Nen aakusaan na pigaran Judio si Jesus ya agto uunorey Sabaton ta pinaabig toy sakey a laki, sikatoy inmebat: “Say Amak et mankikimey ni anggad natan, tan ontan ak met.”​—Juan 5:17.

Say gagawaen nen Jesus et aliwan kontra ed ganggay Dios nipaakar ed Sabaton. Diad pampupulong tan pamapaabig to et aaligen to iray maabig a gawa na Dios. Kanian inagew-agew si Jesus ya manggagaway maabig. Balet say ebat tod saramay mangaakusad sikato et lalon amasanok ed sikara tan sikatoy labay dan pateyen. Akin ya onman so reaksion da?

Aliwa labat ya lapud samay lingon panmoria da ed pamapaabig nen Jesus legay Sabaton, noagta kabusol da may ibabaga ton sikatoy Anak na Dios. Ipapasen dan anggapoy respeto to lapud ibabaga ton Ama to so Dios. Inisip da ya ipapara toy sarili to ed si Jehova. Balet, agtinmakot si Jesus tan inebatan to ra nipaakar ed espisyal a relasyon tod Dios. “Aaroen na Ama so Anak,” so kuan to, “tan ipapanengneng tod sikato so amin a gagawaen to.”​—Juan 5:20.

Say Ama so Manangiter-Bilay, tan diad apalabas et impanengneng to iya diad impangiter tod totoo na pakayarin mamaoli na inaatey. Intuloy nen Jesus: “No panon a papaolien na Ama iray inaatey tan bibilayen to ra, ontan met so Anak a bibilayen to so siopaman a labay to.” (Juan 5:21) Talagan mangiiter itan na ilalo ed arapen! Natan ni labat et papaolien na Anak iray inaatey diad espiritual a pantalos. Kanian inkuan nen Jesus: “Siopaman ya ondengel ed salitak tan manisia ed samay angibaki ed siak et walaan na bilay ya andi-anggaan, tan sikatoy agnaukom noagta alabasan to lay ipapatey tan mamapaarap lad bilay.”​—Juan 5:24.

Anggapo ni aktual ya pinaoli nen Jesus ed saman, balet imbaga tod saray mangaakusad sikato ya walay ontan a nagawad arapen. Inkuan to: “Onsabi so oras a saray amin a walad pakanodnonotan iran lubok et narengel day boses to tan ompaway ira.”​—Juan 5:28, 29.

Anggano nikadkaduma iray nagagawaan nen Jesus, impalinew to ya mas atagey so Dios nen say sikato: “Agak makapanggawa na anggan sakey a bengatla unong ed panlabayan ko. . . . Say aanapen ko et aliwan say linawak, noag say linawa na samay angibaki ed siak.” (Juan 5:30) Balet deneskribe nen Jesus so importantin betang to ed gagala na Dios, ya natan to labat ipaamta ed publiko. Anggaman ontan, mas dakel iramay mangaakusa ed sikato nen saray akatasi ed sarayan bengatla. Impanonot nen Jesus ed sikara: “Angibaki kayo na totoo ed si Juan [Bautista], tan tinasian toy katuaan.”​—Juan 5:33.

Nayarin nadngel na saramay mangaakusa ed si Jesus ya manga duay taon lay apalabas, imbaga nen Juan ed saray Judion lider na relihyon so nipaakar ed Sakey ya manumtumbok ed sikato​—ya tinawag ton “say Propeta” tan say “Kristo.” (Juan 1:20-25) Pian ipanonot ed saray mangaakusa so impamagalang da nensaman ed si Juan ya akapriso la natan, inkuan nen Jesus: “Diad antikey a panaon et labalabay yon panliketan a maong so liwawa to.” (Juan 5:35) Balet sikatoy angiter na mas baleg a pantasi nen say si Juan Bautista.

“Sarayan kimey a gagawaen ko [kaiba lay kakkasumpal ya impamaabig to], so mamaneknek ya imbaki ak na Ama.” Onia ni inyarum nen Jesus: “Say Ama ya angibaki ed siak so mismon mantatasi ed siak.” (Juan 5:36, 37) Singa bilang, tinasian na Dios si Jesus diad bautismo to.​—Mateo 3:17.

Talagan anggapoy nibaraan na saramay mangaakusad si Jesus diad impangipulisay dad sikato. Say Kasulatan ya ibabaga ran susumlangen nen Jesus et onsusuportad sikato. Oniay konklusyon nen Jesus: “No anisia kayod si Moises, manisia kayo komon ed siak, lapud sikatoy nansulat nipaakar ed siak. Balet no agyo panisiaan iray insulat to, panon yon panisiaan so ibabagak?”​—Juan 5:46, 47.