Säbaduta mana cumplir qeshyëkaq nunata kachakätsir mana allita ruranqanta niyaptinmi, judïukunata Jesus kënö nirqan: “Teytäqa kanankamayaqmi trabajarnin sïguishqa, y noqapis trabajarmi sïguikä” (Juan 5:17).

Säbadupaq Jehovä qonqan leytaqa Jesusqa wiyakurqanmi. Tsëmi ima junaq kaptimpis, yachatsikur y qeshyëkaqkunata kachakätsirqa, Teytannölla alli kaq rurëkunata rurëkarqan. Jesusqa llapan junaqkunam alli kaq rurëkunata rurarqan. Tsënö kaptimpis, tapuyanqanta contestanqanwanmi judïukunata masraq piñatsirqan, tsëmi wanutsitapis munayarqan. ¿Imanirtaq tsëta rurëta munayarqan?

Puntataqa, säbadu junaqpaq ley ninqanta mana respetanqanta pensarmi, y ishkë kaqchöqa, Diospa Tsurin kanqanta nishqa kaptinmi. Teytan Dios kanqanta nirninqa, Diospa contran parlëkanqantam pensayaq, porqui pëkunapaqqa Dioswanmi igualaq tukïkarqan. Peru Jesusqa manam tsëta nita mantsarqantsu, tsëmi Dioswan kuyanakuyanqanta kënö nir entienditsirqan: “Teytaqa Tsurita kuyanmi, y kikin llapan ruranqan cösaskunatam rikätsin” (Juan 5:20).

Teytam kawëta qokoq kaqqa, y wakin nunakunata kawaritsiyänampaq unë witsan sirweqninkunata poderta qormi tsëtaqa rikätsikurqan. Tsëmi Jesusqa kënö nir sïguirqan: “Imanömi Teyta wanushqakunata sharkatsin y kawëninkuna qon, tsënöllam Tsuripis munanqan kaqkunata kawëninkuna qon” (Juan 5:21). Tsënö ninqanqa, shamoq tiempupaq shuyäkïyoq kanapaqmi yanapamantsik. Jesusqa kanan witsankunapis Diospa kaqchö wanushqanö këkaqkunatam kawarikätsinna. Tsëmi kënö nirqan: “Ninqäkunata wiyaq kaq y Kachamaqnïta creeq kaqqa, imëyaqpis kawëyoqmi, y manam juzgashqatsu kanqa, sinöqa wanïpitam kawëman pasashqa” (Juan 5:24).

Tsë witsanyaq Jesus pitapis kawaritsishqana kanqantaqa manam imachöpis willakuntsu, tsënö kaptimpis, nunakuna rasumpa kawariyämunampaq kaqtam pëkunata kënö nirqan: “Chëkämunnam höra, y sepultürakunachö llapan këkaqkunam qayakunqanta wiyayanqa y yarqayämunqa” (Juan 5:28, 29).

Alläpa precisaq carguyoq karpis, Jesusqa clärum rikätsikurqan Dioswan igual mana kanqanta, tsëmi kënö nirqan: “Manam ni imatapis kikïllapitaqa rurëta puëdïtsu. [...] Porqui manam kikïpa munënïtatsu ashï, sinöqa kachamaqnïpa munënintam” (Juan 5:30). Diospa munënin cumplikänampaq alläpa precisaq carguyoq kanqantaqa, tsë kutiran musyatsikurqan. Peru contran churakaqkunataqa, kikimpaq pëlla mana tsënö ninqantam rikätsikurqan. Sinöqa Juanpis pëpaq willakunqantam kënö nir yarpätsirqan: “Qamkunam nunakunata [Bautizakoq] Juanman kachayarqunki, y pëqa rasumpa kaqtam noqapita musyatsikushqa” (Juan 5:33).

“Diospa Willakoqnin” nir y “Cristu” nir reqiyanqan shamunampaq kaqtaqa nunakuna musyayarqanchi, porqui ishkë wata qepatanönam judïukunapa pushakoq religiösunkunataqa Juan willashqa karqan (Juan 1:20-25). Tsëmi Juanta tsë witsankuna alläpa estimayanqanta yarpätsirnin kënö nirqan: “Qamkunaqa wallka tiempullapam aktsinchö alläpa kushishqa këta munayarqunki” (Juan 5:35). Peru Bautizakoq Juan musyatsikunqampitaqa Jesus musyatsikunqanmi mas precisaq karqan.

Jina Jesusqa kënömi nirqan: “Teyta kachamashqa kanqanta[qa] rikätsikun, [...] kë rurëkanqä rurëkuna[m]”. Tsëkunaqa karqan yachatsikunqan y tsëllaraq rurarinqan milagrum. Jina  kënömi nirqan: “Kikin kachamaq Teytam noqapita musyatsikushqa” (Juan 5:36, 37). Juk kutiqa Dios tsëta musyatsikurqan Jesus bautizakuriptin ciëlupita parlamunqanchömi (Mateu 3:17).

Jesusta judïukuna imanir mana chaskiyanqantaqa manam ni imanöpa tsapäkïta puëdiyarqantsu, porqui Diospa Palabranta estudiayanqanchöpis pëpaqqa parlëkarqanmi. Tsëmi Jesusqa kënö nirqan: “Moisesta creirqa, noqatapis creiyämankimanmi, porqui noqapaqmi pëqa qellqarqan. Peru qellqanqankunata mana creikarqa, ¿imanöraq ninqäkunata creiyanki?” (Juan 5:46, 47).