AYudeya amakwawu chinamwinkiwu Yesu muloña wakuuka muntu hefuku daSabata, Yesu nayakuli nindi: “Tata yami wuchidi kuzata kushika niyinu mpinji, ninami nichidi kuzata.”—Yowanu 5:17.

Chuma chinakwilayi Yesu haSabata hiyachikaanisha munshimbi jaNzambiku. Chinakushimwinayi nichinakuukayi nakumwimbujola Nzambi welaña nyidimu yayiwahi. Dichi Yesu natwalekihu kuzata nyidimu yayiwahi hefuku-hefuku. Hela chochu, chinayakuliyi antu anakumwinka nyiloña, chinayileteshi kuhilila chikupu nawa anakukeña kumujaha. Muloñadi?

Kubombela hamuloña wunamwinkiwu nawu wafumpaña Sabata kuhitila mukuuka antu, anamwinki muloña wukwawu cheñi nawu waditenaña nindi himwana kaNzambi. Wena amonaña nawu hakumuhosha Nzambi kasawuntu chinakumutenayi nindi hiTata yindi, chidi neyi Yesu chinakuhoshayi nindi Yehova hiTata yindi nakudesekeja naNzambi. Hela chochu, Yesu hanatiyi womaku nawa nayileji cheñi wubwambu wudi hakachi kayena naNzambi. Nindi: “Tata wamukeña Mwana, wamulejaña yuma yejima yelañayi yomweni nawa wakamuleja ninyidimu yabadika iyi, kulonda mwakahayami.”—Yowanu 5:20.

Tata diyi Mukakuhana Wumi, nawa namwekeshi chumichi kunyima kuhitila mukuyinka antu ñovu yakusañula antu. Yesu natwalekihu nindi: “Neyi chasañulañayi Tata yindi afu nakuyinka wumi, Mwana niyena dichenkañayi wumi muntu wejima anakeñiyi.” (Yowanu 5:21) Awa mazu alema nankashi nawa atwinkaña kuchiñeja! Niyinu mpinji, Mwana nakusañula antu kuspiritu. Dichi Yesu wahosheli nindi: “Inakuyileja chikupu nami, muntu wejima watiyaña izu dami nikumukuhwelela Owu wantemesheli, wukweti wumi wahaya nyaaka, nawa hiyakumusompeshaku, ilaña nafumi dehi kukufwa nakuya kuwumi.”—Yowanu 5:24.

Kushika haniyi mpinji kwosi wunsahu wunakumwekesha nawu Yesu nasañulihu muntu wudi wejimaku, ilaña nakuleja antu anakumutwika nyiloña nawu kusañuka kukekala kwoku. Nayileji nindi: “Mpinji yinakwinza hakatiyawu antu ejima adi mumajamu achanukishu izu dindi nakufumamu.”—Yowanu 5:28, 29.

Kwesekeja nachifulu chikwetiyi, Yesu nahoshi hatooka nindi wakehelamu kudi Nzambi, nahoshi nindi: “Hinnateli kudiilila chuma hela chimuku. . . . Hinelaña nkeñelu yamiku, ilaña nelaña yanowu wantemesheli.” (Yowanu 5:30) Hela chochu, Yesu wahosheli hamudimu wamwinkeliwu wakushikija nkeñelu yaNzambi nawa iyi diyi yadiña mpinji yatachi kuhosha awa mazu hadi antu amavulu. Ilaña antu anakumwinka Yesu nyiloña akweti niwunsahu hayumiyi. Yesu nayanukishi nindi: “Munatemeshi antu kudi Yowanu [Mpapatishi], nawa yena nashimuni wunsahu walala.”—Yowanu 5:33.

Antu amwinkeleña Yesu nyiloña elukili nawu kwakwihi nayaaka yiyedi, Yowanu wayilejeli akulumpi jansakililu yawaYudeya kutalisha hadi Owu wenjileña hanyima yindi, ateneneñawu nawu “Kaprofwetu” nawa “Kristu.” (Yowanu 1:20-25) Yesu nakuyanukisha antu anakumwinka nyiloña hadi Yowanu akasiliwu nindi: “Hakapinji kantesha mwakeñeleña kuzañalela nankashi muchejeji chindi.” (Yowanu 5:35) Nawa nayinki niwunsahu wukwawu kubadika waYowanu Mpapatishi.

“Iyi diyi [nyidimu] yinnakuzata [kushilahu nikuuka kunafumiyi tuhu nakuukayi], nawa diyi yinakushimuna wunsahu nawu Tata diyi wantemesheli.” Cheñi, Yesu natwalekihu nindi: “Tata wantemesheli diyi wunashimuni wunsahu hadi ami.” (Yowanu 5:36, 37) Chakutalilahu, Nzambi nashimuni wunsahu hachipapatishu chaYesu.—Matewu 3:17.

Mwamweni, antu anakumwinka Yesu nyiloña hiyakweti hakumukaaninaku. Nsona jakuhwelelawu dijinakushimuna wunsahu kutalisha hadi yena. Yesu nakunkululi namazu akwila nawu: “Neyi mwamukuhweleleli Mosi, mwadi kunkuhwelela ninami, muloña wasonekeli hadi ami. Ilaña neyi enu kukuhwelela yuma yasonekeliyi nehi, hanu dinu munateli kukuhwelela ñahi yuma yinahoshaña?”—Yowanu 5:46, 47.