Jesu na arutwo ake rĩu marorete mwena wa rũgongo magĩthiĩ Galili. Nĩ mweri wa Machi kana Ĩpuro na mĩgũnda ĩrĩ na ngano. Tondũ arutwo nĩ ahũtu, magatua igira cia ngano makarĩa. Nĩ mũthenya wa Thabatũ, na Afarisai nĩ marona ũrĩa mareka.

Ririkana atĩ hau kabere Ayahudi amwe thĩinĩ wa Jerusalemu meendaga kũũraga Jesu makiuga atĩ nĩ agararĩte Thabatũ. Rĩu Afarisai nao magathitanga arutwo a Jesu thutha wa kũmona magĩtua ngano. Makoiga: “Ta rora! Arutwo aku mareka ũndũ ũtarĩ mwĩtĩkĩrie nĩ Watho mũthenya wa Thabatũ.”​—Mathayo 12:2.

Afarisai maroiga atĩ gũtua ngano na kũmĩrigitha na moko nĩguo marĩe nĩ ũndũ ũmwe na kũgetha na kũhũũra. (Thama 34:21) Nĩ ũndũ wa gũkĩria njano harĩ gũtaarĩria wĩra nĩ kĩĩ, matũmaga Thabatũ ĩritũhĩre andũ, o na gũtuĩka mũthenya ũcio warĩ ũkorũo ũrĩ wa gĩkeno na wa gwakana kĩĩroho. Jesu akarũnga muonere ũcio wao mũũru akĩhũthĩra ngerekano cia kuonania atĩ Jehova Ngai ndaatanyĩte watho wake wĩgiĩ Thabatũ ũnyitwo na njĩra ĩyo.

Ngerekano ĩmwe ĩrĩa Jesu araheana ĩgiĩ Daudi na arũme arĩa aarĩ nao. Rĩrĩa maahũtiĩ, maathire thĩinĩ wa nyũmba ya Ngai na makĩrĩa mĩgate ya magongona. Mĩgate ĩyo, ĩrĩa yarĩkĩtie kweherio mbere ya Jehova na hakarehwo ĩngĩ mĩerũ, yarĩagwo nĩ athĩnjĩri-Ngai. Ĩndĩ, kũringana na ũrĩa maũndũ maahanaga, Daudi na arũme arĩa aarĩ nao matiatuĩrĩirũo nĩ ũndũ wa kũmĩrĩa.​—Maũndũ ma Alawii 24:​5-9; 1 Samueli 21:​1-6.

Ngerekano-inĩ ya kerĩ, Jesu akoria: “Kana mũtirĩ mwathoma thĩinĩ wa Watho, atĩ athĩnjĩri-Ngai  maathiaga na mbere kũruta wĩra mĩthenya ya Thabatũ hekarũ-inĩ na mationagwo marĩ na mehia?” Ũrĩa aroiga nĩ atĩ o na mũthenya wa Thabatũ, athĩnjĩri-Ngai no mathĩnjaga nyamũ iria irutagwo magongona na makaruta mawĩra mangĩ hekarũ-inĩ. Jesu akoiga: “No ngũmwĩra atĩrĩ, haha harĩ na kĩndũ kĩnene gũkĩra hekarũ.”​—Mathayo 12:​5, 6; Ndari 28:9.

Jesu akahũthĩra Maandĩko o rĩngĩ gũtaarĩria ũrĩa aroiga: “Korũo nĩ mũtaũkĩirũo ũũ nĩ kuuga atĩa, ‘Ngwenda muonanagie tha no ti mũndutagĩre magongona,’ mũtingĩatuĩra arĩa matarĩ na mehia.” Akarĩkĩrĩria na kuuga: “Nĩ gũkorũo Mũrũ wa mũndũ nĩ Mwathani wa Thabatũ.” Jesu araaria igũrũ rĩa Ũthamaki wake wa thayũ ũrĩa ũgooka wa mĩaka ngiri ĩmwe.​—Mathayo 12:​7, 8; Hosea 6:6.

Andũ nĩ manyamarĩkĩte ihinda inene rungu rwa ũkombo wa Shaitani, o hamwe na ũhinya na mbaara gũkorũo irĩ nyingĩ. Na githĩ gũtigaakorũo na ngũrani mũno rungu rwa Thabatũ ĩrĩa nene ya wathani wa Kristo, ũrĩa ũkaahe andũ ũhurũko o guo tũtũire twetereire na tũkaũbatara?