Taim sampela Juda i sutim tok long Jisas olsem em i brukim lo bilong Sabat long oraitim wanpela sikman, Jisas i tokim ol: “Papa bilong mi i wok i stap i kam inap long nau, na mi tu mi wok i stap.”—Jon 5:17.

Samting Jisas i mekim i no brukim lo bilong God long Sabat. Wok bilong em long autim tok na oraitim ol sikman i kamapim klia ol gutpela pasin bilong God. Olsem na long olgeta de Jisas i wok yet long mekim ol gutpela wok. Tasol bekim bilong Jisas i mekim ol Juda i belhat moa yet, na ol i painim rot bilong kilim em i dai. Bilong wanem ol i laik kilim Jisas i dai?

Ol i ting Jisas i brukim lo bilong Sabat taim em i oraitim ol manmeri, na tu, Jisas i tok em i Pikinini Bilong God, dispela i mekim na ol i kros nogut tru. Ol i ting Jisas i tok bilas long God taim em i kolim God olsem Papa bilong em. Long tingting bilong ol, i kain olsem Jisas i laik mekim em yet i kamap wankain olsem God. Tasol Jisas i no pret, em i bekim tok bilong ol na i kamapim klia pasin pren bilong em wantaim God. Em i tok: “Papa i laikim tumas Pikinini na soim em olgeta samting em yet i save mekim.”—Jon 5:20.

God em Man Bilong Givim Laip, na em i kamapim klia dispela taim em i givim strong long ol man bilong bipo long kirapim bek ol man i dai pinis. Jisas i tok: “Papa i save kirapim bek ol man i dai pinis na givim laip long ol, na olsem tasol Pikinini tu i save givim laip long ol man em i gat laik long givim long ol.” (Jon 5: 21) Em gutpela tok tru! Yumi inap bilip na wet long ol gutpela samting bai kamap bihain. Long nau, Pikinini Bilong God i helpim ol man long pas gut gen wantaim God, i kain olsem em i kirapim bek ol long dai long sait bilong bilip. Olsem na Jisas i tok: “Man i harim tok bilong mi na bilip long man i salim mi i kam, em i gat laip oltaim. Em bai i no gat kot, nogat, em i lusim dai pinis na nau em i stap laip.”—Jon 5:24.

Long taim Jisas i mekim dispela tok, Baibel i no stori yet olsem em i bin kirapim bek wanpela man i dai pinis. Tasol Jisas i tokim ol birua bilong em: “Taim i laik kamap na olgeta man i stap long matmat ol bai harim nek bilong Pikinini na kam ausait.”—Jon 5:28, 29.

Maski Jisas i mekim ol narakain wok, em i kamapim klia olsem em i stap aninit long God. Em i tok: “Mi no inap mekim wanpela samting long tingting bilong mi yet, . . . mi no bihainim laik bilong mi yet, nogat, mi bihainim laik bilong man i salim mi i kam.” (Jon 5:30) I no gat wanpela taim Jisas i bin tokaut long bikpela wok em i kisim long ol samting God i tingting pinis long mekim, nau em fes taim em i tokaut long ai bilong ol manmeri. Tasol ol man i birua long Jisas ol i save pinis long dispela samting. Olsem na Jisas i tokim ol: “Yupela i bin salim sampela man i go long Jon [Bilong Baptais], na em i tokaut long tok i tru.”—Jon 5:33.

Ating tupela yia paslain long dispela ol birua bilong Jisas i bin harim dispela tok. Jon i bin tokim ol bikman bilong lotu Juda olsem Man i kam bihain long em, ol bai kolim em “Profet” na “Krais.” (Jon 1:20-25) Pastaim ol man i rispektim Jon, tasol bihain ol birua i putim em long kalabus. Olsem na Jisas i tok: “Inap sotpela taim yupela i redi long amamas long lait bilong em.” (Jon 5:35) Tru, Jon Bilong Baptais i bin autim tok long ol manmeri, tasol Jisas bai mekim bikpela wok moa bilong autim tok.

Jisas i tok: “Ol dispela wok [dispela i makim tu ol wok em i mekim bilong oraitim ol sikman] i tokaut long ol manmeri olsem Papa i salim mi i kam.” Na em i tok moa: “Papa husat i bin salim mi i kam, em yet i tokaut long ol wok na pasin bilong mi.” (Jon 5:36, 37) Olsem, long taim Jisas i kisim baptais, God i tokaut olsem em i amamas long em.—Matyu 3:17.

Tru tumas, i no gat eskius long ol dispela hetman i sakim Jisas. Ol i tok ol i save ritim na skelim ol tok bilong Baibel, tasol Baibel yet i tokaut long Jisas. Olsem na Jisas i tok: “Sapos tru tru yupela i bin bilipim tok bilong Moses, orait yupela bai bilipim tok bilong mi, long wanem, dispela man i bin raitim ol tok i stori long mi. Tasol sapos yupela i no bilipim ol tok em i raitim, orait olsem wanem bai yupela i bilipim ol tok bilong mi?”—Jon 5:46, 47.