Si Jesus kag ang iya mga disipulo nagkadto sa aminhan sa Galilea. Tigpamulak na, kag ang mga uma nagapang-uhay na. Bangod nagutom, nagpangutol sila sang uhay kag ginkaon ini. Pero Adlaw nga Inugpahuway kag nakita sang mga Fariseo ang ila ginahimo.

Sang nagligad, may pila ka Judiyo nga luyag magpatay kay Jesus sa Jerusalem kay ginsumbong nila sia nga naglapas sa Adlaw nga Inugpahuway. Gani ang mga Fariseo subong nagsumbong base sa ginahimo sang mga disipulo. “Ang imo mga disipulo nagahimo sang wala ginatugot sang kasuguan nga himuon sa Adlaw nga Inugpahuway.”—Mateo 12:2.

Nagsiling ang mga Fariseo nga ang pagpangutol sang uhay kag pagligis sini sa ila kamot para kan-on pag-ani na kag paglinas. (Exodo 34:21) Nangin mabug-at ang Adlaw nga Inugpahuway bangod sang ila estrikto nga interpretasyon kon ano ang obra, samtang ang orihinal nga katuyuan sini amo nga dapat makalilipay ini kag makapalig-on sa espirituwal. Gintadlong ni Jesus ang ila sayop nga pagtamod paagi sa pagpakita sang mga halimbawa nga indi katuyuan ni Jehova nga Dios nga amo sina ang pagpatuman sang Iya Adlaw nga Inugpahuway.

Ang isa ka halimbawa nga ginhatag ni Jesus amo si David kag ang iya mga tinawo. Sang gingutom sila, nagkadto sila sa tabernakulo kag nagkaon sang tinapay nga gindulot sa Dios. Ini nga mga tinapay, nga ginkuha na sa atubangan ni Jehova kag gin-islan sing bag-o, para lamang sa mga saserdote. Pero bangod sang mga sirkunstansia, wala ginpakamalaut si David kag ang iya mga tinawo sang ginkaon nila ini.—Levitico 24:5-9; 1 Samuel 21:1-6.

Sa ikaduha nga halimbawa, si Jesus nagsiling: “Wala bala ninyo mabasahi sa Kasuguan nga ang mga saserdote sa templo nagapangabudlay sa mga  Adlaw nga Inugpahuway, apang wala sila gihapon nakasala?” Ang buot niya silingon amo nga bisan Adlaw nga Inugpahuway, ang mga saserdote nagaihaw sang mga sapat nga ginahalad kag nagaobra sa templo. “Apang ginasiling ko sa inyo,” siling ni Jesus, “nga yari diri ang isa nga mas importante pa sangsa templo.”—Mateo 12:5, 6; Numeros 28:9.

Ginpatuhuyan liwat ni Jesus ang Kasulatan para ipadaku ang iya punto: “Kon nahangpan ninyo ang kahulugan sini, ‘Kaluoy ang luyag ko, indi halad,’ kuntani wala ninyo ginpakamalaut ang mga wala nakasala.” Sia naghinakop: “Kay ang Anak sang tawo Ginuo sang Adlaw nga Inugpahuway.” Ginapatuhuyan ni Jesus ang nagapakari nga mahidaiton nga paggahom sang Ginharian sa sulod sang isa ka libo ka tuig.—Mateo 12:7, 8; Oseas 6:6.

Madugay na nga nagaantos ang katawhan sa pag-ulipon ni Satanas, upod ang lapnag nga kasingki kag inaway. Baliskad gid ini sa paggahom sang Cristo sa daku nga Adlaw nga Inugpahuway, nga magaaman sang aton ginapaabot kag kinahanglanon nga pagpahuway!