Yesu kod jopuonjrene koro dhi malo nyadwat ka gichomo Galili. Sani en dwe mar Mach kata April, kendo cham koro omoyo e wi tiang’. Nikech jopuonjre odenyo, gijako moko kuom wiye cham kendo gichako chamogi. Kata kamano, chieng’no en Sabato, kendo Jo-Farisai oneno gima gitimono.

Inyalo paro kaka moko kuom Jo-Yahudi man Jerusalem ne dwaro nego Yesu ka gidonjone ni oketho chik Sabato. Koro Jo-Farisai donjo ne jopuonjre Yesu nikech gimoro ma gitimo. Giwacho ne Yesu kama: “Ero ne! Jopuonjreni timo gima ok owinjore gi chik chieng’ Sabato.”​—Mathayo 12:2.

Jo-Farisai wacho ni jako cham kendo dunyogi gi lwedo chalo gi tij keyo kod dino. (Wuok 34:21) Yo ma Jo-Farisai lerogo tije ma ji ok owinjore otim chieng’ Sabato, miyo rito Sabato bedo kaka ting’ mapek. Kata kamano, Sabato ne oket mondo obed kinde mag mor, ma ji jiworee gi puonj mag Nyasaye. Yesu rieyo paro ma ok kare ma gin-go kotiyo gi ranyisi ma nyiso ni Jehova Nyasaye ne ok dwar ni ji oti gi chik mar Sabato e yo ma kamano.

Ranyisi achiel ma Yesu chiwo en mar Daudi gi joge. Kane gidenyo, ne gidonjo e od Nyasaye mi gichamo makate michiwo e nyim Nyasaye. Makatego ne osegol kama ichiwogie e nyim Jehova Nyasaye mi owilgi gi manyien. Kendo pile jodolo e ma ne onego ochamgi. Kata obedo ni Daudi gi joge ne ochamo makatego nikech ne gidenyo, ne ok okwedgi kuom timo kamano.​—Tim Jo-Lawi 24:5-9; 1 Samuel 21:1-6.

Yesu tiyo gi ranyisi mar ariyo kowachonegi kama: “Pok usomo e Chik ni e odiechienge  Sabato jodolo mag hekalu ketho Sabato, to gisiko ma onge ketho?” Tiend gima owacho en ni jodolo yang’oga le mag misango kendo gitimoga tije mamoko mag hekalu, kata mana chieng’ Sabato. Yesu wachonegi niya: “An to awachonu ni, nitie gima duong’ kae moloyo hekalu.”​—Mathayo 12:5, 6; Kwan 28:9.

Yesu kendo tiyo gi ndiko manie Wach Nyasaye mondo osirgo gima owachono. Onyisogi kama: “Ka dine bed ni ung’eyo tiend wach ma wacho ni, ‘Ok adwar misango, to adwaro ni ubed joma kecho jomamoko,’ dine ok uketo ketho kuom joma onge ketho.” Otieko kowachonegi niya: “Wuod dhano e Ruodh Sabato.” Yesu wuoyo e wi lochne mar Pinyruoth mar higni aluf achiel ma biro kelo kuwe.​—Mathayo 12:7, 8; Hosea 6:6.

Satan osebedo ka sando oganda dhano kuom kinde mogwaro kotiyo gi timbe mag gero kod lwenje ma medore ahinya. Mano kaka pogruok maduong’ biro betie e kinde Sabato ma nigi duong’ moloyo! Kindego, Kristo biro kelo ne dhano kinde mar yueyo ma gisedwaro kendo giserito gi siso ahinya e bwo lochne!