Kɛ Zezi yoli tukpacifuɛ kun juejue Wunmiɛn-lolɛ-cɛn’n nun’n, Zuifu wie’m be seli kɛ w’a yo sa tɛ. Sanngɛ Zezi tɛli be su kɛ: “Lele nin andɛ’n, min Si te di junman. N kusu n yaciman junman dilɛ.”​​—Zan 5:17.

Like nga Zezi yoli be Wunmiɛn-lolɛ-cɛn’n nun’n, Ɲanmiɛn mmla’n buman be fɔ. Ɔ boli jasin fɛ’n yɛ ɔ yoli sran’m be juejue. I lɛ nun’n, ɔ sɔnnzɔn i Si Ɲanmiɛn m’ɔ yo sa kpakpa mun’n. I ti yɛ Zezi yoli sa kpakpa cɛn kwlakwla’n niɔn. Zezi kannin ndɛ kun ekun fa tɛli be nga be tɔnnin i suɛn’n, be su. I ti’n, be wa fali ya trali laa’n. Ɔ maan be kunndɛli kɛ bé kún i bɔbɔ.

Sran sɔ’m be waan ɔ fataman kɛ Zezi yo sran’m be juejue Wunmiɛn-lolɛ-cɛn’n nun. Asa ekun’n, kɛ ɔ seli kɛ ɔ ti Ɲanmiɛn i Wa’n, be wa fɛli i wun ya dan kpa ekun. Yɛle kɛ be akunndan’n nun lɔ’n, kɛ ɔ kan sɔ’n, ɔ ti kɛ ɔ su se kɛ ɔ nin Ɲanmiɛn be sɛ sa. Sanngɛ Zezi seli be kɛ ɔ nin Ɲanmiɛn be afiɛn mantan kpa. W’a fiɛmɛn i sɔ’n su kaan sa. Ɔ seli be kɛ: “Siɛ’n klo Ba’n, kpɛkun ɔ kle i ninnge nga i bɔbɔ yo’n i kwlaa.”​​—Zan 5:20.

Ɲanmiɛn yɛ ɔ man nguan’n niɔn. I sɔ’n ti’n laa blɛ’n nun’n, ɔ mannin klɔ sran wie’m be tinmin naan b’a kwla cɛn sran mun. Zezi kɛnnin i sɔ’n i ndɛ. Ɔ seli kɛ: “Siɛ’n yo maan be nga b’a wu’n be jaso, kpɛkun ɔ man be nguan. I wafa kunngba’n, Ba’n kusu man sran ng’ɔ klo’n i nguan wie.” (Zan 5:21) Nanwlɛ, ndɛ sɔ’n cici e wla dan! Kɛ é sé yɛ’n bɔbɔ’n, be nga be nin Ɲanmiɛn be afiɛn w’a saci’n, Ba’n su uka be naan be nin Ɲanmiɛn be siesie be afiɛn ekun. Sɛ é kwlá sé’n, ɔ ti kɛ ɔ su cɛn be sa. I sɔ’n ti’n, Zezi seli kɛ: “Sran ng’ɔ ti min ndɛ’n m’ɔ lafi sran ng’ɔ sunmannin min’n i su’n, ɔ́ ɲán nguan m’ɔ leman awieliɛ’n. Kpɛkun be su dimɛn i jɔlɛ. Sanngɛ w’a fin wie’n nun w’a fite, w’a ɲan nguan.”​​—Zan 5:24.

Kɛ ɔ fɛ i blɛ nga Zezi boli Ɲanmiɛn junman dilɛ bo lele dɔ ngalɛ’n su’n, sa fi kleman kɛ Zezi w’a dun mmua w’a cɛn sran wie le. Sanngɛ Zezi seli be nga be tɔnnin i suɛn’n be kɛ ɔ́ wá cɛ́n sran mun. I waan: “Blɛ wie wá jú’n, be kwlaa nga be o ndia’m be nun’n, bé tí i nɛn’n kpɛkun bé fín ndia’m be nun bé fíte.”​​—Zan 5:28, 29.

Junman nga Zezi wá dí’n, ɔ ti dan. Ɔ nin i sɔ’n ngba’n, ɔ kleli kɛ Ɲanmiɛn le ɲrun trɛ i. Ɔ seli kɛ: “N kwlá kpɛman n ti nun n yoman like ba kun sa. [...] Afin nán min klun sa yɛ n kunndɛ kɛ ń yó-ɔ, sanngɛ sran ng’ɔ sunmannin min’n i klun sa yɛ n yo-ɔ.” (Zan 5:30) I lɛ’n nun’n, Zezi kleli kɛ Ɲanmiɛn mɛnnin i kwlalɛ naan ɔ di sran’m be jɔlɛ, yɛ ɔ cɛn sran mun. Ɔ nin-a yiyiman ndɛ sɔ’n nun nin-a kleman sran uflɛ le. Nán ndɛ nga Zezi kannin’n nin like ng’ɔ yoli’n, be ngunmin yɛ be kleli kɛ Ɲanmiɛn yɛ ɔ sunmɛnnin i-ɔ. I sɔ’n ti’n, Zezi kannin ndɛ kun fa kpɛnnin be wla. Ɔ seli kɛ: ‘Amun sunmannin sran Zan [Batɛmun yofuɛ’n] i sin. Min ti lalo ng’ɔ dili’n ti nanwlɛ.’​​—Zan 5:33.

Zan seli Zuifu’m be Ɲanmiɛn sulɛ wafa’m be su kpɛnngbɛn’m be kɛ sran kun wá bɛ́ i sin. Ɔ kannin sɔ i afuɛ nɲɔn yɛ. I waan sran sɔ’n ti “Ɲanmiɛn nuan ijɔfuɛ” ɔ nin “Klisi.” Be nga be tɔnnin Zezi i suɛn’n be tili Zan i ndɛ sɔ’n wie. (Zan 1:20-25) Kannzɛ bɔbɔ dɔ sɔ’n su’n Zan o bisua’n, sanngɛ Zezi kpɛnnin be wla kɛ laa’n be buli Zan sɔ’n i sran. Ɔ seli be kɛ: “Amun kunndɛli kɛ amún dí aklunjuɛ i kpajalɛ’n nun. I sɔ mɔ amun kunndɛli’n w’a cɛman.” (Zan 5:35) Kusu nn Ɲanmiɛn junman nga Zezi su di’n, i dan tra Zan Batɛmun yofuɛ’n i liɛ’n.

Zezi seli kɛ: “Ninnge bɔbɔ nga min Si seli min kɛ n yo’n, mɔ n su yo’n [mɔ i wie yɛle sran nga n fin i juejue yolɛ’n], be kle kɛ Siɛ’n yɛ ɔ sunmannin min-ɔn.” Ɔ kan guali su kɛ: “Siɛ’n m’ɔ sunmannin min’n, i bɔbɔ dili min ti lalo.” (Zan 5:36, 37) Ɲanmiɛn dili Zezi i ti lalo kpɛ sunman. Cɛn nga be yoli Zezi i batɛmun’n, ɔ yoli sɔ wie.​​—Matie 3:17.

Be nga be tɔnnin Zezi i suɛn’n, be kpɔli i ngbɛn. Afin Ɲanmiɛn ndɛ’n mɔ be bɔbɔ be waan be kanngan nun’n, ɔ kan Zezi ndɛ weiin. Zezi guali i ndɛ’n bo seli kɛ: “Nanwlɛ, sɛ ɔ ti kɛ amun lafili Moizi su’n, nn amún láfi min su. Afin min su ndɛ yɛ ɔ klɛli-ɔ. ?Sanngɛ sɛ amun lafiman ndɛ ng’ɔ klɛli’n su’n, ɔ́ yó sɛ naan amun a lafi ndɛ nga n kan’n su?”​​—Zan 5:46, 47.