Owau Yesu ye alongoki andi mu nkangalu bena, ku node bekwendanga, kuna Ngalili. Eyayi i nsungi a masanza, e mbongo ikolele muna mpatu. Wau bamwene nzala, alongoki bazatwini ntu mia masa, badidi mo. Mu lumbu kia Vundu bena, Afarisi bamwene dina bavangidi.

Sungamena dio vo ke kolo ko, Ayuda ankaka muna Yerusaleme Yesu bazola vonda, bavova vo lumbu kia Vundu kakulwidi. Owau, a Afarisi bavaikisi mfundu akaka mu kuma kia dina bavangidi alongoki andi. Bavovele vo:“Tala, alongoki aku bavangidi edi ke diansongi ko omu lumbu kia Vundu.”—Matai 12:2.

Afarisi bavovele vo ovela masa yo vinza mo mu moko diau dimosi ye salu kia kutika e mbongo yo veva yo. (Luvaiku 34:21) E mambu makete-kete bayikidi vo salu, makitwidi e lumbu kia Vundu se kiampasi mu lunda. Kansi e lumbu kiaki kiasikidiswa ye kani diayangidika yo kasakesa o nkangu muna mwanda. Yesu muna kubasonga vo e ngindu zau zatekomoka, osadidi e nona isonganga vo e mpila belundilanga o nsiku a lumbu kia Vundu, ke ina ngwizani ko ye kani kasikidisila kio o Yave.

E nona kiantete kasadidi Yesu i dina diabwila Davidi ye wantu kakala yau. Vava bafwa e nzala, bakota muna saba yo dia e mbolo zavauka. E mbolo zozo vava zakatulwanga vana ndose a Yave, zalundwanga mu kuma kia anganga kimana badia zo. I bosi, bavingisanga vo mbolo zankaka. Muna kuma kiaki, Davidi ye wantu andi ke batumbwa ko vava badia e mbolo zazi.—Fuka 24:5-9; 1 Samuele 21:1-6.

Muna nona kiazole, Yesu ovovele vo: “Nga ke nwatanga wo ko muna Nsiku vo muna lumbu kia Vundu anganga muna tempelo sala besalanga, yau ke banati nkanu e?” E salu kayikidi o Yesu besalanga anganga muna tempelo muna lumbu kia Vundu, i kela yimenga ye salu yankaka mpe. Kansi Yesu ovovele vo, “oyu osundidi e tempelo una vava.”—Matai 12:5, 6; Ntalu 28:9. 

I bosi, Yesu oyikidi diaka e Sono muna kubasonga vo ke bena ye ndungidi ko. Ovovele vo: “Kele vo nwazaya e nsas’a diambu edi: ‘Nkenda nzolele ke yimenga ko,’ ke nwadi tumba minkondwa kuma ko.” Muna fokola e moko, ovovele diaka vo: “Kadi o Mwan’a muntu i Mfumu a lumbu kia Vundu.” Yesu oyikidi Kintinu kia funda dia mvu eki kitwasa luvuvamu ova nza.—Matai 12:7, 8; Osea 6:6.

Tuka kolo, wantu bebundunwanga kwa Satana, bemonga mpasi mu kuma kia nsoki ye vita. Kansi, nswaswani ampwena yikala muna Kintinu kia funda dia mvu. Kadi Kintinu kiaki kitwasa e lumbu kianene kia Vundu kina tulakukilang’o moyo.