Jisas na ol disaipel bilong em i wokabaut i go long hap not bilong Galili. Long dispela taim, em mun Mas o Epril samting na ol wit i redi pinis long gaden. Ol disaipel i hangre, olsem na taim ol i wokabaut namel long ol gaden wit, ol i kisim sampela wit na kaikai. Tasol em de Sabat, na ol Farisi i lukim samting ol disaipel i mekim.

I no longtaim i go pinis, sampela Juda long Jerusalem i laik kilim Jisas i dai, long wanem, ol i tok em i brukim lo bilong de Sabat. Nau ol Farisi i lukim samting ol disaipel i mekim na ol i sutim tok long Jisas. Ol i tok: “Lukim! Ol disaipel bilong yu i mekim samting i tambu long mekim long de Sabat.”—Matyu 12:2.

Ol Farisi i tok pasin bilong kisim pikinini wit na rapim long han bilong kaikai, dispela i olsem ol i bungim wit long gaden na klinim. (Kisim Bek 34:21) Ol i putim lo bilong ol yet bilong makim wanem kain wok i tambu long mekim long de Sabat, na dispela i putim hevi long ol man. Tasol Jehova i laik bai Sabat em i de bilong amamas na bilong strongim bilip bilong narapela narapela. Olsem na Jisas i kamapim sampela stori bilong Baibel bilong helpim ol long kliagut olsem, taim Jehova i kamapim lo bilong Sabat em i no tingting long putim strongpela lo i givim hevi long ol man.

Namba 1 eksampel Jisas i tok long en, em Devit na ol lain bilong em. Taim ol i hangre, ol i go insait long tempel na ol i kisim bret tambu na ol i kaikai. Ol pris i rausim pinis ol dispela olpela bret long tebol long ai bilong Jehova na ol i putim nupela bret. Ol dispela olpela bret em bilong ol pris tasol long kaikai. Tasol long dispela taim, God i no  kros long Devit na lain bilong em taim ol i kaikai dispela bret.—Wok Pris 24:5-9; 1 Samuel 21:1-6.

Namba 2 eksampel, Jisas i tok: “Ating yupela i no bin ritim tok bilong Lo olsem long olgeta Sabat ol pris long tempel i mekim olsem Sabat i no holi, tasol ol i no gat asua?” Insait bilong tok bilong Jisas i olsem, long de Sabat ol pris i save kilim ol animal bilong mekim ofa, na tu, ol i mekim ol narapela wok long tempel. Jisas i tok moa olsem: “Mi tokim yupela, wanpela man i winim tempel em i stap long hia.”—Matyu 12:5, 6; Namba 28:9.

Jisas i kolim gen tok bilong Baibel bilong strongim tok bilong em. Em i tok: “Sapos yupela i bin kliagut long mining bilong dispela tok, ‘Mi no laikim sakrifais, mi laikim pasin marimari,’ orait yupela bai i no kotim ol dispela man i no gat asua. Long wanem, Pikinini bilong man em i Bikpela bilong de Sabat.” Jisas i toktok long taim bai kamap bihain we em bai stap King long Kingdom inap 1,000 yia, na bel isi bai stap long graun olgeta.—Matyu 12:7, 8; Hosea 6:6.

Inap longpela taim nau, ol man i stap kalabus aninit long wok bos bilong Satan, olsem na ol woa na pasin bilong pait na bagarapim man i stap long olgeta hap. Tasol taim Krais i bosim graun long dispela bikpela de Sabat bilong 1,000 yia, bai i gat malolo. Yumi laik tru long lukim dispela taim i kamap!