Sama Jo-Yahudi moko donjo ne Yesu nikech ochango jal moro chieng’ Sabato, Yesu dwokogi kama: “Wuora osebet ka tiyo nyaka chop sani, an bende pod atiyo.”—Johana 5:17.

Adier en ni gima Yesu timo ok keth chik Nyasaye e wi Sabato. Tijene mag yalo kod chango ji nyiso ni oluwo ranyisi mar Nyasaye ma timo tije mabeyo. Omiyo, Yesu siko ka timo gik mabeyo pile ka pile. Kata kamano, dwoko mochiwo ne joma donjonego miyo jogo medo bedo gi mirima moloyo. Kendo gimanyo kaka ginyalo nego Yesu. Ang’o momiyo gimon gi Yesu kamano?

En adier ni Jo-Yahudigo neno ni Yesu ketho chik kuom chango ji chieng’ Sabato. Kata kamano, gima chwanyogie moloyo en ni Yesu luongore ni en Wuod Nyasaye. Gineno ni sama Yesu wacho ni Nyasaye en Wuon mare, mano nyiso ni ochayo Nyasaye. Chalnegi mana ni sama Yesu wacho ni Jehova en Wuon-gi, otimore owuon ni oromre gi Jehova Nyasaye. Kata kamano, Yesu ok luor kendo omedo dwokogi konyiso winjruok makende manie kinde gi Nyasaye. Owachonegi kama: “Wuoro ohero Wuode, kendo onyise weche duto ma en owuon otimo.”​—Johana 5:20.

Wuoro e Jachiw-Ngima, kendo osenyiso mano kuom miyo jomoko teko mar chiero jomotho e kinde mosekalo. Yesu medo wacho niya: “Mana kaka Nyasaye Wuoro chiero joma otho kendo omiyo gibedo mangima, e kaka Wuode bende miyo ng’ato ang’ata modwaro obed mangima.” (Johana 5:21) Donge wechego jiwowa ahinya kendo gimiyowa geno mar kinde ma biro? Kata mana gie sani, Wuod Nyasaye chiero dhano e yor ranyisi kuom konyogi bedo gi winjruok maber gi Nyasaye. Kuom mano, Yesu wachonegi kama: “Ng’at ma winjo wachna kendo ma yie kuom Jal ma ne oora nigi ngima ma nyaka chieng’, kendo ok bi ng’adne bura, to osea e tho modonjo e ngima.”​—Johana 5:24.

Nyaka chop sani onge gima nyiso ni Yesu osechiero ng’ato ang’ata e yo masie. Kata kamano, Yesu nyiso joma donjonego ni chier ma kamano biro timore gadier. Owachonegi niya: “Sa biro ma ji duto manie liete nowinj dwonde mi giniwuog oko.”—Johana 5:28, 29.

Kata obedo ni Yesu nigi migawo makende kamano, onyiso maler ni en e bwo Nyasaye. Owacho kama: “Ok anyal timo kata gimoro achiel kuom dwacha awuon. Amanyo, ok dwacha awuon, to dwaro mar jal ma ne oora.” (Johana 5:30) Kata kamano, Yesu lero migawo makende ma en-go e chopo dwach Nyasaye. Mano en gima pok otimoga ayanga kamano nyaka chop sani. Kata kamano, joma donjo ne Yesugo osebedo ka winjo wach gik motimogi, ok mana koa kuome kende. Yesu paronegi e wi Johana Jabatiso kama: “Useoro ji ir Johana kendo osechiwo neno e wi adiera.”​—Johana 5:33.

Nyalo bedo ni Jo-Yahudigo ne owinjo wechego chiegni higni ariyo motelo. Johana nosewacho ne jotend din mar Jo-Yahudi e wi Jal ma ne dhi luwo bang’e, ma ne oluong ni “Janabi” kendo ni “Kristo.” (Johana 1:20-25) Yesu paro ne joma donjonego kaka chon ne gimiyo Johana ma koro sani nie jela luor maduong’. Oparonegi kama: “Kuom kinde machuok ne udwaro bedo gi mor maduong’ e lerne.” (Johana 5:35) Yesu to chiwonegi neno e okang’ maduong’ moloyo neno ma Johana Jabatiso ne ochiwonegi.

Yesu wacho niya: “Tije ma atimogi chiwo neno ni Wuora ne oora.” Tijego oriwo nyaka chango jal ma Yesu oa chango sani. E wi mano, Yesu dhi nyime wacho kama: “Wuora ma ne oora osechiwo neno kuoma.” (Johana 5:36, 37) Kuom ranyisi, Nyasaye ne ochiwo neno sama ne obatis Yesu.​—Mathayo 3:17.

Kuom adier, Jo-Yahudigo ok onego okwed Yesu nimar gisewinjo gik mang’eny e wi Yesu. Bende, Wach Nyasaye ma giwacho ni ging’eyo  chiwo neno e wi Yesu. Yesu tieko ka wachonegi niya: “Dine uyie gi Musa dikoro uyie kuoma, nimar jalo nondiko weche kuoma. To ka ok uyie gi weche ma nondiko, ere kaka ubiro yie gi weche ma awacho?”​—Johana 5:46, 47.