Omu vaYuleya vamwe vavangijikilile Yesu ngwavo najilulula Sambata hakuka mutu, ikiye avakumbulwile ngwenyi: “Tata achili nakuzata lika nakulelo lino, kaha nayami nawa chinguzata lika.”—Yowano 5:17.

Milimo azachile Yesu kavayikanyishile mujishimbi jaKalunga jakupandama kuSambatako. Yesu hakwambulula nakuka vatu, apwile nakulondezeza Kalunga uze eji kuzatanga milimo yamwaza. Ngocho Yesu atwalileho lika kuzata milimo yamwaza hakumbi hakumbi. Jino mazu avakumbulwile Yesu avasulakanyishile chikuma, kaha vasakile kumujiha. Mwomwo ika?

Vasulakanyine mwomwo yavishinganyeka vyavo vyakuhenga vyakwamba ngwavo najilulula Sambata hakuka vatu, kaha nawa mwomwo yakulivuluka ngwenyi ikiye MwanaKalunga. Vamwene ngwavo nasaula Kalunga hakumuvuluka ngwenyi Ise, mwomwo chapwile kwijiva nge ali nakusaka kulyesekesa hamwe naKalunga. Chipwe ngocho, Yesu kavevwile womako, oloze ahanjikile cheka hausoko wenyi naKalunga ngwenyi: “Ise azanga Mwana, ngocho eji kumulwezanga vyuma vyosena eji kulinganga ivene.”—Yowano 5:20.

Ise apwa Muka-kuhana Kuyoya, kaha kunyima asolwele chuma kana hakuhana vatu ngolo jakusangula vafu. Yesu ambile nawa ngwenyi: “Nganomu Ise eji kusangulanga vafu nakuvayoyesa, ngocho naMwana nawa eji kuyoyesanga weshowo nasake kuyoyesa.” (Yowano 5:21) Mazu kana amwaza chiyovo mwomwo ahana lutalililo lwakulutwe. Namakumbi ano nawa, ou MwanaKalunga ali nakusangula vatu kushipilitu, kulumbununa kuvanangula muchano. Ngocho Yesu ambile ngwenyi: “Weshowo mwevwa mazu ami nakwitavila Uze angutumine ali nakuyoya chahaya myaka yosena, kaha kaveshi kumusopesako, oloze nafumu lyehi kukufwa nakuya kukuyoya.”—Yowano 5:24.

Numba tuhu halwola kana Yesu te kanda asangule mutu kuvafu, oloze alwezele vaka-kole jenyi ngwenyi kusanguka kana nachikapwako chikupu. Ambile ngwenyi: “Ola yili nakwiza omu vosena vaze vali muvimbumbe navakevwa lizu lyenyi nakulovokamo.”—Yowano 5:28, 29.

Numba tuhu Yesu akwechi milimo yayilemu muvyuma ajina Kalunga, oloze asolwele hatoma ngwenyi eji kwononokanga Kalunga hakwamba ngwenyi: “Ami kangweshi kuhasa kulilingila tuhu chumako. . . . Kangwasaka kulinga mwaya muchima wamiko, shina mwaya muchima wayauze angutumine.” (Yowano 5:30) Elu lwapwile lwola lwatete luze Yesu alumbunwine kuvatu vamuchivulu milimo atwama nayo muvyuma ajina Kalunga. Oloze vaze vapwile nakuvangijikila Yesu vapwile naunjiho wauvulu havyumevi. Yesu avanukishile ngwenyi: “Enu munatumu vatu kuli Yowano [Muka-kumbapachisa], kaha ikiye nahane unjiho wamuchano hali ami.”—Yowano 5:33.

Ava vaka-kole jaYesu vejivile kanawa ngwavo kafwe myaka yivali yinahichimo, Yowano alwezele vatwamina vamukwitava chavaYuleya vyaMutu uze apwile nakwiza munyima yenyi. Mutu kana vamuvulukile ngwavo “Kapolofweto” kaha nawa ngwavo “Kulishitu.” (Yowano 1:20-25) Hakusaka avanukise omu vamulemeselenga Yowano uze apwile jino mukamenga, Yesu ambile ngwenyi: “Enu mwasakile kuwahilila chikuma muchehya chenyi hakatando kakandende.” (Yowano 5:35) Yesu avahanyine unjiho wakutamo, keshi kupendamina kaha haunjiho waYowano Muka-kumbapachisako.

Yesu ambile ngwenyi: “Eyi milimo nguli nakuzata [kuhakilako vene nayize yakuka mutu], yili nakuhana unjiho hali ami ngwayo, Tata ikiye angutumine.” Ambile nawa ngwenyi: “Tata uze angutumine ikiye nahane unjiho hali ami.” (Yowano 5:36, 37) Chakutalilaho, Kalunga asolwele unjiho wakuvuluka Yesu hakumumbapachisa.—Mateu 3:17.

Enga, vaze vaka-kole jaYesu kavapwile nachuma chakuvalingisa vamukaneko. Mwomwo unjiho wakuvuluka ikiye muwapwile muVisoneka vize vambile ngwavo vatangilenga. Yesu akukulwile ngwenyi: “Nge mwetavilile Mose, kachi namungwitavila nayami nawa, mwomwo Mose asonekele vyayami. Oloze nge kamwetavilile mazu asonekeleko, kaha namuhasa ngachilihi kwitavila mazu ami?”—Yowano 5:46, 47.