Eci va Yudea vamue va pisa Yesu omo lioku sakula ulume umue Kesambata, eye o va tambulula hati: “Isiange o kasi oku talavaya toke cilo, lamevo ñasi oku talavaya.”—Yoano 5:17.

Eci Yesu a kasi oku linga ka ca pisiwile vocihandeleko ca Suku catiamẽla Kesambata. Eye o kasi oku setukula ovopange awa a Suku poku kunda kuenda oku sakula omanu. Omo liaco, Yesu amamako oku linga ovina viwa oloneke viosi. Pole, etambululo a eca komanu va kala oku u pisa, lia va temisa calua kuenje va seteka oku u ponda. Momo lie va yonguila oku u ponda?

Ndaño okuti va Yudea vamue va pisa Yesu omo lioku sakula ulume umue Kesambata, pole, eci ca va temisa vali calua ceci Yesu a litukula okuti, Omõla a Suku. Ovo va sima okuti Yesu poku tukula Suku hati Isiaye, kokuavo ca kala etonãi, momo ca kala ndu okuti Yesu wa lisokisa la Yehova. Yesu ka kuata usumba, pole, o va sapuila eci catiamẽla kukamba ulikasi a kuete la Suku. Yesu o va sapuila ndoco: “Isia o sole Omõla kuenda u lekisa ovina viosi eye a linga.”—Yoano 5:20.

Isia eye Ukuakueca Omuenyo. Kosimbu wa ci lekisa poku eca unene waye kalume vamue oco va pindule omanu va fa. Yesu amisako loku popia hati: “Ndeci Isia a pindula ava va fa loku va muisa omuenyo, Omõla o muisavo omuenyo kuava eye a panga.” (Yoano 5:21) Olondaka viaco vieca elavoko lio kovaso yoloneke! Cilo Omõla o kasi oku kuatisa omanu vana va hongua kekolelo. Omo liaco, Yesu o popia hati: “Wosi o yeva ondaka yange kuenda o kolela ku una wa numa, o kuete omuenyo ko pui, ka sombisiwa, puãi wa tunda koku fa hã ha kuata omuenyo.”—Yoano 5:24.

Ka kuli uvangi u lekisa okuti toke cilo Yesu wa pindula omunu umue, pole, eye o sapuila omanu vana va kala oku u pisa okuti, ku kala epinduko. Eye o popia hati: “Momo owola yiya okuti vosi va kasi vayambo va yeva ondaka yaye, kuenje va tundamo.”—Yoano 5:28, 29.

Ndaño okuti Yesu o kuete ocikele ca velapo, pole, o lekisa okuti o pokola ku Suku poku popia ndoco: “Si lingi lacimue locipango cange muẽle. . . . Si sandiliya ocipango cange muẽle, te ocipango cu wa numa.” (Yoano 5:30) Omo liaco, Yesu o lombolola esilivilo liocikele caye vocipango ca Suku okuti, ka la ci popia komanu. Pole, vana va kala oku pisa Yesu ka va yevele lika uvangi waco kokuaye. Kuenje eye o va ivaluisa hati: “Ene wa tumi alume ku Yoano [Upapatisi] kuenda eye imba uvangi wocili.”—Yoano 5:33.

Citava okuti omanu vana va pisa Yesu, va yeva ovina viaco noke lianyamo avali. Yoano wa sapuila asongui vetavo lia va Yudea eci catiamẽla ku Una wa laikele oku iya noke, o tukuiwa okuti: “Uprofeto” kuenda “Kristu.” (Yoano 1:20-25) Yesu poku ivaluisa ava va kasi oku u pisa catiamẽla kovisimĩlo viwa va kuatela Yoano una o kasi vokayike, o va sapuila ndoco: “Wa yonguili oku sanjukila ocinyi caye vokatembo kamue.” (Yoano 5:35) Omo liaco, Yesu eca uvangi wa velapo okuti, wa Yoano Upapatisi u sule.

“Ovopange osi ñasi oku linga [oku kongelamo ocikomo coku sakula] weca uvangi wokuti Isia eye wa numa.” Omo liaco, amisako loku popia ndoco: “Isia wa numa, o njimbilavo uvangi.” (Yoano 5:36, 37) Ocili okuti, Suku wa imba uvangi watiamẽla ku Yesu eci a papatisiwa.—Mateo 3:17.

Omanu vana va pisa Yesu ka va kuete esunga lioku u likala. Momo, Ovisonehua va enda oku konomuisa vi eca uvangi watiamẽla kokuaye. Yesu o malusula lolondaka viokuti: “Nda wa koleleli Mose, nda wa ndi kolelivo. Momo eye wa soneha eci catiamẽla kokuange. Pole, nda ka wa koleleli kovina eye a soneha, vu kolela ndati kueci mopia?”—Yoano 5:46, 47.