Amanye amaJuda nakasola uJesu athi akalihloniphi iSabatha ngombana ulaphe umuntu, uJesu uphendula athi: “UBaba usolo asebenza bekube nje, nami ngisolo ngisebenza.”—Jwanisi 5:17.

Umthetho kaZimu weSabatha awukwaleli lokho okwenziwa nguJesu. Njengombana atjhumayela begodu alapha, ulingisa imisebenzi emihle kaZimu. Nje-ke uJesu uhlala enza izinto ezihle qobe langa. Kodwana ipendulwakhe iyababasela labo abamsolako, ibenza basilingeke khulu bafune nokumbulala. Kubayini?

Ngaphezu kombonwabo ophosakeleko wokuthi uJesu akalihloniphi iSabatha ngokulapha abantu, basilingeka khulu nabamuzwa athi uyiNdodana kaZimu. Bakuthatha njengehlamba ukuthi uqala uZimu njengoYise, njengokungathi ukutjho kwakaJesu ukuthi uJehova nguBabakhe kufana nokuthi uzenza olingana noZimu. Kodwana uJesu akabasabi, uyaraga nokubaphendula abahlathululela ngetjhebiswano ekhethekileko anayo noZimu. Uthi: “UBaba uyayithanda iNdodana begodu uyitjengisa zoke izinto azenzako.”—Jwanisi 5:20.

UBaba unguMuphi wokuPhila, begodu ukutjengisile lokhu esikhathini esidlulileko ngokuthi anikele abantu amandla wokuvusa abantu abafileko. UJesu uyaraga uthi: “Njengombana uBaba avusa abafileko abenze baphile, neNdodana iphilisa nanyana ngubani efuna ukumphilisa.” (Jwanisi 5:21) Amezwi la anamandla, asenza sibe nethemba lengomuso! Ngitjho nanje, kunabantu abanjengabafileko ngombana abanatjhebiswano noZimu. UJesu uyabavusa ngokuthi abasize bavuselele itjhebiswanabo noZimu. Kungakho uJesu athi: “Nanyana ngubani ozwa ilizwi lami akholwe uBaba ongithumileko unokuphila okungapheliko, akangeni ekwahlulelweni kodwana udlulile ekufeni wangena ekuphileni.”—Jwanisi 5:24.

Bekube nje asikezwa ngomuntu ofe kwamambala uJesu wamvusa, kodwana utjela abamangaleli bakhe ukuthi lokho kuzokwenzeka. Uthi: “Isikhathi siyeza lapho boke abasemathuneni bazokuzwa ilizwi layo baphume.”—Jwanisi 5:28, 29.

Nanyana uJesu azokuba ngumahluleli obekwe nguZimu begodu avuse nabafileko, ukwenza kukhanye bha ukuthi mncani kunoZimu, ngokuthi athi: “Angeze ngenza litho ngokwami. . . . Angifuni bona kwenzeke intandwami kodwana intando yongithumileko.” (Jwanisi 5:30) UJesu bekathoma ukutjho tjhatjhalazi ukuthi iyini indimakhe emnqophweni kaZimu. Kodwana abamangaleli bakaJesu banobunye ubufakazi ngaphandle kwalobu obunikelwa nguJesu. UJesu uyabakhumbuza uthi: “Nithumele abantu kuJwanisi [uMbhabhadisi], begodu ufakazele iqiniso.”—Jwanisi 5:33.

Kungenzeka abamangaleli bakaJesu bazwile ukuthi eminyakeni emibili edlulileko, uJwanisi watjela abadosiphambili bekolo yobuJuda ngaloyo oza emva kwakhe—obekabizwa ngokuthi ‘Mphorofidi’ namkha ‘nguKrestu.’ (Jwanisi 1:20-25) UJesu ukhumbuza abamangaleli bakhe ukuthi khebamhlonipha khulu uJwanisi osele asibotjhwa, ngokuthi: “Isikhatjhana esincani benizimisele ukuthaba khulu ekukhanyeni kwakhe.” (Jwanisi 5:35) Kodwana yena unikela ubufakazi obudlula bakaJwanisi uMbhabhadisi.

‘Imisebenzi engiyenzako le [kuhlanganise nokulapha asand’ ukukwenza], ngiyo efakazela ukuthi uBaba ungithumile.’ Ngaphandle kwalokho, uJesu uyaraga uthi: “NoBaba ongithumileko ufakaze ngami.” (Jwanisi 5:36, 37) Ngokwesibonelo, uZimu wafakaza ngoJesu nakabhajadiswako.—Matewu 3:17.

Kwamambala, abamangaleli bakaJesu abanabanga elizwakalako lokumnina. Phela nemiTlolo abathi barhubhulula kiyo ifakaza ngaye. Nje-ke uJesu uyayisonga indaba le, uthi: “Ngathana namkholwa uMosi, benizongikholwa nami, ngombana watlola ngami. Kodwana nangabe aniyikholwa imitlolwakhe, nizokukholwa njani engikutjhoko?”—Jwanisi 5:46, 47.