Waray pag-iha katapos tumambong hi Jesus han Paskua han 30 C.E., napriso hi Juan nga Parabaptis. Karuyag ni Juan nga magin sumurunod ni Jesus an iya mga disipulo. Pero paglabay han pipira ka bulan kapriso niya diri pa gihapon ngatanan niya nga disipulo nagin sumurunod ni Jesus.

Han hirani na an Paskua han 31 C.E., may mga disipulo hi Juan nga kumadto kan Jesus ngan nagpakiana: “Kay ano nga kami ngan an mga Pariseo nagpupuasa pero an imo mga disipulo diri nagpupuasa?” (Mateo 9:14) An mga Pariseo nagpupuasa sugad nga rituwal han ira relihiyon. Ha urhi, nag-unabi pa ngani hi Jesus hin ilustrasyon diin an usa nga Pariseo nagpapakamatadong nga nag-ampo: ‘O Dios, nagpapasalamat ako ha imo kay diri ako pariho ha iba. Kada semana duha ka beses ako nga nagpupuasa.’ (Lucas 18:11, 12) Bangin nagpupuasa liwat an mga disipulo ni Juan sugad nga kustomre. O bangin nagpupuasa hira tungod ha kasubo ha kapriso ni Juan. Nahipapausa liwat an mga tawo kon kay ano nga diri nagpupuasa an mga disipulo ni Jesus, bangin basi makisimpatiya ha duro nga kasubo ha ginbuhat kan Juan.

Binaton hi Jesus pinaagi hin usa nga ilustrasyon: “An kasangkayan han karaslon nga lalaki waray rason nga masubo mentras kaupod nira hiya, diri ba? Pero maabot an panahon nga an karaslon nga lalaki kukuhaon ha ira, ngan dida hito magpupuasa hira.”—Mateo 9:15.

Hi Juan mismo nag-unabi kan Jesus sugad nga an karaslon nga lalaki. (Juan 3:28, 29) Salit samtang kaupod pa hi Jesus han iya mga disipulo, diri hira sadang magpuasa. Ha urhi, kamatay ni Jesus, masusubo gud an mga disipulo ngan mawawarayan hin gana ha pagkaon. Pero magbabag-o ito kon banhawon na hiya! Hito nga panahon, waray na hira hinungdan nga masubo ngan magpuasa.

Kahuman, gin-unabi ni Jesus inin duha nga ilustrasyon: “Waray nagtatangkop hin bag-o nga tela ha daan nga pantungbaw nga panapton, kay pagkuro hini madugang la kagisi an gintangkopan. Waray liwat nagsusulod hin bag-o nga bino ha daan nga anit nga surudlan, kay mabuburit ito ngan makakarag an bino. Lugod, an bag-o nga bino iginsusulod ha bag-o nga anit nga surudlan.” (Mateo 9:16, 17) Ano an punto ni Jesus?

Ginbubuligan ni Jesus an mga disipulo ni Juan nga Parabaptis nga makasabot nga waray sadang mag-obligar ha mga sumurunod ni Jesus nga magtuman ha mga tradisyon han Judaismo, sugad han pagpuasa. Waray hiya kumanhi basi tangkopan ngan ipadayon an daan ngan liriwanan na nga sistema han pagsingba. An pagsingba nga igin-aaghat ni Jesus diri amo an pagsingba nga iginpapahiuyon ha Judaismo nga may mga tradisyon han mga tawo. Diri hiya nangangalimbasog pagtangkop ha daan nga bado o pagsulod hin bag-o nga bino ha matig-a ngan daan nga anit nga surudlan.