Eshi Ovajuda vamwe va li va lundila Jesus kutya okwa nyona Omhango i na sha nEshabata, eshi a velula omulumenhu, okwe va nyamukula a ti: “Tate ota longo fiyo opaife, naame ohandi twikile okulonga.” — Johannes 5:17.

Osho Jesus a ninga kasha li omhinge nOmhango yaKalunga i na sha nEshabata. Oilonga yaye yokuudifa nokuvelula oi li onghedi yokuhopaenena oilonga iwa yaKalunga. Onghee Jesus ota twikile okulonga oilonga iwa efiku keshe. Enyamukulo laye ola li la handukifa ovalundili vaye neenghono shi dulife nale, nova li tava kendabala oku mu dipaa. Omolwashike va li ve linyenga ngaho?

Nonande ova li va handuka eshi a velula ovanhu mefiku lEshabata, natango ova ka handuka unene eshi a popya kutya ye Omona waKalunga. Ova li ve shi tala ko kutya okwa nyona eshi a ti kutya ye Omona waKalunga, nova li ve udite a fa ta ti oku fike pamwe naKalunga. Ndele nande ongaho, Jesus ka li a tila oku va nyamukula shi na sha nekwatafano le likalekelwa olo e na naKalunga. Okwa ti: “Xe oku hole Omona, ohe mu ulikile oinima aishe oyo a longa.” — Johannes 5:20.

Kalunga, oo e li Omuyandjimwenyo, okwe shi ulika monakudiwa eshi a li a pa ovalumenhu eenghono dokunyumuna vamwe. Jesus okwa weda ko a ti: “Ngaashi ashike Xe ha nyumuna oonakufya, Omona naye oha nyumuna keshe oo a hala okunyumuna.” (Johannes 5:21) Eendjovo odo otadi ti sha, notadi tu pe eteelelo li na sha nonakwiiwa! Nokunena, Jesus ota nyumuna ovafi meityo lopamhepo. Nomolwaasho Jesus a ti: “Keshe ou ta udu eendjovo dange ndele ta itavele ou a tuma nge oku na omwenyo waalushe; ita ka tokolwa, ndele ota kala ngaashi omunhu oo a li a fya nokwa nyumuka.” — Johannes 5:24.

Pefimbo olo, Jesus ka li natango a nyumuna omunhu, ashike okwa li a lombwela ovalundili vaye kutya otaku ka kala enyumuko lashili. Okwa ti: “Osheshi efimbo otali uya eshi aveshe ovo ve li meembiladimbuluko tava ka uda ondaka yaye, ndele tava di mo.” — Johannes 5:28, 29.

Nonande Jesus ota dana onghandangala ye likalekelwa, okwe shi yelifa kutya ke fike pamwe naKalunga, eshi a ti: “Ihandi longo sha pahalo lange. . . . ihandi longo ehalo lange, ndele ehalo laTate ou a tuma nge.” (Johannes 5:30) Ashike nande ongaho, Jesus okwa yelifa onghandangala oyo a li ta ka dana mokuwanifwa kwelalakano laKalunga, nonande ka li e shi ulika natango moipafi. Ndele ovalundili vaJesus ova li ve na oumbangi muhapu u na sha noinima oyo a ninga nale. Okwa li e va dimbulukifa a ti: “Omwa tumine ovanhu kuJohannes [Omuninginifi], nokwe va hepaululila oshili.” — Johannes 5:33.

Hanga oule weedula mbali lwaapo da tetekela, ovalundili vaJesus otashi dulika va li va uda kutya Johannes okwa li a lombwela ovawiliki velongelokalunga lOshijuda kombinga yaao ta di konima yaye, oo ta ifanwa “Omuprofeti” nosho yo “Kristus.” (Johannes 1:20-25) Natango, Jesus okwa li a dimbulukifa ovalundili vaye shi na sha naJohannes oo a li modolongo, a ti: ‘Omwa li tamu hafele neenghono ouyelele waye oule wokafimbo.’ (Johannes 5:35) Ashike Jesus okwa hepaulula shihapu e dule Johannes Omuninginifi.

Jesus okwa ti: “Osheshi oilonga ei handi longo [mwa kwatelwa okuvelula oko a ninga] onde i pewa kuTate, notai yandje oumbangi kutya onda tumwa kuTate.” Kakele kaasho, okwa weda ko vali a ti: “Tate ou a tuma nge okwa hepaulula kombinga yange.” (Johannes 5:36, 37) Pashihopaenenwa,  Kalunga okwa hepaulula kombinga yaJesus peninginifo laye. — Mateus 3:17.

Onghee hano, ovo va li tava lundile Jesus kava li ve na elipopilo lokuhe mu itavela. Omishangwa odo va li hava konakona oda popya kombinga yaJesus. Jesus okwa li e va lombwela pexulilo a ti: “Ngeenge omwa itavela Moses, ngeno omu na yo okukala mwa itavela nge, osheshi okwa shanga kombinga yange. Ndele ngeenge inamu itavela osho a shanga, ongahelipi tamu ka itavela osho handi popi?” — Johannes 5:46, 47.