Lebuh sekeda orang Judah nuduh Jesus ngelanggar Adat Hari Sabat ketegal iya udah ngeraika siku lelaki ke sakit, Jesus madahka: “Apai aku agi gawa nyentuk ke diatu. Lalu aku pan agi gawa.”—John 5:17.

Kebendar iya, Jesus enda ngelanggar Adat Hari Sabat. Iya neladan pemanah Petara lebuh iya nginjil sereta ngeraika orang ke sakit. Nya alai Jesus terus ngereja pengawa ti manah ninting hari. Tang, saut ari Jesus ngasuh orang Judah balat agi ringat, lalu sida deka munuh iya. Nama kebuah?

Sebedau tu, sida udah ngumbai Jesus ngelanggar Adat Hari Sabat. Tang kelimpah ari nya, sida majak agi ringat ketegal Jesus madahka diri Anak Petara. Ba sida, Jesus benung bejaku ngelaban Petara, laban iya baka ka ngumbai diri sebaka enggau Petara. Taja pia, Jesus enda takutka sida. Lalu iya nerangka mayuh agi ngagai sida pasal kaul ti istimewa entara iya enggau Petara. Ku iya: “Apai rinduka Anak, lalu mandangka semua utai ti dikereja Iya ngagai Anak.”—John 5:20.

Petara nya Pun pengidup. Suba, Petara kala nunjukka kuasa Iya lebuh Iya nulung nembiak Iya ngambika sida ulih ngidupka baru orang ke udah mati. Ku Jesus: “Baka Apai ke ngidupka orang ari mati, Anak mega deka ngidupka barang sapa ke dikedekaka iya ari mati.” (John 5:21) Jaku Jesus besai reti ba kitai, laban nya meri harapan ke kitai ba jemah ila! Lalu diatu pan, Jesus benung ngidupka baru orang ke udah mati secara rohani. Nya alai, Jesus madahka: “Orang ke ninga jaku aku lalu arapka Iya ti udah ngirumka aku, bulih pengidup ti meruan belama iya. Iya enda diakim, tang iya udah mindah ari pemati, lalu bulih pengidup.”—John 5:24.

Maya nya, ayat Bup Kudus bedau agi nulis pasal Jesus ngangkatka orang mati. Tang iya madah ngagai orang ba dia, pengangkat ari mati tentu deka nyadi. Iya madahka: “Maya deka datai alai semua orang ke ba dalam kubur deka ninga nyawa iya, lalu pansut.”—John 5:28, 29.

Taja pan peranan Jesus amat penting, tang iya nunjukka diri baruh agi ari Petara. Ku Jesus: “Aku enda ulih ngereja nama-nama utai nitihka peneka aku empu. Aku enda nitihka peneka aku empu, tang nitihka peneka Iya ke udah ngirumka aku.” (John 5:30) Tu keterubah kali Jesus nyebut ba mua orang mayuh pasal peranan iya bekaul enggau tuju Petara. Jesus mega ngingatka sida, suba mega bisi orang bukai kala besaksi pasal pekara tu. Ku iya: “Kita udah nganjung orang ngagai John [Pemaptisa], lalu John udah meri saksi ti bendar.”—John 5:33.

Kira-kira dua taun sebedau utai nya nyadi, sida ke nyakal Jesus nemu John kala madah ngagai bala tuai pengarap orang Judah pasal siku orang deka datai pengudah iya. Orang nya dikumbai siku “Nabi” sereta “Kristus.” (John 1:20-25) Jesus mega ngingatka baru pasal sida empu kala bebasaka John ke benung dijil diatu. Ku Jesus: “Kita ingin deka gaga ati dalam penampak iya enda lama.” (John 5:35) Taja pia, jaku sereta pengawa Jesus nyadika saksi ti terang agi ari utai ke kala dipadah John Pemaptisa.

Jesus madahka, “Pengawa nya [nyengkaum pengawa ngeraika orang ke baru digaga Jesus] nyadi saksi ke nunjukka aku udah dikirum Apai. Apai ke ngirumka aku mega udah meri saksi pasal aku.” (John 5:36, 37) Ambika chunto, Petara udah meri saksi pasal Jesus lebuh iya dibaptisa.—Matthew 3:17.

 Kebendar iya, sida ke nuduh Jesus nadai kebuah enggai nerima iya. Sida ngumbai diri mansik ayat Bup Kudus. Tang iya ke amat, ayat Bup Kudus endang besaksi pasal Jesus. Nya alai Jesus madahka: “Enti kita arapka Moses, kita tentu arapka aku, laban iya nulis pasal aku. Tang enti kita enda arapka utai ti ditulis iya, baka ni ku kita deka arapka jaku aku?”—John 5:46, 47.