Ciindi ba Juda bamwi nobamutamikizya Jesu kuti watyola mulawo wa Sabata naaponya mwaalumi umwi, Jesu wavwiila kuti: “Taata ulabeleka ambuli sunu, aboobo andime ndiluujisi kubeleka.”—Johane 5:17.

Inzya, ncacita Jesu tacikasyidwe pe amulawo wa Leza uujatikizya Sabata. Ucita mulimo wakukambauka akuponya bantu kwiinda mukwiiya milimo mibotu ya Leza. Aboobo Jesu wazumanana kucita milimo mibotu abuzuba. Pele bwiinguzi mbwaabapa basikumujanina mulandu, bwapa kuti baindile kunyema kwiinda mbobakanyemede musyule, eelyo bayanda kumujaya Jesu. Ino ncinzi cabapa kunyema boobu?

Kunze lyakuba amizeezo iitaluzi yakuti Jesu utyola mulawo wa Sabata kwiinda mukuponya bantu, banyema kapati akaambo kakuti waamba kuti Mwana wa Leza. Bayeeya kuti usampaula Leza kwiinda mukwaamba kuti Leza ngu Usyi, mbuli kuti ciindi Jesu naamba kuti Jehova ngu Usyi ulyeelanya aa Leza. Nokuba boobo, Jesu tayoowede pe, aboobo wazumanana kuvwiila kwiinda mukubaambila cilongwe cilibedelede ncajisi a Bausyi. Waamba kuti: “Taata ulamuyanda Mwana aboobo ulamutondezya zintu zyoonse nzyacita walo.”—Johane 5:20.

Taata ngo Sikupa Buumi, alimwi eeci wakacitondezya musyule kwiinda mukupa baalumi bamwi nguzu zyakubusya bantu bafwide. Jesu wazumanana kuti: “Mbubonya Taata mbwabusya bafwide akubapa kuba baumi, awalo Mwana ulamupa kuba muumi kufwumbwa muntu ngwayanda.” (Johane 5:21) Masimpe, majwi aaya mabotu, apa bulangizi bwabuumi bwakumbele! Noliba lino Mwana ubusya bantu bafwide munzila yakumuuya. Aboobo, Jesu waamba kuti: “Kufwumbwa uumvwa majwi aangu akumusyoma ooyo wakandituma ulaabuumi butamani, alimwi tabetekwi pe, pele wazwa kulufwu akuya kubuumi.”—Johane 5:24.

Aciindi eeci taaku makani aali woonse aaliko aakuti Jesu wakabusya muntu kuzwa kubafwu, pele waambila basikumujanina kaambo kuti bubuke buli boobu buyoocitika. Waamba kuti: “Ciyoosika ciindi eelyo aabo boonse ibali muzyuumbwe nobayoomvwa ijwi lyakwe akuzwa mulinzizyo.”—Johane 5:28, 29.

Nokuba kuti Jesu ulaamulimo waalubazu, wacisalazya kwaamba kuti walo muniini kuli Leza, wati: “Tandilicitili cintu cili coonse ndemwini. . . . Tanditobeli kuyanda kwangu ndemwini pe, pele nditobela kuyanda kwayooyo wakandituma.” (Johane 5:30) Nokuba boobo, Jesu wapandulula mulimo mupati ngwajisi mumakanze aa Leza, ooyo ngwatanabuzuba wapandulula mubuleya. Alimwi aabo ibamujanina mulandu Jesu balaabumboni bunji ibutazwi buyo kuzintu eezyi nzyaamba. Jesu wabayeezya kuti: “Mwakatuma bantu kuli Johane [Mubbapatizi], alimwi walo wakapa bumboni kukasimpe.”—Johane 5:33.

Kweelede kuti basikumujanina mulandu Jesu bakamvwa kuti myaka yobilo yainda, Johane wakaambilide basololi babukombi bwaba Juda kujatikizya Yooyo iwakali kuboola musyule lyakwe, nkokuti Ooyo iwakali kwaambwa kuti “Musinsimi” akuti “Kristo.” (Johane 1:20-25) Kayeekezya basikumujanina mulandu aaba mbubakali kumulemeka aciindi cimwi Johane, ooyo lino iwaangidwe muntolongo, Jesu wati: “Kwaciindi cisyoonto mwakali kuyandisisya kukondwa kapati mumumuni wakwe.” (Johane 5:35) Pele wabapa bumboni abumbi bupati kwiinda bwa Johane Mubbapatizi.

Waamba kuti: “Milimo njiyona eeyi njendicita [kubikkilizya amaleele aakuponya ngaazwa mukucita], ipa bumboni bwakuti Taata nguwakandituma.” Kunze lyaboobo, Jesu wazumanana kwaamba kuti: “Taata lwakwe iwakandituma wapa bumboni kujatikizya ndime.” (Johane 5:36, 37) Mucikozyanyo, Leza wakapa bumboni kujatikizya Jesu ciindi naakabbapatizyigwa.—Matayo 3:17.

Masimpe, aabo bamujanina mulandu Jesu tabajisi kaambo kakumukakila. Ngoonya Magwalo ngobalitaminina kuti ngobavwuntauzya apa bumboni kujatikizya nguwe. Jesu wamanizya amajwi aakuti: “Ikuti nomwali kumusyoma Musa nomwandisyoma andime, nkaambo ooyo wakalemba zijatikizya ndime. Pele ikuti kamutazisyomi nzyaakalemba walo, ino inga mwazisyoma buti nzyondaamba?”—Johane 5:46, 47.