Ĩtina wa kuma Yelusaleme, Yesũ na amanyĩw’a make nĩmaendie ngalĩko ya ĩũlũ melekele Kalilii. Ĩvindanĩ yĩu, mĩũnda yaĩ mĩvande na lĩu waĩ vakuvĩ kũkethwa. Na nũndũ amanyĩw’a maĩ na nzaa, nĩmatwie iia sya nganũ na mambĩĩa kũya. Mũthenya ũsu waĩ wa Savato, na Avalisi nĩmoonie ũndũ amanyĩw’a meekie.

Lilikana kana Ayuti amwe maĩ Yelusaleme mendaa kũmũaa Yesũ mayasya kana nũtũlĩte mwĩao wa Savato. Yĩla Avalisi moonie amanyĩw’a matw’a iia sya nganũ maye, nĩmambĩĩie kũneena naĩ ĩũlũ wa ũndũ ũsu. Maisye atĩĩ: “Sisya! Amanyĩw’a maku meĩka ũndũ ũtosanĩte na mĩao mũthenya wa Savato.”—Mathayo 12:2.

Avalisi maasya kana kũtw’a iia sya nganũ na kũikiitha na moko nĩ kana mũndũ aye no ũndũ ũmwe na kũtethya wĩa wa kũketha. (Kuma 34:21) Nzĩa yoo ĩtaĩle ya kũelesya wĩa ũla ũtaaĩle kũthũkũmwa o na vanini mũthenya wa Savato yatumaa andũ matatanĩa mũthenya ũsu, o na kau kĩeleelo kya mũthenya ũsu kyaĩ kũtana na kwĩyaka kĩ-veva. Yesũ nĩwaleanile na mawoni moo mataĩle yĩla watũmĩie ngelekany’o syoonanasya kana yĩla Yeova Ngai waumisye mwĩao wa Savato ndendaa mwĩao ũsu ũtũmĩwe ũndũ maũtũmĩaa.

Ngelekany’o ĩmwe Yesũ waumisye nĩ ya Ndaviti na aũme ala waĩ namo. Yĩla meewie nzaa, nĩmaendie ĩeemanĩ ya kũmbanĩa na maya mĩkate ĩla yaiawa mbee wa Ngai. Mĩkate ĩla Ndaviti na aũme make maĩe yaĩ ĩnavetangwa vala yaiawa mbee wa Yeova, na vandũ vayo vakaiwa ĩngĩ. Athembi nĩmo maaĩle kũya mĩkate ĩla yavetangwa mbee wa Yeova. Ĩndĩ nũndũ wa maũndũ ala mamũkwatĩte Ndaviti na aũme make,  mayaasilĩlwa nũndũ wa kũya mĩkate ĩsu.—Alivai 24:5-9; 1 Samueli 21:1-6.

Ngelekany’onĩ ya kelĩ, Yesũ amakũlilye atĩĩ: “No mwaasoma nthĩnĩ wa Mĩao kana athembi ala meethĩawa ĩkalũnĩ mĩthenya ya Savato nĩmavukasya Savato na mayatalĩlawa mavĩtyo?” Yesũ oonanasya kana o na mũthenyanĩ wa Savato, athembi nĩmathĩnzaa nyamũ nĩ kana maumye nthembo na nĩmatethasya mawĩa angĩ ĩkalũnĩ. Asyokie amea atĩĩ: “Ĩndĩ nĩmũtavya kana ũmwe mũnene kwĩ ĩkalũ e vaa.”—Mathayo 12:5, 6; Motalo 28:9.

Yesũ nĩwatũmĩie Maandĩko ĩngĩ kũmaelesya ĩũlũ wa ũndũ ũsu. Ameie: “Ta kethĩwa nĩmwamanyie ũndũ ndeto ii syonanasya, ‘Nĩenda tei, na ti nthembo,’ mũyĩsa kũmasilĩla ala mate na ĩvĩtyo.” Aminĩĩie na kwasya, “Nũndũ Mwana wa mũndũ nĩwe Mwĩaĩi wa Savato.” Yesũ aneeneaa ĩũlũ wa Ũsumbĩki wake wa myaka ngili ũla ũkaete mũuo mwingĩ.—Mathayo 12:7, 8; Osea 6:6.

Kwa ĩvinda yĩasa, andũ methĩĩtwe ũkombonĩ mũthũku mũno wa Satani, na nthĩ nĩyusũĩte ũng’endu na makaũ. Maũndũ makeethĩwa kĩvathũkany’o mũno nthĩnĩ wa Savato ĩla nene ya ũsumbĩki wa Klĩsto, vala andũ makakwata ũthyũmũo ũla methĩĩtwe mayenda kwa ĩvinda yĩasa!