Majuda babañwi habanyaza Jesu kuli uloba Mulao wa Sabata ka kufolisa mutu, Jesu ubaalaba kuli: “Ndate uzwezipili kusebeza kufitela cwale, mi ni na nizwelapili kusebeza.”—Joani 5:17.

Zaeza Jesu halisika haniswa mwa mulao wa Mulimu obulela ka za Sabata. Musebezi wahae wa kuluta ni kufolisa uueza ka kulikanyisa misebezi yeminde ya Mulimu. Ka mukwa ocwalo, Jesu uzwelapili kueza zende zazi ni zazi. Nihakulicwalo, kalabo ya Jesu inyemisa hahulu bahanyezi bahae, kuli mane babata kumubulaya. Ki kabakalañi habaeza cwalo?

Kwandaa mubonelo ofosahalile obanani wa kuli Jesu uloba mulao wa Sabata ka kufolisa batu, hape bafilikanywa maswe ki taba ya kuli ubulezi kuli ki Mwanaa Mulimu. Baanga kuli wanyefula habiza Mulimu kuli ki Ndatahe; banahana kuli Jesu habulela kuli Jehova ki Ndatahe kuswana feela inge kuli waitikanya ku Mulimu. Nihakulicwalo, Jesu hasabi mi uzwelapili kubaalaba ka nzila yebonisa kuli ki Mwanaa Mulimu. Uli: “Ndate ulata Mwana mi umubonisa lika kaufela zaeza.”—Joani 5:20.

Ndate ki Mufani wa Bupilo, mi ubonisize cwalo kwamulaho ka kufa batu maata a kuzusa kwa bafu batu babañwi. Jesu uekeza kuli: “Sina Ndate hazusa babashwile ni kubapilisa, ni Mwana ni yena upilisa mutu ufi kamba ufi yabata kupilisa.” (Joani 5:21) Manzwi ao ki a butokwa hahulu. Afa sepo ya zekaezahala kwapili! Nihaiba ka nako ye, Mwanaa usweli kutusa batu kuba ni silikani ni Mulimu. Ka mukwa ocwalo, Jesu uli: “Mutu kaufela yautwa linzwi laka ni kulumela yanilumile unani bupilo bobusa feli, mi haatulwi kono uzwile kwa lifu ni kutaha kwa bupilo.”—Joani 5:24.

Hakuna taba yebonisa kuli Jesu ki kale azusa mutu yanaashwile, kono ubulelela bahanyezi bahae kuli zuho ya bafu ituha iezahala. Ubulela kuli: “Nako yataha muta batu kaufela babali mwa mabita a kupulo bakautwa linzwi lahae ni kuzwa mwateñi.”—Joani 5:28, 29.

Kusina taba ni buikalabelo bobutuna bwanani bona Jesu, ubonisa fokusweu kuli ki yomunyinyani ku Mulimu, ka kubulela kuli: “Hanikoni kueza nto niyekana ka ili na. . . . hanibati kueza sesilatwa ki na, kono nibata kueza sesilatwa ki yanilumile.” (Joani 5:30) Nihakulicwalo, Jesu utalusa buikalabelo bwapeta mwa mulelo wa Mulimu, ili taba yasika taluseza kale batu patalaza kuto fita cwale. Kono bahanyezi bahae banani bupaki bobuñata ka za taba yeo. Jesu ubahupulisa kuli: “Mulumile batu ku Joani [Mukolobezi], mi upakile niti.”—Joani 5:33.

Bahanyezi ba Jesu mwendi nebautwile ka za taba yeo, lilimo zepeli kwamulaho, Joani naabulelezi baeteleli ba bulapeli bwa Sijuda ka za Yataha mwamulaho wahae—yanaabizwa “Mupolofita” ni “Kreste.” (Joani 1:20-25) Ka kuhupulisa bahanyezi bahae ka za Joani yene bakuteka hahulu ili ya mwa tolongo, Jesu uli: “Ka nakonyana nemutabela kunyakalala hahulu mwa liseli lahae.” (Joani 5:35) Ka mukwa ocwalo, Jesu mane ufa bupaki bobutuna hahulu kufita bwanaafile Joani Mukolobezi.

“Misebezi . . . yenieza [yekopanyeleza ni kufolisa kwasazo eza], ipaka kuli Ndate ki yena yanilumile.” Kutuha fo, Jesu uekeza kuli: “Ndate yanilumile upakile zaka yena kasibili.” (Joani 5:36, 37) Ka mutala, Mulimu naapakile Jesu ka nako ya kolobezwa.—Mateu 3:17.

Kaniti, bahanyezi ba Jesu habana libaka la kumulatula. Mañolo eba ipapata kuli baabala, apaka ka zahae. Jesu ubulela kuli: “Kambe nemulumezi Mushe, nemuka nilumela, kakuli naañozi zaka. Kono haiba hamulumeli zanaañozi, mukalumela cwañi zenibulela?”—Joani 5:46, 47.