Iti sabali pay a Sabbath, napan ni Jesus iti maysa a sinagoga, a mabalin nga idiay Galilea. Adda nakitana sadiay a maysa a lalaki a paralisado ti imana. (Lucas 6:6) Sipsiputan dagiti eskriba ken Fariseo ni Jesus. Apay? Impalgakda ti pudno a motiboda idi dinamagda: “Maiparbeng kadi ti mangpaimbag iti Sabbath?”—Mateo 12:10.

Patien dagiti Judio a lider ti relihion a maiparbeng laeng ti mangpaimbag iti aldaw ti Sabbath no agpeggad ti biag ti maysa. Gapuna, no kas pagarigan ta nailigasi wenno nablo ti maysa, saan a maiparbeng nga isimpa wenno patapatan ta saan a pakatayan dayta. Kinuestionaran dagiti eskriba ken Fariseo ni Jesus, saan a gapu ta maseknanda iti panagrigat ti lalaki, no di ket agbirbirokda laeng iti kamali a pangakusaranda kenkuana.

Ngem ammo ni Jesus ti tiritir a panagpampanunotda. Ammona nga addaanda iti aglablabes, saan a nainkasuratan a panangmatmat no ania ti ramanen ti panangsalungasing iti linteg ti Sabbath mainaig iti panagtrabaho. (Exodo 20:8-10) Binabalawda idin gapu kadagiti naimbag nga inaramidna. Gapuna, nakasaganan ni Jesus a mangsango iti daytoy a problema babaen ti panangibagana iti lalaki a paralisado ti imana: “Tumakderka ket umayka ditoy tengnga.”—Marcos 3:3.

Kinuna ni Jesus kadagiti eskriba ken Fariseo: “No matnag ti karneroyo iti abut iti aldaw ti Sabbath, saanyo kadi nga aonen?” (Mateo 12:11) Ti maysa a karnero ket maysa a puonan, isu a saanda a baybay-an dayta iti abut agingga iti sumaruno nga aldaw ta mabalin a matay ket mapukawanda. Kasta met, kuna ti Kasuratan: “Daydiay nalinteg ipategna ti kararua ti naamo nga animalna.”—Proverbio 12:10.

Nainkalintegan dayta a panangidilig ni Jesus, isu a kinunana: “Saan kadi a napatpateg ti tao ngem ti karnero? Maipalubos ngarud ti agaramid iti nasayaat iti Sabbath.” (Mateo 12:12) Gapuna, saan a linabsing ni Jesus ti Sabbath idi pinaimbagna ti lalaki. Saan a makontra dagiti lider ti relihion dayta a nainkalintegan ken naasi a panagrason isu a nagulimekda lattan.

Makaunget ken agladingit pay ni Jesus iti di umiso a panagpampanunotda, ket kinitana dagiti adda iti aglawlawna. Kalpasanna, kinunana iti lalaki: “Unnatem ta imam.” (Mateo 12:13) Inunnat ti lalaki ti paralisado nga imana ket immimbag. Naragsakan ti lalaki iti dayta, ngem ania ti epektona kadagiti agbirbirok iti pagkamalian ni Jesus?

Imbes a maragsakanda ta immimbagen ti ima ti lalaki, rimmuar dagiti Fariseo ket dagus a nakikumplotda iti “partido ni Herodes tapno pagsasaritaanda ti panangpapatayda ken Jesus.” (Marcos 3:6) Mabalin a karaman iti daytoy a partido ti politika dagiti miembro ti relihioso a grupo a maawagan Saduceo. Gagangay nga agkontra dagiti Saduceo ken Fariseo, ngem ita agkaykaysadan a mangbusor ken Jesus.