Serten Zwif i akiz Zezi konmkwa i’n kas lalwa Saba akoz i ti geri en zonm zour Saba. Zezi i dir zot: “Mon Papa in kontinyen travay ziska prezan e mwan osi mon pe kontinyen travay.”​—Zan 5:17.

Lalwa Bondye konsernan Saba pa enterdi fer bann keksoz ki Zezi in fer, parey geri sa zonm. Son travay predikasyon ek gerizon i montre ki i pe imit bann bon travay ki Bondye i fer. Alor, toulezour Zezi i kontinyen fer sa ki byen. Par kont, sa larepons i fer bann ki pe akiz li pli ankoler e zot anvi touy li. Akoz?

An plis ki krwar ki Zezi in kas lalwa Saba akoz i’n geri en dimoun zour Saba, zot osi ofanse ler Zezi i dir ki i Garson Bondye. Zot vwar li konmsi i pe koz kont Bondye ler i dir ki Bondye i son Papa. Pour zot, ler Zezi i dir ki Zeova i son Papa, se konmsi Zezi pe fer li vin egal avek Bondye. Par kont, Zezi pa per pour donn zot plis detay konsernan son relasyon spesyal avek Bondye. I dir: “Papa i kontan son Garson e i montre li tou bann keksoz ki li menm i fer.”​—Zan 5:20.

Bondye, nou Papa i sa Enn ki donn lavi e i’n montre sa dan lepase ler i’n donn bann zonm son pwisans pour resisit lezot. Zezi i osi dir: “Zis parey Papa i resisit bann mor e donn zot lavi, pareyman, Garson osi i donn lavi sa ki i anvi.” (Zan 5:21) Sa i en zoli parol ki annan bokou sinifikasyon pour nou e ki donn nou en zoli lespwar pour lavenir! Menm la konmela, Garson Bondye pe redonn lavi bann ki’n mor dan en sans spirityel. Alor Zezi i dir: “Sa ki tann mon parol e krwar sa Enn ki’n anvoy mwan, pou ganny lavi eternel e i pa pou ganny zize me i pou parey en dimoun mor ki’n reganny lavi.”​—Zan 5:24.

Ler Zezi i dir sa parol, i paret ki i pa’n deza resisit en dimoun ki’n mor, me i dir bann ki pe akiz li ki dimoun pou vreman ganny resisite. I dir: “Letan pe vini kot tou bann ki dan latonm pou tann son lavwa e zot pou resisite.”​—Zan 5:28, 29.

Menm si Zezi i annan en rol ki vreman enportan, i fer li kler ki i anba lotorite son Papa ler i dir: “Mon pa kapab fer nanryen ki mon’n deside lo mwan menm. . . . Mon oule fer lavolonte sa enn ki’n anvoy mwan e non pa mon prop lavolonte.” (Zan 5:30) Par kont, Zezi i eksplik sa rol enportan ki i annan dan plan Bondye. Sa i en keksoz ki i pa ankor fer an piblik. Me pa zis sa ki Zezi in dir lo li menm ki donn levidans lo son rol dan plan Bondye. Pour fer zot rapel, i dir: “Zot in anvoy bann zonm kot Zan [ki batize] e son temwannyaz lo mwan i vre.”​—Zan 5:33.

I posib ki apepre de-z-an pase, bann ki pe akiz Zezi ti tann sa ki Zan ti dir bann sef relizye konsernan sa Enn ki ti pou vin apre li, sa enn ki zot apel “sa Profet” ek “Kris.” (Zan 1:20-25) Zezi i rapel bann ki pe akiz li ki kantite zot ti respekte Zan avan i ti ganny met dan prizon, i dir: “Pour en pti moman letan zot ti anvi rezouir en kantite dan son lalimyer.” (Zan 5:35) Par kont, Zezi pou kontinyen rann en pli gran temwannyaz ki Zan ki batize.

“Travay ki . . . mon pe fer [enkli sa gerizon ki i fek fer] . . . se sanmenm ki rann temwannyaz ki se mon Papa ki’n anvoy mwan. Mon Papa li menm in rann temwannyaz konsernan mwan.” (Zan 5:36, 37) Par egzanp, ler Zezi ti batize, Bondye ti klerman montre ki Zezi i son garson.​—Matye 3:17.

Vreman, bann ki pe akiz Zezi napa en sou leskiz pour rezet li. Bann Lekritir ki zot swadizan lir e fer resers lo la i koz lo Zezi. “Si zot ti krwar Moiz, zot ti pou krwar mwan, parski i ti ekri konsernan mwan. Me si zot pa krwar sa ki i’n ekri, ki mannyer zot kapab krwar sa ki mon dir?”​—Zan 5:46, 47.