Ora gudxi caadxi judíu Jesús maʼ bicheené ley stiʼ sábadu purtiʼ bisianda ti hombre dxi ca, gúdxibe laacaʼ: «Dede yanna cayuni Bixhozeʼ dxiiñaʼ, ne naa laaca cayuneʼ dxiiñaʼ» (Juan 5:17).

Cadi cucheené Jesús ley ni gudixhe Jehová para dxi sábadu. Purtiʼ cayuni predicar Jesús ne cusianda binni huará intiica si dxi ndaaniʼ semana, ne cayuni cosa galán cásica Bixhózebe. Nga runi, guiráʼ dxi cayuni Jesús cosa galán. Peru jmaruʼ si bidxiichi ca judíu pur ni gudxi Jesús laacaʼ, dede racaláʼdxicaʼ guuticaʼ laabe. ¿Xiñee cadxiichicabe yaʼ?

Primé la? purtiʼ zacaxácabe cuchee Jesús ra cadi cayuni respetar ley stiʼ sábadu, ne guiropa, purtiʼ guizáʼ cadxiichicabe guníʼ Jesús Xiiñiʼ Dios laa. Nácabe cayuni blasfemar Jesús ora caníʼ Dios nga Bixhoze, casi ñaca niníʼ Jesús biaʼca laa nga Dios. Peru qué nidxibi Jesús laacabe ne guníʼ tobi si laa né Dios. Gudxi Jesús laacabe: «Nadxii Dios Xiiñiʼ ne ruluiʼbe laa guiráʼ ni rúnibe» (Juan 5:20).

Dios nga rudii guendanabani, ne bisihuínnibe ni dxiqué ra bidiibe poder caadxi xpínnibe para bisibánicaʼ gueʼtuʼ. Nga runi, guníʼ Jesús: «Cásica rindisaʼ Dios gueʼtuʼ ne rudii guendanabani laacabe, zacaca rudii Xiiñibe guendanabani tu gacalaʼdxiʼ» (Juan 5:21). Ni guníʼ Jesús riʼ rudiini laanu ti esperanza sicarú, ni maʼ cadi candaa zaca cumplir. Nánnanu cusibani Xiiñiʼ Dios binni ni maʼ guti, o zanda guininu ca binni ni maʼ bixeleʼ de Dios. Nga runi, Jesús ná: «Tu gucaadiaga stiidxaʼ ne guni cré ni biseendaʼ naa napa guendanabani ni qué zaluxe ne qué zaca juzgar, sínuque maʼ biree de lu guendaguti ne maʼ biuu lu guendanabani» (Juan 5:24).

Para tiempu que, gastiʼ prueba ni gusihuinni maʼ bisibani Jesús tuuxa binni ni maʼ guti, peru gúdxibe ca judíu ni cugaaniʼ donda íquebe, dxandíʼ peʼ zabani ca binni ni maʼ guti sti biaje. Biʼniʼ prometer Jesús: «Zedandá dxi zunadiaga guiráʼ ca ni nuu ndaaniʼ baʼ voz stibe ne zareecaʼ» (Juan 5:28, 29).

Neca napa Jesús stale autoridad, peru nayaʼniʼ modo bisiénebe ca binni riʼ jma napa Dios poder que laabe, ne gúdxibe laacaʼ: «Qué zanda guneʼ gastiʼ de naa siaʼ. [...] Purtiʼ qué runeʼ ni racalaʼdxeʼ, sínuque runeʼ ni racalaʼdxiʼ ni biseendaʼ naa» (Juan 5:30). Ndiʼ nga primé biaje guzeeteʼ Jesús nezalú binni dxiiñaʼ risaca ni napa lu ni naguixhe ique Dios guni. Peru cadi testimonio si ni cudii Jesús nga nanna ca ni cugaaniʼ donda íquebe. Bisietenalaʼdxiʼ Jesús laacaʼ: «Laatu maʼ biseendatu mensajeru ra nuu Juan [Bautista], ne laa maʼ bidii testimonio de ni dxandíʼ» (Juan 5:33).

Nánnacabe raca biaʼ chupa iza gudxi Juan ca líder stiʼ ca religión stiʼ ca judíu, zeeda stobi jma risaca que laa, ni gúdxicabe «xa Profeta» ne «Cristu» (Juan 1:20-25). Nga runi, bisietenalaʼdxiʼ Jesús laacaʼ guyuu ti tiempu gunnaxhiicaʼ Juan, ni deguyoo, ora guníʼ: «Ti tiempu si guyuutu de acuerdu chuʼtu nayecheʼ lu biaaniʼ stibe» (Juan 5:35). Peru jma risaca testimonio cudii laacabe que ni bidii Juan Bautista.

Jesús guníʼ: «Rusihuinni ca dxiiñaʼ [...] ni runeʼ [tobi de laacani nga bisiándabe binni], Bixhozeʼ biseendaʼ naa». Ne laaca guníʼ: «Ne Dios ni biseendaʼ naa, laa peʼ nga maʼ bidii testimonio de naa» (Juan 5:36, 37). Nánnanu zacá ni pur ni guníʼ Dios de Jesús dxi guyuunisa (Mateo 3:17).

Dxandíʼ peʼ, qué gapa ca judíu riʼ razón para cadi guni crecaʼ Jesús, purtiʼ lu Stiidxaʼ Dios, ni nácabe ruundacabe, riete de Jesús. Últimu, gudxi Jesús laacabe: «Pa ñaca ñuni cretu Moisés, ñuni cretu naa, purtiʼ laa bicaa de naa. Peru pa qué runi cretu ni bicaabe, ¿ximodo guni cretu ni gabeʼ laatu yaʼ?» (Juan 5:46, 47).