Yesu na basambi bakwe balungeme ku kapinda ka kuso no kulola ku Galili. Cali ni muli ba April, kabili yali ni nshita ya kuseepa ingano. Apo abasambi bali ne nsala, batendeke ukutimpula imitwe ya ngano mu mabala balalya. Ubu bwali bushiku bwe Sabata kabili abaFarise balimwene uko abasambi ba kwa Yesu balelya ingano.

Ibukisheni ukuti tapakokwele ukutula apo abaYuda bamo mu Yerusalemu bafwaile ukwipaya Yesu ilyo bamubepeshe ukuti alitobele Isabata. Nomba abaFarise bamupeele umulandu pa fyo abasambi bakwe bacitile. Baebele Yesu abati: “Mona! Abasambi bobe balecita icishasuminishiwa ukucita pe Sabata.”—Mateo 12:2.

AbaFarise baleti ukutimpula ingano no kushifikina mu minwe no kulya cimo no kubomba umulimo wa kulobolola no kusokola. (Ukufuma 34:21) AbaFarise balengele ukusunga Isabata kwaba cisendo mu nshita ya kuti kulelenga abantu balesekelela no kutemwa Lesa pantu balelesha abantu ukucita ifintu fimo ifisuma pe Sabata. Yesu alandile pa fyacitike ku kale ifyapusene ne fyo abaFarise basumiine pa kuti abalange ukuti Yehova Lesa te wakeenye ukucita ifintu fimo ifyo balelesha abantu ukucita pe Sabata.

Cimo ico Yesu alandilepo, ni cilya Davidi na bantu bakwe bacitile. Ilyo bali ne nsala, baile ku cifulo ca kupepelamo no kulya imikate ya mituulo. Iyi imikate ni ilya bafumishe pa mikate ya kutuula kuli Yehova, kabili abalingile fye ukulya ni bashimapepo. Lelo, Davidi na bantu bakwe tabapeelwe umulandu pa fyo bacitile.—Ubwina Lebi 24:5-9; 1 Samwele 21:1-6.

 Cimbi ico Yesu alandile ca kuti: “Bushe tamwabelenga mu Mafunde ukuti pa Masabata bashimapepo mwi tempele tabamona Isabata nge lya mushilo kabili tababa na mulandu?” Yesu aloseshe mu kuti pe Sabata, bashimapepo baleipaya inama sha kutuula kabili balebomba ne milimo imbi pe tempele. Yesu abebele ati: “Awe ndemweba nati, uwacila itempele ali pano.”—Mateo 12:5, 6; Impendwa 28:9.

Yesu na kabili alandile pa Malembo pa kulondolola ici cishinka. Atile: “Amumfwikisha umwalola amashiwi ya kuti, ‘Mfwaya uluse, te lambo,’ nga te kuti mupingule ababula umulandu.” Pa kulekelesha atile: “Pantu Umwana wa muntu e Mwine we Sabata.” Yesu alelanda pa mutende uukaba pe sonde ilyo akaba Imfumu pa myaka ikana limo.—Mateo 12:7, 8; Hosea 6:6.

Abantunse balitekwa ubusha kuli Satana pa myaka iingi kabili alaleta imisoka ne nkondo ifilenga balecula. Lelo ilyo Kristu akalateka, tukengila mwi Sabata lyacindama umo tukatuusha ku fintu fyonse ifilenga tulecula!