Etyi ova Sundeu vamwe vahunga Sesusi okuti walinga onkhali mokonda wavelula omulume umwe Motyasapalo, Sesusi akumbulula okuti: “Tate yange ukahi nokuundapa alo pehepano, na ame ndyikahi nokuundapa.” — Suau 5:17.

Etyi Sesusi ekahi nokulinga katyailikilwe movitumino vya Huku konthele Yotyasapalo. Ovilinga ekahi nokulinga viokuivisa nokuhakula, ankho ukahi nokuhetekela ovilinga oviwa vya Huku. Ngotyo, Sesusi atualako okulinga otyiwa ononthiki ambuho. Mahi ekumbululo aavela vana ankho vemutendeleya, alivenumanesa vali unene, avaovola okumuipaa. Omokonda yatyi?

Ankho vanumana-le mokonda vasoka okuti Sesusi ukahi nokulinga onkhali okuhakula ovanthu Motyasapalo, pahe avanumana vali unene etyi apopia okuti Omona wa Huku. Ankho vasoka okuti wapopia Huku omapita etyi ati Huku o Tate yae, ngatyina Sesusi ahanda okukala nga Huku etyi apopia okuti Siovaa o Tate yae. Mahi, Sesusi ankho katilile owoma iya evekumbulula okupopia vali konthele youpanga wakolela ena na Huku. Wati: “He uhole Omona iya umulekesa ovipuka aviho alinga.” — Suau 5:20.

Tate Omuavi Womuenyo, otyo wetyilekesa kohale etyi aavelele ovanthu epondolo liokututilisa vokuankhia. Sesusi apopi vali okuti: “Ngetyi He apindula-po vokuankhia evekalesa nomuenyo, tupu Omona waavela omuenyo ou ahanda.” (Suau 5:21) Onondaka ombo mbakolela, iya mbuavela ekevelelo ovanthu! Mahi Omona ukahi-ale nokututilisa ovanthu mokuvekuatesako okukala noupanga na Huku. Ngotyo, Sesusi apopi okuti: “Una utehelela ondaka yange, etavela ku Una wanthuma, una omuenyo uhapu, moluotyo, kamakoyeswa, mahi watunda mononkhia weya momuenyo.” — Suau 5:24.

Alo pomuvo opo natyike ankho tyilekesa okuti Sesusi watutilisa omunthu wankhile, mahi wapopila vana vemutendeleya okuti, makukakala etutilo liovanthu vokuankhia. Wati: “Makuya oola aveho vana vekahi momalangalo mehinangelo lya Huku, mavekeiva ondaka yae, avatundu-mo.” — Suau 5:28, 29.

Namphila Sesusi ena otyilinga tyakolela, walekesa nawa okuti utavela ku Huku, etyi ati: “Hipondola okulinga otyipuka natyike ko haluange muene. . . . Hiovola okulinga etyi ame muene nahanda, mahi ndyilinga ehando lya una wanthuma.” (Suau 5:30) Sesusi wapopia konthele yotyilinga tyae tyesukisa unene mehando lya Huku, otyilinga ehenepopie nalumwe povanthu. Iya ovalume ovo vokuhunga Sesusi ankho kaveivile vala ovipuka ovio kwe. Moluotyo, Sesusi evehinangelesa okuti: “Onwe muatuma ovanthu ku Suau [Batisita] iya ngwe aave oumbangi wotyili.” — Suau 5:33.

Omanima evali okualamba tyafuile vana vokuhunga Sesusi veivile etyi Suau apopilile ononkhalamutwe mbonongeleya mbova Sundeu konthele ya Una ankho meya konyima yae, wiihanwa okuti “Omuuli,” “Kilisitu.” (Suau 1:20-25) Sesusi ahinangelesa vana vemutendeleya konthele yonthilo onene ankho vena na Suau, pahe ukahi mokaleya, etyi ati: “Onwe muahambukililwe unene otyimimi tyae momuvo uhehi.” (Suau 5:35) Ngotyo, eveavela oumbangi omunene vali tyipona Suau Batisita.

Sesusi apopi okuti: “Ovilinga Tate anthuma ovio ndyikahi nokulinga [okukutikinya-mo ovilinga viokuhakula alinga] iya viaava oumbangi wokuti o Tate wanthuma.” Tyihe-otyo vala, Sesusi ayawisako okuti: “Tate wanthuma, nae muene waava oumbangi konthele yange.” (Suau 5:36, 37) Mongeleka, Huku waava oumbangi konthele ya Sesusi pu etyi ambatisalwa. Mateusi 3:17.

Tyotyili, vana vahunga Sesusi vetupu ehunga liokumuanya. Ovihonekwa vina vapopia okuti vevitanga, vipopia nawa konthele yae. Sesusi amanuhula okupopia nonondaka ombu: “Inkha muetavelele Moisesi, ñgeno na ame muenthavela, mokonda wahoneka konthele yange. Mahi inkha kamutavela etyi ahoneka, opo oñgeni mamutavela etyi ame ndyipopia?” — Suau 5:46, 47.