Éyoñe ji, Yésus a beyé’é bé ba ke mfa’a ya nord ya Galilée. Bi nto ôyôn, a bidi ya mefup bi mbili mefes. Éyoñe be wô’ôya zaé, beyé’é ba bu’u bone minkpwel a di mie. Ve môs ôte ô ne môse Sabbat, a Bepharisien be lôô jame ba bo.

Te vuane na melu ya mvus, Bejuif béziñ be nga kômbô wôé Yésus e Jérusalem, be bôté nye ajô na a biasé môse Sabbat. Éyoñe ji, Bepharisien ba somane beyé’é e jame ba te bo. Ba jô na: “Tame yen, beyé’é bôé be abo jam de atyam atiñe ya Sabbat.”​—Matthieu 12:2, Mfefé Nkôñelan.

Bepharisien ba jô na e koé mefes a fiame me mo été na ba di a ne fe v’ane ba koé bidi a kôane bie. (Nkôlan 34:21) Mbia ñwô’ane wop ya jame ba nyoñ ane ésaé ja bo na, Sabbat a bo mbe’e, a to ke na atata’a, a mbe môse ya mevak a mveane ngule nyul mfa’a ya nsisim. Yésus a wosane mbia ôsimesane wop a zene ya bive’ela asu na a liti na, Yéhôva Zambe a nji yi na be belan atiñe dé ya Sabbat aval ete.

Éve’ela ôsu Yésus a ve é ne ji David a bôte bé. Éyoñ be nga wô’ô zaé, be nga tebe tabernacle a di belet ya mimvean. Belet éte, nyi be wô’ô zu ba vaa ôsu be Yéhôva a fole je a mfefé, é wô’ô bo asu bidi beprêtre. Ve da, amu nju’u be mbe be bili, David a bôte bé be nji nyoñe mekua amu be nga di je.​—Lévitique 24:5-9; 1 Samuel 21:1-6.

Éve’ela baa, Yésus a jô na: “Ye mi nji lañe kalate Metiñe na: E môse Sabbat nda Zambe été, betuni ba tyam étyi ya Sabbat, nalé te  lañebane be ane ékop?” A kômbô jô na ja’a môse Sabbat, beprêtre ba tyi’i betite ba ve metuna’a, ba bo fe bisaé bife temple été. Yésus a jô na: “Ve me ma kate mia na ndañe nda Zambe a ne va.”​—Matthieu 12:5, 6, Mfefé Nkôñelan; Nlañane Bôt 28:9.

Yésus a beta belane Mintilane na a yemete ôsimesane wé: “Nge mi too yeme atinane ya ajô di: Nkoone éngôngo ñwô ma yi sake étyi’a metuna’a, mi nji ye ve bôte ba mekua mbe be nji bo ékop été.” A mane bifia bié a jô’ô na: ‘Amu mona môt a ne njôô ya Sabbat.’ Yésus a kobô ajô Éjôé jé ja zu, éjôé ja ye bo mvo’é a tabe tañe toyini mimbu.​—Matthieu 12:7, 8, Mfefé Nkôñelan; Osée 6:6.

Satan a zuya a tibili môta binam den a nto betoyini mimbu a zene ya évô a bita. Beta nsela’ane a ye yené éyoñe ya beta Sabbat ya Éjôé Krist, nnye ate a ye ve bia nya awo’one bia bese bia yange!