Vaavaa Ayuta analocaaya Yesu wi oonanariha nihiku nawoorowa moorweela wa ompenusa mulopwana, Yesu onnaakhula: “Atithi aka annalapa mahiku othene, nave miyotho kinnalapa.”—Yohani 5:17.

Chiryene, yeeyo Yesu onapakeiye henawatiihiwa mu Nlamulo na Muluku vooloca sa nihiku Nawoorowa. Muteko awe woolaleerya ni openusa onatakiherya miteko saphaama sa Muluku. Mwawiihiiha Yesu onnatitelela opaka saphaama mahiku oothene. Naakhulo nawe wa amwiicani awe, ninnaweeriha otepa onyeenyeya opwaha muculi, nave awo annaavyaavya omwiipa Yesu. Ntakhara heeni?

Ohiya pahiru moonelo woonanara aryaayano wi Yesu onnananariha nihiku Nawoorowa moorweela wa waapenusa achu, awo annanyeenyeya vooloca sa masu awe wi owo Mwaana a Muluku. Awo anoona eyo ntoko munyemu omoona Muluku ntoko Tiithi awe, nave oloca wi Yehova Tiithi awe enakhala wi Yesu oniilikanyiha ni Muluku. Nyenya, Yesu hanoova nave onnawaakhula vooloca sa onthamwene wavameekhaaya oreiyeno ni Muluku. Owo onnaloca: “Ntakhara Atithi annamukhwela Mwana, ni annamoniha sothene aneraya.”—Yohani 5:20.

Tiithi tori Namavaha a Ekumi, nave owo ohooniherya yeela khalai moorweela wa waavaha owerya alopwana wi yaaviihe achu mookhwani. Yesu onnatitelela: ‘Ntoko Atithi anàhuhumusaya alipa òkhwa ni enàkhalihaya, navetho Mwana onnàvaha ekumi onakhweleiye.’ (Yohani 5:21) Ala masu arino yootaphulela, yaawo anavaha ewehereryo yoomwaahiyu! Naamwi hiihaano, Mwaana onnaaviiha mookhwani achu mmukhalelo woomunepani. Voocharela, Yesu onnaloca: “Onawiriyana masu aka ni onamwemererya yole okirumme, okhalano ekumi yohimala nave hanathorihiwa, nto ovira mokhwani ayaka mwekumini.”—Yohani 5:24.

Nlelo hiyaavovo yaweereya enaloca wi Yesu omviiha muchu mmahiyeni, nyenya owo onaaleela amwiicani awe wi ovinya mmahiyeni weeparipari onahaala weereya chiryene. Yesu onnaloca: “Enamurwa elukuluku atxhu othene ari mmahiyeni aneraya yiwe nsu nawe, nave anamukhumamo.”—Yohani 5:28, 29.

Yesu ookhalano muteko wootikhiniha, nave owo onnalokoha vanlakani wi eemereryiwe ti Muluku, ariki: “Mekhaka nkinawerya wera etxhu . . . nkinasya okhwela waka, nto okhwela wa yole okirumme.” (Yohani 5:30) Mwawiihiiha, Yesu onnathariha muteko awe wookhweleya mu yookhwela ya Muluku, yoowo nlelo ohipankeiye mmukhalelo wa vanlakani. Nyenya amwiicani yaale a Yesu aakhalano sincipale opwaha onamoona vooloca sa ichu seiya. Yesu onnawuupuserya awo: “Nyuwano mwàharuma atxhu wa Yohani [Mpatisi], nave àhelela onamona weparipari.”—Yohani 5:33.

Amwiicani a Yesu akhweya yaahiwiriyana phaama vooloca sa yeela iyaakha piili soopacerya, Yohani aaleenleiye ahooleli a malapelo a Ayuta vooloca sa Mmoha yoowo aahaala orwa ohoolo wawe—yoowo aathanliwe okhala “Mulipa a miririmu” ni “Kristu.” (Yohani 1:20-25) Awuupuseryaka amwiicani awe vooloca sa omucicimiha waya Yohani yoowo vano owaleliwe mukalaposo, Yesu onnaloca: “Nave nyuwo mwàkhwela ohakalala ni ekamama awe elukuluku vakhani.” (Yohani 5:35) Nyenya owo onnavaha onamoona otokweene opwaha wa Yohani Mpatisi.

‘Miteko seiho miyo kinapharaka, [ophitaanyerya openusa weiwo opankeiye] nave seiho sinnakihelela onamona wi Atithi àkiruma.’  Opwaha yeela, Yesu onnatitelela: “Atithi akirumme annakihelela onamona.” (Yohani 5:36, 37) Ntoko yootakiherya, Muluku oomweerela onamoona Yesu mu opatisiwa awe.—Mateu 3:17.

Mweeparipari, amwiicani a Yesu haanono mathowa a omukhooca yoowo. Soorempwa seiyo analocaaya wi annatholathola sinnamweerela onamoona. Yesu onnakuchula: ‘Mwamwemereryà Mose, muni munamukemererya miyotho, ntakhara arempe sa miyo. Nto mwahemereryà orempeiye, muni mwemererye hai masu aka?’—Yohani 5:46, 47.