Wakin judiosqa Jesusta juchacharqanku Samarikuna Pʼunchaypi uj onqosqata sanoyachisqanmanta. Jesustajrí paykunata nerqa: “Tatayqa trabajashallanpuni, noqapis trabajashallanitaj”, nispa (Juan 5:17).

Jesusqa Samarikuna Pʼunchaypi uj onqosqata sanoyachispa, mana Diospa Leyninta pʼakisharqachu. Astawanpis Dios jina kʼacha kasqanrayku, sapa día Diosmanta willarqa, onqosqastapis sanoyacherqa. Jinapis judiosqa, Jesuspaj astawan phiñakorqanku Diosta “Tatay” nisqanrayku. Chayraykutaj Jesusta wañuchiyta munarqanku.

Paykunaqa yuyarqanku, Jesusqa Diosta “Tatay” nispa paywan kikinchakusqanta, Jehová Diospa contrantataj rimasqanta. Jesustajrí mana manchachikuspa chay judiosman nerqa: “Tatayqa noqata munakuwan, chayrayku imastachus ruwan, chay tukuyta rikuchiwan”, nispa (Juan 5:20).

Diosqa tukuyman kausayta qon. Chaytataj rikucherqaña wakin runasman wañusqasta kausarichinankupaj atiyta qospa. Chayrayku Jesusqa judiosman nerqa: “Imaynatachus Tatay wañusqasta kausarichin, ajinallatataj noqapis pitachá kausarichiyta munani, chayta kausarichini”, nispa (Juan 5:21). Chay nisqanqa, rikuchiwanchej wañusqasta qhepaman kausarichinantapuni. Kunanpis Jesusqa, pikunachus Diospa ñaupaqenpi wañusqa jina kashanku, chaykunata kausarichishanña. Chayrayku pay nerqa: “Pichus parlasqayta uyarin, Kachamuwaj Tataypipis creen chayqa, wiñay kausayniyoj kanqa, manataj juchachasqachu kanqa, astawanqa wañusqamantapis kausarimunman jina kanqa”, nispa (Juan 5:24).

Jesusqa chay kutikama manaraj pitapis wañuymanta kausaricherqachu. Jinapis chay churanakoj judiosman nerqa wañusqasta jatarichinantapuni. Pay nerqa: “Hora chayamonqa, chaypachataj sepulturaspi tukuy kajkunaqa wajyasqayta uyarenqanku, kausarimonqankutaj”, nispa (Juan 5:28, 29).

Jesusqa juzgananpaj, wañusqasta jatarichinanpajwan atiyta japʼispapis, sutʼita nerqa Diosqa paymanta kuraj kasqanta. Pay nerqa: “Mana imatapis noqallamantaqa ruwayta atinichu. [...] Mana noqaj munayniytachu ruwani, manachayqa kachamuwaj Tataypa munayninta ruwani”, nispa (Juan 5:30). Jesusqa chay kutipipuni willarqa imaynatachus Diospa munaynin juntʼakunanpaj yanapakusqanta. Jinapis mana payllachu judiosman willarqa pichus kasqanta, imapajchus jamusqantapis. Jesusllataj paykunaman nerqa: “Qankunaqa Juanman runasta kacharqankichej, paytaj noqamanta cheqatapuni willarqa”, nispa (Juan 5:33).

Juan Bautistaqa iskay wata ñaupajtaña judiospa religionninkuta ñaupajman apajkunaman Cristomanta willarqa. Jesusman churanakoj judiostaj, chayta sumajtachá yacharqanku (Juan 1:20-25). Paykunaqa Juan Bautistata, pichus carcelpi kasharqa chayta, jatunpaj qhawarqanku. Chayrayku Jesús Juanmanta paykunaman parlaspa nerqa: “Pisi tiempollata munarqankichej kʼanchayninpi kusikuyta”, nispa (Juan 5:35). Jinapis mana Juan Bautistallachu Jesusqa Diospa Wawan kasqanta nerqa, manaqa kikin Jesuspis chayta nillarqataj.

Pay nerqa: ‘Onqosqasta sanoyachisqay, waj imasta ruwasqaypis, sutʼinchan Tatay kachamuwasqanta’, nispa. Chantapis Jesús nillarqataj: “Kachamuwaj Tatayqa pay kikin noqamanta willarqa”, nispa (Juan 5:36, 37). Jinataj karqa, imajtinchus Jesús  bautizakushajtenqa, Dios kikin nerqa: “Kaymin munasqa Wawayqa”, nispa (Mateo 3:17).

Chantapis Moisespa qhelqasqasnenqa Cristomanta willarqa. Judiostaj chayta sumajta estudiaj kanku. Chayrayku paykunaqa Jesusta qhesacharqanku, Diospa Wawan kasqanta yachashaspa. Chantachá Jesús paykunaman nerqa: “Moisestachus creewajchej chayqa, noqatapis creewankichejman, imaraykuchus payqa noqamanta qhelqarqa. Moisespa qhelqasqantachus mana creenkichej chayqa, ¿imaynatataj nisqasniyta creewajchejri?”, nispa (Juan 5:46, 47).