I te taimi ne ‵losi atu a nisi tino Iutaia me ne solitulafono a Iesu i te Sapati i te faka‵leiga ne ia o se tagata, ne tali atu a Iesu: “A toku Tamana e galue faeloa ke oko mai eiloa ki te taimi nei, kae ko au foki e galue faeloa.”—Ioane 5:17.

Ikai, ne seki fakatapu a te mea ne fai ne Iesu i te Tulafono a te Atua e uiga ki te Sapati. E fakaakoako atu eiloa a ia ki te Atua i te faiga o galuega ‵lei i tena galuega ko te talai atu mo te faka‵leiga o ma‵saki. Tela la, ne tumau eiloa a Iesu i te faiga o galuega ‵lei i aso katoa. Kae ko tena tali ki ana tino fakamasei, ne fai ei ke gasolo aka latou o kaitaua, kae ne taumafai latou ke tamate a Iesu. Kaia ne fai ei latou penei?

I tafa o te lotou kilokiloga ‵se me ne ofa ne Iesu te Sapati i te faka‵leiga ne ia o tino ma‵saki, ne kaitaua malosi latou i ana pati me i a ia ko te Tama a te Atua. Ne ma‵natu aka foki latou me ko pati masei a ia ki te Atua ona ko te kilo atu ki te Atua e pelā me ko tena Tamana, e pelā eiloa me fai atu a Iesu i a Ieova ko tena Tamana me ko fai ne ia ke ‵pau lāua mo te Atua. Kae ne seki mataku a Iesu kae ne tali atu a ia ki a latou e uiga ki tena fesokotakiga fakapito mo te Atua. Ana muna: “Me e alofa te Tamana ki te Tama kae e fakaasi atu ki a ia a mea katoa kolā e fai ne ia. Ka fakaasi atu foki ki a ia a galuega e sili fakafia atu i mea konei, ko te mea ke ofo koutou.”—Ioane 5:20.

A te Tamana ko te Tino telā e tuku mai ne Ia te Ola, kae ko oti ne fakaasi mai ne ia te mea tenei i aso mua mai te tukuatuga o te malosi ki tāgata ke faka‵tu mai a tino ‵mate. Ne toe fai atu a Iesu: “E pelā mo te Tamana e faka‵tu aka ne ia a tino ‵mate kae fakaola ne ia latou, e penā foki te Tama e fakaola ne ia so se tino e loto a ia ki ei.” (Ioane 5:21) Ko oko eiloa i te aoga o te fakamatalaga tenā me e tuku mai i ei a te fakamoemoega mō aso mai mua! Ke oko foki eiloa ki aso nei, e faka‵tu aka ne te Tama a tino ‵mate i te feitu faka-te-agaga. Tela la, ne fai atu a Iesu: “So se tino e lagona ne ia aku pati kae talitonu ki te Tino telā ne uga mai ne ia au ka maua ne ia te ola se-gata-mai, kae ka se fakamasinogina a ia kae ko sao atu a ia mai te mate ki te ola.”—Ioane 5:24.

E seai se tala me ne fakatu aka ne Iesu se tino telā ne mate tonu eiloa mai te mate, kae ne fai atu a ia ki tino kolā ne ‵losi atu ki a ia me ka toe faka‵tu aka a tino ‵mate i te feitu faka-te-foitino. Ana muna: “Sa ofo koutou i te mea tenei, me ka oko mai eiloa te itula e lagona ei ne tino katoa kolā e i loto i tanuga a tena leo ko ulu mai ei ki tua.”—Ioane 5:28, 29.

E tiga eiloa te fakaofoofogia o te tulaga o Iesu, ne fakaasi faka‵lei mai ne ia me e malalo ifo eiloa a ia i te Atua, i ana pati konei: “E se mafai ne au o fai se mea e tasi i toku loto eiloa. . . . E se fai ne au i toku loto eiloa, kae ko te loto o ia telā ne uga mai ne ia au.” (Ioane 5:30) Kae ne fakamatala atu ne Iesu tena tulaga tāua i te fuafuaga a te Atua, faitalia me ne seki oko atu ki te taimi ke fai ne ia i mua o tino katoa. Kae ne uke atu a fakamaoniga ne maua ne tino ‵losi konā i lō mea kolā ne molimau eiloa latou ki ei. “Ko oti ne uga atu ne koutou a tāgata ki a Ioane [te Papatiso],” ne fakamasaua atu a Iesu ki a latou, “kae ne molimau a ia e uiga ki te mea tonu.”—Ioane 5:33.

I te lua tausaga mai mua atu i ei, kāti ne lagona ne tino ‵losi ki a Iesu, a pati ne fai atu ne Ioane ki takitaki konā o te lotu Iutaia e uiga ki te Tino telā ka vau i ana tua—telā ne fakaaoga ki ei a tugapati e pelā mo “te Pelofeta” mo “te Keliso.” (Ioane 1:20-25) Ne fakamasaua ne Iesu ki tino kolā ne ‵losi atu ki a ia a te lasi o te lotou fakaaloalo ki a Ioane telā ko nofo atu i te taimi tenā i te falepuipui, ana muna: “Kae ne fia‵fia malosi koutou i se taimi toetoe i tena mainaga.” (Ioane 5:35) Kae ne tuku atu se molimau telā e lasi fakafia atu i te mea ne fai ne Ioane te Papatiso.

“Ko galuega kolā e fai nei ne au [e aofia i ei te vavega telā ne fatoa fai ne ia], e fai pelā me se molimau me ne uga mai au ne te Tamana.” I tafa i ei, ne toe fai atu a Iesu: “Kae ko te Tamana telā ne uga mai ne ia au ko oti ne molimau mai e uiga ki a au. E seki lagona aka eiloa ne koutou a tena leo i se taimi io me ne lavea ne koutou ana foliga.” (Ioane 5:36, 37) E pelā eiloa mo te molimau atu a te Atua e uiga ki a Iesu i tena papatisoga.—Mataio 3:17.

A te ‵tonuga loa, e seai se pogai ‵lei mō tino kolā ne ‵losi atu ki a Iesu ke ‵teke atu latou ki a ia. A tusi siki i te Tusi Tapu kolā ne fakaaoga ne latou ke ‵teke atu ne molimau eiloa e uiga ki a ia. Ne fakaoti ne Iesu ana pati penei: “Moi ne tali‵tonu koutou ki a Mose penei ko tali‵tonu mai foki koutou ki a au, me ne tusi mai te tino tenā e uiga ki a au. Kae kafai e se tali‵tonu koutou ki ana tusitusiga, ka tali‵tonu la pefea koutou ki aku pati?”—Ioane 5:46, 47.