I ngéda Lôk Yuda ihogi i nkal le Yésu a nyan kel Sabat mu kiki a mbuubaha mut, Yésu a ntimbhe le: “Letee ni nano, Tata a ma waa bé sal, to me me nwaa bé sal.”​—Yôhanes 5:17.

I pot maliga, Yésu a mbôk bé Mbén Djob i i mbéñge Sabat. A yé ndik kôna Djob mu kiki a niiga, a tiblak ki bôt. Inyu hala nyen Yésu a nke ni bisu i boñ loñge hiki kel. Ndimbhe yé i nlôôha unbaha baoo bé kayéle ba nyéñ nol Yésu. Inyuki ba mboñ hala?

U héya le ba ñunup inyule i litehge jap, Yésu a mbôk Mbén Sabat ngéda a mbuubaha bôt, ba nlôôha ki unup ngéda a nkal bo le a yé Man Djob. Inyu yap, Yésu a ñôbôs jôl li Djob mu kiki a nhoñol le Isañ le Djob, i yé wengoñle Yésu a yé kal le a kôli ni Djob. Ndi, mahoñol map ma nkônha bé Yésu woñi, a nke ni bisu i kal bo mam ma mbéñge maada mé ni Isañ. A nkal bo le: “Inyule Isañ a ngwés Man, a ñunda ki nye mam momasôna nyemede a mboñ.”​—Yôhanes 5:20.

Tata a yé Nu a nti niñ, i ngéda kôba, a bi unda hala ngéda a bi ti ngim bagwélél yé kunde i tugul bôt. Yésu a nke ni bisu i nkal bo le: “Nlélém kiki Isañ a ntugul bawoga, a tinak bo niñ, hala ki nyen yak Man a nti tonjee a ngwés niñ.” (Yôhanes 5:21) Kinje bibañga bi gwé mahee, bi nti botñem inyu dilo di nlo! Ndi nano, Man a yé tugul bet ba yé nwok i pes mbuu. Jon Yésu a nkal le: “Nu ni nu a nok bañga, ndi a hémle Nu a bi ep me, a gwé niñ boga; a nlo bé to i bikééhene, ndi a mal nyodi i nyemb, a témb i niñ.”​—Yôhanes 5:24.

Yom yo ki yo i ñunda bé le Yésu a ma tugul mut, ndi a nkal baoo bé le hala a ga bôña. A nkal le: “Ngeñ y’a lo le i bôt bobasôna ba yé ikété soñ mbigda b’a nok kiñ yé, ba pam.”​—Yôhanes 5:28, 29.

To hala kiki tel i Yésu ikété bitelbene bi Yéhôva i mbuma ñañ, Yésu a nyighe le a nsuhus nyemede isi Isañ, a nkal le: “Me nla bé boñ jam to jada ni memede.  . . Me nyéñ bé le sômbôl yem yon i bôña, ndi sômbôl i nu a bi ep me.” (Yôhanes 5:30) Yésu a ntoñol nson tôbôtôbô a gwé mu bitelbene bi Djob, ngélé bisu i le a mboñ hala i mbamba. I bet ba nkolba Yésu ba gwé ndik bé mbôgi yé inyu ba nkwoog nkaa. Yésu a nhôñlaha bo le: ‘Ni bi om bôt yak Yôhanes [Nsôble], ndi a bi bok mbôgi inyu maliga.’​—Yôhanes 5:33.

Ibabé pééna, i bôt bana ba nyi le hala a yé nwii ima le Yôhanes a bi kwélés baéga bibase bi Lôk Yuda inyu Nu a bé lama lo mbus yé, nu ba nsébél le “Mpôdôl” ni “Kristô.” (Yôhanes 1:20-25) A nhôñlaha bo le ba bé ti Yôhanes nu a yé nano i ndap mok ngandak lipém. A nkal bo le: “Ni bi kon yak maséé ngandak ikété mapubi mé inyu ndék ngéda.” (Yôhanes 5:35) Ndi, mbôgi Yésu a nti i nlôôha keñi iloo i Yôhanes.

Yésu a nkônde ke ni bisu i kal bo le: “Minson yaga mi nwon me yé i boñ, nwo ki nwon mi mbok mbôgi le Tata a bi ep me. Yak Tata nyemede nu a bi ep me a bi bok mbôgi inyu yem.” (Yôhanes 5:36, 37) Kiki hihéga, Djob a bi bok Yésu mbôgi i kel sôble yé.​—Matéô 3:17.

I pot maliga, i bôt ba nkolba Yésu ba gwé bé njom yo ki yo i yan nye. Bitilna bôt bana ba nkadba le ba nwan, bi mbok mbôgi inyu Yésu. Inyu mélés nkwel u, Yésu a nkal bo le: “Ibale ni hémlege toi Môsi, ki ni nhémle yak me, inyule a bi tila inyu yem. Ndi ibale ni nhémle bé bitilna gwé, lelaa ni nla hémle i jam me nkal?”​—Yôhanes 5:46, 47.