Bayuda bamo pa kupwa kutopeka Yesu amba watyumuna dya Sabato na kubelula ubela, Yesu webalondolola’mba: “Tata wingilanga’nka kwingila kufika ne pano pene, ne ami nami ñingilanga’nka kwingila.”​—Yoano 5:17.

Aa, byobya byalonga Yesu kebipelejibwepo na bijila bya Leza bitala pa dya Sabato. Kusapula ne kubelulañana i mingilo miyampe yaingila mwanda wa kwiula Shandi. Yesu uloñanga biyampe difuku ne difuku. Ino malondololo aalondolola bamutopeka’ba, abebalobeja bininge kebakimbe ne kumwipaya. Mwanda waka abalobe?

Kutentekela pa mumweno munyengakane wa amba utyumunanga dya Sabato na kubelula bantu, abafītwa bininge petela Yesu amba i Mwanā Leza. Abamone amba Yesu utukanga Leza pa kumutela bu Shandi, amba paita Yehova bu Shandi udi pamo bwa wikandija mu ludingo lwa Leza. Inoko, Yesu webalondolola moyo mpika na kwibalombola kipwano kyandi kya pa bula na Leza. Wanena’mba: “Tata usenswe Mwana kisanso kikatampe kadi umulombolanga bintu byonso byalonga aye mwine.”​—Yoano 5:20.

Tata ye Upāna būmi, wālombwele kino na kupa bantu bukomo bwa kusangula bafwile. Yesu wabweja’ko amba: “Monka musangwilanga Tata bafwe ne kwibekadija ke bōmi, ne Mwana nandi wikadijanga yewa ense wasakile ke mūmi.” (Yoano 5:21) Bine bino i binenwa biyampe bileta lukulupilo lwa mafuku a kumeso! Nansha ke pano, Mwana usangulanga bantu mu muswelo wa ku mushipiditu. O mwanda Yesu wanena’mba: “Yewa ense wivwana kinenwa kyami ne kwitabija Yewa wauntumine udi na būmi bwa nyeke, kadi kāyangapo mu butyibi ino wataluka ku lufu waenda ku būmi.”​—Yoano 5:24.

Kufika pano, kwadi kekwaikele bilembwa bilombola’mba Yesu kemujokeje muntu ku būmi, ino wasapwila bamutopeka amba lusangukilo lumweke lukekala’ko. Wanena’mba: “Nsá īyanga, boba bonso badi mu bibundu bakevwana diwi dyandi ne kutamba bakatamba’mo.”​—Yoano 5:28, 29.

Mwingilo wa Yesu i wa kutendelwa, walombola patōka’mba udi munshi mwa Leza, amba: “Nkikokejapo kulonga kintu nansha kimo na milangwe ya ami mwine. . . . , ke kiswa-mutyimapo kya ami mwine, ino i kiswa-mutyima kya yewa wantumine.” (Yoano 5:30) Inoko Yesu washintulula mwingilo wandi mu mpango ya Leza, mu muswelo wa kashintulwile’byo kashā patōkelela. Ino boba batōpeka Yesu abamwena’ko bukamoni bukwabo pa bino bintu. Yesu webavuluja’mba: “Mwatumine bantu kudi Yoano [Mubatyiji], nandi wasapula bukamoni bwa bubine.”​—Yoano 5:33.

Boba batōpeka Yesu ye bano kebevwane amba myaka ibidi kunyuma, Yoano wasapwidile bendeji ba bipwilo bya Bayuda myanda ya Yewa wiya kunyuma kwandi​—wātelelwe bu “Mupolofeto” ne bu “Kidishitu.” (Yoano 1:20-25) Yesu wanena pa kuvuluja bamutōpeka’ba Yoano mukutwe mwine obalēmekele bininge, amba: “Mu kakitatyi katyetye mwasakile kusepelela bininge mu kitōkeji kyandi.” (Yoano 5:35) Ino aye waleta bukamoni bukatampe kupita bwa Yoano Mubatyiji.

Kutentekela pa bino Yesu wabweja’ko amba: “Ino mingilo yononga’i [kubadila’mo ne kubelula babela kwalongele], isapulanga bukamoni amba i Tata untumine. Kadi, Tata untumine i musapule bukamoni pa mwanda wami.” (Yoano 5:36, 37) Kimfwa, Leza wasapwile bukamoni pa kubatyijibwa kwa Yesu.​—Mateo 3:17.

Na bubine, boba batōpeka Yesu kebadipo na bubinga bwa kumupelela. Bisonekwa byobanena’mba ye byobatañanga bileta bukamoni padi. Yesu wafudija na kunena’mba: “Shi mwadi mwitabije Mosesa longa mubangitabija ne ami, mwanda aye wālembele myanda yami. Ino shi kemwitabijepo bilembwa byandi, le muketabija namani byonena ami?”​—Yoano 5:46, 47.