaina fou ki loto i taga uaina mua. Kafai e fai ne latou penā ka ma‵pa a taga uaina kae maligi te uaina ki tua, ko ma‵sei ei a taga uaina konā. Kae e utu ne tino a te uaina fou ki loto i taga uaina ‵fou kae ka se mafai ei o ma‵sei a mea e lua konā.” (Mataio 9:16, 17) Se a te manatu tenei o Iesu?

Ne fesoasoani atu a Iesu ki soko o Ioane te Papatiso ke malamalama me e se ‵tau o fakamoe‵moe latou ke tau‵tali atu a soko o Iesu ki faifaiga mua o te lotu Iutaia, e pelā mo te fakalikiliki mō tapuakiga. Ne seki vau a ia ke fakafou malie aka io me ke fai ne ia ke tai leva atu a faiga ‵mago o te tapuakiga, se vaegā tapuakiga telā ko ‵tau o tiakina katoatoa atu. A te tapuakiga telā ne fakamalosi aka ne Iesu, e se ko te lotu telā e fakafetaui atu ki te lotu Iutaia i aso konā fakatasi mo akoakoga a tāgata. Ikai, e se taumafai a ia o ‵sui se laugatu fou ki se gatu mua io me se uaina fou telā e utu ki loto i se fagu uaina mua.