Ĩvinda yĩla Ayuti maisye kana Yesũ nũtũlĩte mwĩao wa Savato kwa kũvosya mũndũ mũthenya ũsu, amasũngĩie amea atĩĩ: “Asa wakwa nĩwĩthĩĩtwe aitethya wĩa nginya o na yu, o nakwa nĩendeee na kũtethya wĩa.”—Yoana 5:17.

Yĩla Yesũ wavoisye mũndũ mũthenya wa Savato ndaatũla mwĩao ũla Ngai wanenganĩte ĩũlũ wa Savato. Vandũ va ũu, yĩla watavanasya na kũvosya andũ aatĩĩe ngelekany’o nzeo ya Ĩthe wake ya kwĩka mawĩa maseo. Kwoou Yesũ nĩweekaa maũndũ maseo kĩla mũthenya. Ĩndĩ ve ũndũ Yesũ watavisye Ayuti na watuma mathata mũno o na kũvĩtũka ũndũ mathatie yĩla wavoisye ũla mũndũ waĩ mũwau. Ũndũ ũsu wamatavisye nĩwatumie menda kũmũaa. Kyo nĩ kyaũ kyatumie mathata mũno wĩana ũu?

O na kau mbeenĩ nĩmathatie nũndũ moonaa Yesũ nũtũlĩte mwĩao wa Savato kwa kũvosya andũ mũthenya ũsu, nĩmathatie mũnango yĩla Yesũ waisye kana nĩ Mwana wa Ngai. Ndeto isu syatumie Ayuti asu mona ta ũkwĩyĩanany’a na Ngai, na ũu watuma mamwĩa kana nũkũmũuma Ngai. Ĩndĩ o na vailyĩ ũu Yesũ ndaatelema, vandũ va ũu, amaeleisye mũnango ĩũlũ wa ngwatanĩo ya mwanya ĩla waĩ nayo na Ngai. Ameie atĩĩ: “Asa nũmwendete Mwana na nũmwonasya maũndũ onthe ala we mwene wĩkaa.”—Yoana 5:20.

Asa nĩwe Mũnengani wa thayũ, na nĩwoonanisye ũu ĩvinda yĩla wanengete athũkũmi make ma tene ũtonyi wa kũthayũũkya. Kwoou Yesũ aendeeie kwasya atĩĩ: “O tondũ Asa ũthayũũkasya ala akw’ũ na kũmanenga thayũ, now’o o nake Mwana ũmũnengae thayũ mũndũ o na wĩva ũla we ũkwenda.” (Yoana 5:21) Ndeto isu sya Yesũ syaĩ sya vata mũno nũndũ nĩsyanengie andũ wĩkwatyo wa ĩvinda yũkĩte! O na ũmũnthĩ, Mwana nũthayũũkasya ala akw’ũ kwa nzĩa ya kĩ-veva. Nĩkyo kĩtumi waisye atĩĩ: “Mũndũ o na wĩva ũla wĩw’aa ndeto syakwa na aimũĩkĩĩa Ũla wandũmie e na thayũ wa tene na tene, na ndasilĩlawa ĩndĩ nũvĩtĩte kuma kĩkw’ũnĩ akalika thayũnĩ.”—Yoana 5:24.

Maandĩko maiwetete kana Yesũ aĩ aathayũũkya mũndũ yĩla wawetaa ndeto isu, ĩndĩ atavisye Ayuti kana akathayũũkya andũ. Ameie atĩĩ: “Saa nĩwũkĩte yĩla ala onthe me mbũanĩ makew’a wasya wake namo makauma.”—Yoana 5:28, 29.

O na kũtw’ĩka Yesũ aĩ na kĩanda kĩnene, nĩwoonanisye ũtheinĩ kana nĩ mũnini kwĩ Ngai yĩla waisye atĩĩ: “Nditonya kwĩka ũndũ o na ũmwe kumana na ũtwi wakwa mwene. . . . Nũndũ nĩmanthaa kwĩka kwenda kwa ũla wandũmie, ĩndĩ ti kwenda kwakwa mwene.” (Yoana 5:30) Yesũ nĩwaeleisye ĩũlũ wa kĩanda kyake kya mwanya nthĩnĩ wa kwĩanĩw’a kwa kĩeleelo kya Ngai, kĩla o na kũvika saa ũsu ũtambĩte kũkyonany’a ũtheinĩ kwa nzĩa ya mwanya. Ĩndĩ Ayuti asu maĩ na ũkũsĩ mwingĩ ĩũlũ wa Yesũ kuma kwa mũndũ ũngĩ. Na nĩkyo kĩtumi Yesũ wameie atĩĩ: “Nĩmwatũmie andũ kũla kwĩ Yoana [Mũvatisi], nake aumya ũkũsĩ ĩũlũ wa ũla w’o.”—Yoana 5:33.

Nĩvatonyeka andũ ala mamũneeneaa Yesũ naĩ makethĩwa meew’ĩte ĩũlũ wa ũndũ Yoana watavĩtye atongoi ma ndĩni ya Kĩyuti myaka ĩlĩ yaĩ ĩnavĩta ĩũlũ wa ũla waĩ oke ĩtina wake, nake eetawa “Mwathani” kana “Klĩsto.” (Yoana 1:20-25) Yesũ aimalilikany’a ĩũlũ wa ũndũ manengete Yoana ndaĩa, ũla ĩvindanĩ yĩĩ waĩ mwove, aisye atĩĩ: “Kwa ĩvinda ĩkuvĩ nĩmwendaa kũtanĩa mũno kyeni kyake.” (Yoana 5:35) Ĩndĩ Yesũ nĩwaumisye ũkũsĩ mũnenange kwĩ Yoana Mũvatisi.

Yesũ ameie atĩĩ: “Mawĩa aa nĩendeee kũtethya [vamwe na kyama kya kũvosya kĩla waĩ aneeka], nĩmeũkũsĩĩa kana Asa nĩwandũmie.” Aendeeie kũmatavya ndeto ii: “Asa ũla wandũmie nĩwumĩtye ũkũsĩ we mwene ĩũlũ wakwa.” (Yoana 5:36, 37) Kwa ngelekany’o, Ngai nĩwaumisye ũkũsĩ  ĩũlũ wa Yesũ ĩvinda ya ũvatiso wake.—Mathayo 3:17.

Vate nzika, andũ ala mamũneeneaa Yesũ naĩ mayaĩ na kĩtumi kya kũmũlea. Maandĩko ala masomaa nĩmaumasya ũkũsĩ ĩũlũ wa Yesũ. Nĩkyo kĩtumi wameie atĩĩ: “Ta kethĩwa nĩmwamũĩkĩĩie Mose, no mũndĩkĩĩe, nũndũ nĩwaandĩkie ĩũlũ wakwa. Ĩndĩ ethĩwa mũikũĩkĩĩa maũndũ ala waandĩkie, mũkaĩkĩĩa ata maũndũ ala ngũneena?”—Yoana 5:46, 47.