Ame lo kola nyizö Iesu hnei itre xa atre Iudra ka hape, ase hë nyidrë ena la wathebo göi Sabath pine aloine la ketre trahmany, öni nyidrë: “Hnene pala hi la Kemeng hna huliwa uti hë enehila, nge tro pala hi ni a huliwa.”—Ioane 5:17.

Nge eje hi, hnine la Trenge Wathebo i Akötresie göi Sabath, tha hna wathebone kö la hnei Iesu hna kuca. Ame la nyidrëti a cainöj me aloinyi atr, nyidrëti hi lai a nyitipune la itre huliwa ka lolo i Akötresie. Matre Iesu pala hi a kuca la loi. Ngo kola ha elëhni me thele troa humuthi nyidrë hnei itre ka inyizö, ke akötre pi hë angatr la aqane sa Iesu. Hnauëne la angatr a ujë tun?

Angatr a mekune menune ka hape, ewekë hna wathebon troa aloinyi atr e Sabath, nge ketre, angatr a wesitr pine Iesu qaja ka hape, nekö i Akötresie nyidrë. Ame koi angatr, Iesu hi lai a silitrengathoi Akötresie, kösë nyidrëti a hape, nyidrëti hi la sa i Akötresie. Ngo tha xou Iesu kö, nyidrëti a hamëne hmaca jë la itre xa ithuemacany göne la aqane imelekeu i nyidro ka ketrepengön. Öni nyidrë: “Kem a hnime la Nekön,” nge, “nyidrëti a amamai angeic la nöjei huliwa i nyidrë.”—Ioane 5:20.

Keme la Atre Hamë Mel, ke ase hë nyidrëti aijijëne ekö la itre atr troa amelene hmaca la itre ka mec. Matre öni Iesu hmaca jë: “Ke tune la aqane amelene hmaca hnei Kem la itre ka mec, tro fe la Nekön a hane amelene la itre hnei angeic hna ajan.” (Ioane 5:21) Hane hi la itre trengewekë ka mingöming, nge ka thue mejiun koi elany! Ngo enehila, Nekön fe hë a amelene hmaca la itre ka pë imelekeu me Akötresie. Öni Iesu: “Ame la atre drenge la itre trengewekëng, me mejiune kowe la Atre upi ni, hetrenyi hë angeic la mele ka pë pun. Ketre, tha tro kö a ameköti angeic, ngo ase hë thepe angeic qa ngöne la mec kowe la mel.”—Ioane 5:24.

Pëkö ka anyipicine laka, ase hë Iesu amelene hmaca la itre atr, ngo nyidrëti pe a canga thuemacanyine la itre ka inyizö ka hape, tro kö lai a traqa. Öni nyidrë: “Easenyi hë la hawa ne tro la itre ka meköl hnine la itre hua ne amekunën, a drenge la aqane ewekë i angeic me lö pi.”—Ioane 5:28, 29.

Ngacama nyipiewekë catre la hnëqa i Iesu, ngo hnei nyidrëti pala hi hna amamane ka hape, draië kö Akötresie. Öni nyidrë: “Thatreine kö ni kuca xanëne la ketre ewekë. . . . tha eni kö a kuca la mekunang, ngo eni pe a thele la aja ne la atre upi ni.” (Ioane 5:30) Iesu petre hi la a qejepengöne qëmeke i nöjei atr la hnëqa ka tru i nyidrë ngöne la aja i Akötresie. Nge tha nyidrëti casi kö la ka anyipicine lai kowe la itre ka inyizö. Hnei nyidrëti hna amexeje hmaca koi angatre ka hape: “Hnei nyipunieti lo hna upe la itre atr koi Ioane [Bapataiso], nge hnei angeic hna catre anyipicine la nyipici.”—Ioane 5:33.

Atre hi la itre atre cili ka hape, lue macatre qëmeken, hnei Ioane hna ithanata me itre he ne hmi angetre Iudra göne la Atre ka traqa thupei angeic—lo hna hëne ka hape, “Perofeta” me “Keriso.” (Ioane 1:20-25) Iesu a amekunë angatre lo aqane wangatrunyi Ioane hnei angatr, atre hna akalabusin enehila, öni nyidrë: “Ngöne la ketre hnepe ijin, hnei nyipunieti hna kapa madrine la lai i angeic.” (Ioane 5:35) Ngo, eje hi laka, sisitria catre kö la hna anyipicin hnei Iesu hui Ioane Bapataiso.

Öni Iesu: “Ame la . . . itre huliwa hnenge hna eatrën,” ene fe lo iamamanyikeu hna xötrei kuca, itre ej a “anyipicine laka, hna upi ni hnei Kaka.” Nge Iesu a nyixane hmaca jë me hape: “Hnei Kaka, Atre upi ni, hna ketre sipu anyipici  ni.” (Ioane 5:36, 37) Eje hi, hnei Akötresie hna anyipici Iesu thupene lo kola bapataiso nyidrë.—Mataio 3:17.

Pëkö kepin tro angatr a thipetriji Iesu, ke ame fe lo itre hna cinyihan hnei angatr hna catre fë, kolo fe a anyipici nyidrë. Matre Iesu a nyipune me hape: “Maine ka mejiune ju nyipunie koi Mose, tro fe nyipunie a hane mejiune koi ni, ke hnei Mose lo hna cinyihan göi ni. Ngo maine tha mejiune kö nyipunie kowe la itre hnei angeic hna cinyihan, nga tro nyipunieti a mejiune tune kaa kowe la itre trengewekëng?”—Ioane 5:46, 47.