Iuda taudia haida idia gwau Iesu ese Sabati dinana ai gorere tauna ia hanamoa karana amo taravatu ia utua. Unai neganai, Iesu ia gwau: “Egu Tamana be ia gaukara noho ema bona hari, bona lau danu lau gaukara noho.”​—Ioane 5:17.

Iesu ese ia karaia karana be Dirava ena Sabati taravatuna ia utua lasi. Ia karaia haroro gaukara bona gorere hanamoa karadia amo Dirava ena kara namodia ia tohotohoa. Unai dainai dina ta ta ai Iesu be kara namodia ia karaia. To iena haere dainai, ena inai taudia idia badu dikadika, bona ia hamasea dalana idia tahua. Dahaka dainai?

Idia gwau Iesu ese Sabati ai gorere taudia ia hanamoa karana amo Sabati taravatuna ia utua. Unai sibona lasi, Iesu ia gwau ia be Dirava ena Natuna neganai, idia badu dikadika. Idia laloa ia ese Dirava ena ladana ia hadikaia, badina ia gwau Dirava be iena Tamana. Idia laloa Iesu ia ura ia sibona be Dirava hegeregerena ai ia lao. To Iesu ia gari lasi bona iena hetura karana Dirava ida ia herevalaia, ia gwau: “Tamana ese Natuna ia lalokau henia dainai, ia karaia gaudia ibounai be ia dekenai ia hahedinaraia.”​—Ioane 5:20.

Tamana be Mauri Henia Tauna, bona gunaguna unai ia hamomokania, ia ese tatau haida dekenai siahu ia henia bona mase taudia idia hatorea isi lou. Iesu ia gwau: “Tamana ese mase taudia ia hatorea isi lou bona mauri ia henia, Natuna danu be ia ura henia taudia dekenai mauri ia henia.” (Ioane 5:21) Unai hereva ese vaira nega totona helaro ia henia! Hari danu, Dirava ena Natuna be laulau dalanai mase taudia ia hatoreaisi lou noho. Unai dainai Iesu ia gwau: “Bema tau ta be egu hereva ia kamonai bona lau ia siaia Tauna ia abidadama henia, unai tauna ese mauri hanaihanai do ia abia. Ia be hahemaoro do ia abia lasi, to mase amo do ia hanaia lao mauri dekenai.”​—Ioane 5:24.

Iesu be unai ia gwauraia neganai, mase tauna ta ia do hatorea isi lou lasi, to ia idia badu henia taudia ia hamaoroa, toreisi lou be do ia vara momokani. Ia gwau: “Nega ta ia mai noho, gara gabudia ai idia noho taudia ibounai ese ena gadona do idia kamonai bona do idia raka-lasi.”​—Ioane 5:28, 29.

Ena be Iesu ena dagi be bada, to ia hahedinaraia ia be Dirava ena siahu henunai ia gaukara, ia gwau: “Lau sibona egu ura dekenai gau ta lau karaia diba lasi. . . . Lau sibona egu ura lau badinaia lasi, to lau ia siaia tauna ena ura lau badinaia.” (Ioane 5:30) Iesu ese ena maduna Dirava ena ura hagugurua karana dekenai ia herevalaia, guna taunimanima vairanai unai ia herevalaia lasi. To Iesu idia inai henia taudia be unai idia diba vadaeni. Unai dainai Iesu ese ia hamaorodia: “Umui ese Ioane [Bapatiso] dekenai taunimanima umui siaia, bona ia be hereva momokani ia gwauraia hedinarai.”​—Ioane 5:33.

Reana lagani rua gunanai, Iesu ena inai taudia be unai idia kamonai. Ioane ese Iuda tomadiho gunalaia taudia ia hamaoroa, ia murinai do ia mai Tauna, be do idia gwauraia “Peroveta tauna” bona “Keriso.” (Ioane 1:20-25) Guna taunimanima ese Ioane idia matauraia, to gabeai idia hadiburaia. Unai dainai Iesu ia gwau: “Nega sisina lalonai umui ura iena diari lalonai umui moale bada.” (Ioane 5:35) To Iesu ia karaia gaukarana ese Ioane Bapatiso ena ia hereaia.

Iesu ia gwau: “Gau ta [ia karaia gorere hanamoa karana danu] amo lau hamomokania Tamana be lau ia siaia.” Ma ia gwau: “Tamana, lau  ia siaia tauna, ese lau ia gwauraia hedinarai.” (Ioane 5:36, 37) Hegeregere, Iesu ia bapatiso neganai, Dirava ese ia gwauraia hedinarai iena Natuna ia lalonamo henia.​—Mataio 3:17.

Momokani, Iesu idia inai henia taudia be ia idia dadaraia kava. Idia duahia Toretore Helagadia ese Iesu ia gwauraia hedinarai. Unai dainai Iesu ia gwau: “Bema Mose umui abidadama henia, lau do umui abidadama henia, badina ia ese egu sivarai ia torea. To bema iena toretore umui abidadama henia lasi, edena bamona egu hereva do umui abidadama henia?”​—Ioane 5:46, 47.