Han gin-akusaran hi Jesus han pipira nga Judio nga nagtatalapas hiya han Sabbath tungod han iya pagtambal, hiya binaton: “An akon Amay padayon nga nagbubuhat tubtob yana, ngan ako liwat padayon nga nagbubuhat.”—Juan 5:17.

An ginbubuhat ni Jesus diri pagtalapas ha balaud han Dios han Sabbath. An iya pagsangyaw ngan pagtambal pagsubad han mag-opay nga buhat han Dios. Salit hi Jesus nagbubuhat hin maopay kada adlaw. Pero an iya baton ha mga nag-aakusar ha iya mas nakapasina ha ira, ngan gin-ikaparatay nira hiya. Kay ano?

Labot la han sayop nga panhunahuna nga gintatalapas ni Jesus an Sabbath pinaagi han iya pagpanambal, nasina gud hira han iya ginsiring nga hiya Anak han Dios. Para ha ira, pagpasipara an pag-angkon nga an Dios iya Amay, ngan ha pagsiring nga hi Jehova iya Amay, ginhihimo niya an iya kalugaringon nga katupong han Dios. Pero waray mahadlok hi Jesus ngan padayon hiya nga nagsumat han iya espesyal nga relasyon ha Dios. Hiya nagsiring: “Pinalangga han Amay an Anak ngan ginpapakita ha iya an ngatanan nga Iya ginbubuhat.”—Juan 5:20.

An Amay an Naghahatag-hin-Kinabuhi, ngan iya ito iginpakita hadto pinaagi ha paghatag hin gahum ha mga tawo basi magbanhaw. Hi Jesus nagpadayon: “Ginbabanhaw han Amay an mga patay ngan gintatagan hira hin kinabuhi, salit gintatagan liwat han Anak hin kinabuhi adton karuyag niya tagan.” (Juan 5:21) Makalilipay gud ini ngan naghahatag hin paglaom para ha tidaraon! Bisan yana, an Anak nagbabanhaw ha espirituwal nga paagi. Salit hi Jesus nagsiring: “An namamati han akon pulong ngan natoo ha nagsugo ha akon magkakaada kinabuhi nga waray kataposan, ngan diri hiya huhukman kondi pariho hiya hin tawo nga namatay ngan buhi na yana.”—Juan 5:24.

Bisan waray pa rekord nga hi Jesus literal nga nagbanhaw, nagsiring hiya ha mga nag-aakusar ha iya nga mahitatabo ini. Hiya nagsiring: “Maabot an oras nga an ngatanan nga aadto ha handumanan nga mga lubnganan makakabati han iya tingog ngan mababanhaw.”—Juan 5:28, 29.

Waray kapariho an papel ni Jesus, pero iginpatin-aw niya nga nagpapasakop hiya ha Dios, ha pagsiring: “Diri ako nagbubuhat hin bisan ano nga akon la karuyag. . . . Akon ginbubuhat diri an akon kaburut-on kondi an kaburut-on han nagsugo ha akon.” (Juan 5:30) Iginhulagway ni Jesus an iya importante gud nga papel ha katuyoan han Dios, pero hito nga panahon diri ha dayag nga paagi. Kondi an mga nag-aakusar ha iya may nahibabaroan pa labot han mga ginsiring ni Jesus mahitungod hini. Iya hira ginpahinumdoman: “Nagsugo kamo hin mga tawo ngadto kan Juan [nga Parabaptis], ngan nagsumat hiya han kamatuoran.”—Juan 5:33.

Bangin hinbatian na ito han mga nag-aakusar ha iya mga duha ka tuig an naglabay. Ginsumatan ni Juan nga Parabaptis an Judio nga mga lider han relihiyon mahitungod han Usa nga makanhi sunod ha iya—nga tatawagon nga “An Propeta” ngan “an Kristo.” (Juan 1:20-25) Ginpahinumdoman ni Jesus an mga nag-aakusar ha iya han ira daku nga pagtahod hadto kan Juan nga ginpriso, ha pagsiring: “Ha halipot nga panahon nalipay gud kamo han iya lamrag.” (Juan 5:35) Pero mas damu an iya pamatuod kay ha kan Juan nga Parabaptis.

“Ini nga mga buruhaton nga akon ginbubuhat [pati na an pagtambal nga iya pa la ginhimo], nagpapamatuod nga an Amay an nagsugo ha akon.” Labot la hini, hiya nagpadayon: “An Amay mismo nga nagsugo ha akon nagpapamatuod mahitungod ha akon.” (Juan 5:36, 37) Pananglitan, an Dios nagpamatuod mahitungod kan Jesus durante han iya bawtismo.—Mateo 3:17.

Oo, an mga nag-aakusar kan Jesus waray rason nga isalikway hiya. An Kasuratan, nga siring nira ira gin-aadman, nagpapamatuod ha iya. Hiya nagtapos: “Kon natoo kamo kan Moises matoo liwat kamo ha akon, kay nagsurat hiya mahitungod ha akon. Pero kon diri kamo natoo ha iya mga sinurat, paonan-o kamo matoo ha akon mga pulong?”—Juan 5:46, 47.