30-تاراۋ
يسانىڭ اكەسىمەن قارىم-قاتىناسى
-
قۇداي — يسانىڭ اكەسى
-
قايتا ٴتىرىلتۋ بولاتىنىن ۋادە ەتتى
ياھۋديلەر يسانى دەمالىس كۇنى ادام ساۋىقتىرعانى ٷشىن ايىپتاعاندا، يسا: «اكەم ەڭبەك ەتۋدى دوعارعان جوق، مەن دە ەڭبەك ەتۋدەمىن»،— دەدى (جوحان 5:17).
يسانىڭ بۇل ٸسى قۇدايدىڭ دەمالىس كۇنىنە قاتىستى زاڭىنا قايشى كەلمەدى. ۋاعىزداۋ جانە ادامداردى ساۋىقتىرۋ ارقىلى ول جاقسىلىق جاسايتىن قۇدايعا ەلىكتەدى. سوندىقتان يسا كۇن سايىن جاقسىلىق جاساۋىن دوعارمادى. الايدا يسانىڭ جاۋابىنا ايىپتاۋشىلار ودان بەتەر اشۋلانىپ، ونى ولتىرگىسى كەلدى. سونشالىق اشۋلانۋعا نە سەبەپ بولدى؟
ادام ساۋىقتىرۋىمەن يسا دەمالىس كۇنىنە قاتىستى ەرەجەنى بۇزدى دەگەن قاتە پىكىردە بولعاندارىمەن قويماي، ولار تاعى يسانىڭ قۇداي ۇلىمىن دەگەنىنە قاتتى نارازى بولدى. يسا ەحوبانى اكە دەۋىمەن ٶزىن ونىمەن تەڭەستىرىپ، قۇدايدى قورلاپ تۇر دەپ ەسەپتەدى. سوعان قاراماستان يسا قۇدايمەن ەرەكشە قارىم-قاتىناسى جايلى باتىل جاۋاپ بەردى. «اكەسى ۇلىن جاقسى كورەدى،— دەدى ول،— ٵرى وعان ىستەرىنىڭ بارلىعىن كورسەتەدى» (جوحان 5:20).
كوكتەگى اكە — ٶمىر بەرۋشى، ول مۇنى بۇرىنعى زاماندا قىزمەتشىلەرىنە ادامدى قايتا تىرىلتۋگە قۇدىرەت بەرۋىمەن كورسەتكەن. يسا ٴسوزىن جالعاپ: «اكەسى ولىلەردى ٴتىرىلتىپ، ولارعا ٶمىر بەرەتىنى سياقتى، ۇلى دا قالاعان ادامىنا ٶمىر بەرەدى»،— دەدى (جوحان 5:21). بولاشاققا ٷمىت سىيلايتىن قانداي كەرەمەت سوزدەر! قازىردىڭ وزىندە قۇدايدىڭ ۇلى ادامداردى رۋحاني ماعىنادا قايتا تىرىلتۋدە. سول سەبەپتى ول: «مەنىڭ سوزىمدى ەستىگەن ٵرى مەنى جىبەرگەنگە سەنگەن اركىم ماڭگىلىك ومىرگە يە. ول سوتتالمايدى، قايتا، ولىمنەن ومىرگە ٶتتى»،— دەدى (جوحان 5:24).
يسانىڭ وسىعان دەيىن ولگەن ادامدى ومىرگە قايتارعانى جايلى ەشتەڭە ايتىلماعان. الايدا ول ايىپتاۋشىلارىنا بولاشاقتا تۋرا ماعىنادا قايتا تىرىلۋدىڭ بولاتىنى جايلى: «قابىردەگىلەردىڭ ٴبارى ونىڭ داۋسىن ەستيتىن ۋاقىت كەلە جاتىر»،— دەدى (جوحان 5:28، 29).
يسا ەرەكشە بيلىگى بولسا دا، قۇدايعا باعىنىشتى ەكەنىن انىق ەتىپ: «مەن ٶز بەتىمشە ەشتەڭە ىستەي المايمىن... ٶزىمنىڭ ەمەس، مەنى جىبەرگەننىڭ ەركىن ورىنداۋدى قالايمىن»،— دەدى (جوحان 5:30). سونداي-اق يسا قۇدايدىڭ نيەتىندەگى ماڭىزدى رولىن ٴتۇسىندىردى. بۇل جايلى ول بۇرىن-سوڭدى كوپشىلىكتىڭ الدىندا اشىق ايتپاعان ەدى. الايدا ايىپتاۋشىلارعا يسانىڭ سوزدەرىنەن باسقا دا كۋالىك بەرىلگەن بولاتىن. سونى ەستەرىنە سالىپ، يسا: «سەندەر جاقياعا ادامدارىڭدى جىبەردىڭدەر، ول مەن تۋرالى شىنايى كۋالىك بەردى»،— دەدى (جوحان 5:33).
يسانىڭ ايىپتاۋشىلارى شامامەن ەكى جىل بۇرىن جاقيانىڭ ياھۋدي ٴدىنباسىلارىنا وزىنەن كەيىن كەلە جاتقان ادام جايلى — «پايعامبار» جانە «ٴماسىح» جايلى — ايتقانىن ەستىگەن بولۋ كەرەك (جوحان 1:20—25). قازىر تۇرمەدە جاتقان جاقيانى ولار ٴبىر كەزدەرى قادىرلەگەنىن ەستەرىنە سالىپ، يسا: «سەندەر ونىڭ جارىعىندا از ۋاقىت قانا شاتتانعىلارىڭ كەلدى»،— دەدى (جوحان 5:35). الايدا يسانىڭ بەرگەن كۋالىگى جاقيانىكىنەن الدەقايدا زور.
«ٶزىم ىستەپ جاتقان ىستەر [الگىندە عانا جاساعان ساۋىقتىرۋ ٸسى دە] مەنى اكەمنىڭ جىبەرگەنىنە كۋالىك ەتەدى»،— دەدى يسا. سوسىن: «مەنى جىبەرگەن اكەم دە مەن تۋرالى كۋالىك ەتكەن»،— دەپ قوستى (جوحان 5:36، 37). مىسالى، يسا شومىلدىرۋ راسىمىنەن وتكەندە، قۇداي كوكتەن داۋىستاپ كۋالىك ەتكەن بولاتىن (ماتاي 3:17).
راسىندا دا، ايىپتاۋشىلاردىڭ يسانى مويىنداماعانىن اقتاۋعا بولمايدى. ولار مۇقيات زەرتتەيمىز دەپ جۇرگەن جازبالاردا يسا جايلى كۋالىك ەتىلگەن. سوندىقتان يسا: «ەگەر مۇساعا سەنسەڭدەر، ماعان دا سەنەر ەدىڭدەر. ويتكەنى ول مەن تۋرالى جازعان. ال ونىڭ جازعاندارىنا سەنبەسەڭدەر، وندا مەنىڭ ايتقاندارىما قالاي سەنەسىڭدەر؟» — دەپ ٴسوزىن اياقتادى (جوحان 5:46، 47).