Éyoñ Bejuif béziñ ba bôté Yésus ajô na a nji sémé môse Sabbat amu a te saé môt, a yalane be a jô’ô na: “Ésa wom a nga bo ésaé azukui éyoñe ji, me ke me abo ésaé.”​—Jean 5:17.

Jame Yésus a bo da tyame ki atiñe Zambe a lat a môse Sabbat. Éyoñ a kañete a saé bôt a vu fo’o mimboone mi mam mi Zambe. Ajô te Yésus a ke ôsu a bo mam me ne mvaé môs ôse. Ve éyalan Yésus a ve bebo’olô bé ja bo na be tu’a beta wô’ô mbia ôlun a jeñe na be wôé nye. Amu jé ba nyoñe mam avale di?

Ba taté bi abé ôsimesan éyoñ ba buni na Yésus a nji semé môse Sabbat amu a saé bôt; a nde fe, ba tu’a beta wô’ô ôlun éyoñ ba wô’ô Yésus a jô’ô na a ne Mone Zambe. E be be, jam ete e ne ébiasé na a yene Zambe ane Ésa wé, é nto v’ane a jô na ba Ésa wé be ne nté nkôñe wua. Ve Yésus a nji ko woñe ya kate be mam mefe ma fombô élat a bili a Zambe, élat é ne ngum aval. A jô na: “Amu Ésa a nye’e Mon, a liti nye mam mese émien a bo.”​—Jean 5:20.

Ésa nnye a ne Anjeñe ya ényiñ, a fe, a nga liti de éyoñ a nga ve bôte ya melu mvus ngule ya wômôlô bôte be nga wu. Yésus a ke ôsu a jô na: “Amu aval ane Ésa a wômôlô mimbim a ve mie ényiñ, nalé fe Mon a ve ényiñ bôt a nye’e a va’ak.” (Jean 5:21) Za aval mbamba ndi nlem asu melu ma zu mejô ma ma ve di! Ja’a éyoñe ji, Mon a ve bôte be ne ñwuane mfa’a ya nsisim ényiñ. Ajô te Yésus a jô na: “Môt a wô’ ajô dam a buni môt a nga lôme ma, a ne ényiñ ya melu mese, a ye nyoñe mekua a kôlôya awu, a nyiñeya.”​—Jean 5:24.

Teke jam éziñ da liti na Yésus a wômôlôya môt a te wu, ve Yésus a jô bôte ba ve nye bijô na, ñwômane miñwuan wo ye bobane melu ma zu. A jô na: “Amu awolo de aye bo éyoñ bôte bese be ne mesoñ be aye wô’ô tyiñe jé be aye so.”​—Jean 5:28, 29.

Akusa bo ésaé Yésus a bo é ne angôndô ya abeñ, a kôme liti na a ke ôsu a sili émien si be Zambe, a jô na: “Mamien me nji bo ngule ya bo jam. . . . me nji jeñe mam me anye’e, ve mam môt a nga lôme ma a nye’e.” (Jean 5:30) A ne fo’o éyoñ ôsu le Yésus a timine nne sañesañ e bôt été beta ésaé a bili asu na nsôñane Zambe ô jaléban. Ve bôte ba ve Yésus bijô be nji bi ve bifia émien a ve. A bo na be beta simesan, a jô’ô na: “Mi maneya lôme bôt be Jean [Baptiste], ane a nga kañete benya mejôô.”​—Jean 5:33.

Ba kôme yeme na, den a nga ke mimbu mibaé, Jean a nga kobô a betebe ôsu ya ñyebe Bejuif ajô ya nyô a ye so mvuse jé, nyô ba ye loene na “nkulu mejô,” nge na “Krist.” (Jean 1:20-25) Yésus a bo na be beta simesan abim ésemé be mbe be bili be Jean, nnye ate a nto mimbôk éyoñ ji, a jô’ô be na: “Nnye a mbe lampe a yôñôk a ve éfufup; mi nga kômbô vak a tabe éfufup jé ôbe nté.” (Jean 5:35) Ve bifia bi Yésus bia dañ anen a lôte bi bi Jean Baptiste.

Yésus a jô na: “Ve nkañetan me bili [ja’a nsaéane a ndeme fo’o bo] me akañete ajô dame na, tate a nga lôme ma.” A ke ôsu a jô na: “Tate a nga lôme ma, nnye fe a nga kañete ajô dam.” (Jean 5:36, 37) Éve’an é ne na, Zambe émien a nga bo’olô ajô Yésus éyoñ a nga duban.​—Matthieu 3:17.

Ba ba ve Yésus bijô be nji fo’o bi amu éziñ a tindi be na be lume nye mvus. Mintilane bebien ba jô na ba yeme fak mia bo’olô fe ajô dé. Yésus a man bifia bié a jô’ô na: “Amu nge mi nga buni Moïse, ve mi nga buni fe ma. Nge mi abo te buni mejô a nga tili, mi aye buni mejô me akobô aya?”​—Jean 5:46, 47.