I to te tahi mau ati Iuda pariraa ia Iesu i te ofatiraa i te Sabati i to ˈna faaoraraa i te maˈi o te hoê tane, pahono atura Iesu: “Te ohipa noa nei â to ˈu Metua e te ohipa noa nei au.”—Ioane 5:17.

Aita roa ˈtu ta Iesu e rave ra i ofati i te ture a te Atua no nia i te Sabati. Ta ˈna ohipa pororaa e faaoraraa maˈi, ua tuea noa ïa e te mau ohipa maitatai a te Atua. No reira Iesu i rave noa ˈi i te maitai i te mau mahana atoa. Rahi roa ˈtura râ te riri o taua mau ati Iuda ra tei pari ia Iesu no ta ˈna pahonoraa, e imi aˈera i te haapohe ia ˈna. No te aha ratou i na reira ˈi?

Ua pari haavare ratou ia Iesu i te ofatiraa i te Sabati i to ˈna faaoraraa i te maˈi, e ua uˈana ˈtu â to ratou riri i to Iesu parauraa e e Tamaiti o ˈna na te Atua. No ratou, te faaino ra Iesu i te Atua i to ˈna parauraa e o te Atua to ˈna Metua, mai te huru ra e te faafaito ra oia ia ˈna i te Atua. Aita râ Iesu i taiâ, e faaite atura e mea piri roa o ˈna e te Atua, a na ô ai: “Mea here roa hoi na te Metua i te Tamaiti e te faaite nei oia ia ˈna i te mau mea atoa ta ˈna iho e rave ra.”—Ioane 5:20.

O te Metua te Tumu o te ora, e ua faaite oia i te reira i tahito ra ma te horoa i te mana i te tahi mau tane e faatia mai i tei pohe. Na ô atoa ˈtura Iesu: “E faatia mai hoi te Metua i tei pohe, a horoa ˈtu ai i te ora, e horoa atoa ïa te Tamaiti i te ora no te feia ta ˈna e hinaaro.” (Ioane 5:21) E parau faufaa mau â teie, o te horoa mai i te tiaturiraa no a muri aˈe! I teie nei â, te faahoˈi mai nei Iesu i te feia i pohe i te pae varua i te ora. No reira oia i parau ai: “O te faaroo i ta ˈu parau e o te tiaturi i tei tono mai ia ˈu, e noaa ïa ia ˈna te ora mure ore, e ore atoa oia e faautuahia, ua haere mai râ oia mai te pohe mai i te ora.”—Ioane 5:24.

Aita i papaihia e ua faahoˈi aˈena mai Iesu i te tahi taata pohe i te ora. Ua parau râ oia i te feia pari e e tupu iho â taua mau tia-faahou-raa ra. Ua na ô hoi oia: “Ua fatata te hora e faaroo ai te feia atoa i roto i te menema i to ˈna reo, a haere mai ai i rapae.”—Ioane 5:28, 29.

Noa ˈtu e e riro mai Iesu ei haava na te Atua e na ˈna e faatia mai i te feia pohe, haapapu maitai ihora oia e tei raro aˈe oia i te Atua, a na ô ai: “Eita ta ˈu e nehenehe e rave i te tahi noa ˈˈe mea mai ta ˈu e hinaaro. . . . Te rave nei au eiaha i to ˈu iho hinaaro, i te hinaaro râ o te Metua tei tono mai ia ˈu.” (Ioane 5:30) Te faataa noa ra Iesu i ta ˈna iho hopoia faufaa roa i roto i te opuaraa a te Atua, a tahi ra hoi oia a haapapu maitai ai i te reira i mua i te taata. Hau atu â i ta Iesu haapapuraa i te reira i te feia pari, te vai atoa ra ta te tahi atu haapapuraa. Haamanaˈo atura Iesu ia ratou: “Ua tono outou i te taata ia Ioane [Bapetizo] ra e ua faaite oia i te parau mau.”—Ioane 5:33.

Eita e ore e ua faaroo te feia pari i te reira piri i te piti matahiti na mua ˈtu. I faahiti na hoi Ioane i te mau aratai haapaoraa ati Iuda i te taata e haere mai i muri aˈe ia ˈna, tei piihia “te peropheta” e “te Mesia.” (Ioane 1:20-25) A haamanaˈo ai oia i te feia pari i to ratou faatura rahi na mua ˈˈe no Ioane tei tapeahia, na ô atura Iesu: “No te hoê taime poto i hinaaro na outou e oaoa rahi i to ˈna maramarama.” (Ioane 5:35) Horoa ihora râ oia i te hoê haapapuraa rahi aˈe i ta Ioane Bapetizo.

“Na te mau ohipa . . . ta ˈu ïa e rave nei [mai te faaoraraa maˈi ta ˈna i rave mai nei] e haapapu mai ra e na te Metua i tono mai ia ˈu,” ta Iesu ïa i parau, a na ô faahou ai: “Ua faaite atoa te Metua iho tei tono mai ia ˈu i te parau no ˈu.” (Ioane 5:36, 37) Ei hiˈoraa, ua faaite te Atua i te parau no Iesu i to ˈna bapetizoraahia.—Mataio 3:17.

 Aita iho â taua feia pari ra i tano i te patoiraa ia ˈna. Na te mau Papai ta ratou e faahua imi ra e haapapu ra i te parau no Iesu. Na ô atura Iesu: “Ahiri hoi outou i faaroo ia Mose, ua faaroo mai ïa outou ia ˈu, i papai hoi oia i te parau no ˈu. Aore outou i faaroo i ta ˈna i papai ra, eaha atoa outou e faaroo mai ai i ta ˈu parau?”—Ioane 5:46, 47.