Musabudu rimweni, Jesu wakaenda ku sinagoga, kangaije ku Garireya. Kondhono anovona mundhu wainga no nyara jakakhokhodara. (Luka 6:6) Vatari no vaFarisi vakanasa kusota Jesu. Ngenyi? Thangwe rakona rinobuda pambhene pavanobvunjisa kuti: “Bzinotendehwa, kani, kurapa mu njiku yo sabudu?”—Mateu 12:10.

Vatungamiriri vo zviara zvo ciJudha, vanodavira kuti zvinotendehwa kurapa mundhu anohwaja ngo Musabudu, basi kudari upenyu hwake huri pa ngozi. Inga muezaniso, ngo Musabudu azvitendehwi kutova fupa ranyea kana kubhandica pa khuvazika, ngo kuti upenyu hwo mundhu ahuripi pa ngozi. Vatari no vaFarisi avaripi kushora Jesu ngo ndava yo kurapa kwake mwanarume ari kutambujika. Ivona vari kupsaka ndhango yo kumutonga ndiona.

Asi Jesu anozvivona kuti vano murangariro wakashata. Anoziva kuti vakaomesa mutemo ucizivi kucijikira mu Bhaibheri ngo pamusoro po revo yo kuphwanya mutemo wo kushanda ngo Musabudu. (Exodo 20:8-10) Jesu wakamboshohwazve maningi ngo pamusoro po mabasa akanaka aaiita ngo Musabudu. Wari Jesu woda kuvatatija kuti mavonero avo akapeyama. Wobvunja mundhu ano nyara yakakokodara kuti: “Mukai. Viai ngo pakati [po sinagoga].”—Marco 3:3.

Jesu wosika kusota vatari no vaFarisi, zve wovabvunja kuti: “Ndiani, pakati penyu, kudari ano bvuta rawa mu mwimbo njiku yo sabudu, anotama kurinyura woribudisa kunja?” (Mateu 12:11) Bvuta i pfuma, ngo kudaro ivona avacaizorisiepi riri mu mwimbo mbhera mu Dimingu. Ngo kuti raizofa, zve voruza mare. Kunja kwa izvi Bhaibheri rinonanga kuti: “Mururami anotaja bzifuyo bzake.”—Mazwi Akangwara 12:10.

Ecitatija kuezana kwazvo no shwiro yavari kubhuyaro, Jesu anoti: “Waro, mundhu ano mutengo kupinda bvuta! Ngo ndava yabzo, bzinotendehwavo kuita bzakanaka mu njiku yo sabudu.” (Mateu 12:12) Ngo kudaro Jesu aacaiphwanyepi mutemo wo Sabudu ngo kurapa mundhu. Vatungamiriri vo zviara avana manera o kuphikiza murangariro wakajeka wa Jesu, ngo kudaro vanomukira kunyarara.

Naanyangajiswa, pomwe no kusuruvara ngo marangaririre avo akashata, Jesu anosota-sota vandhu vanonga varipo. Perepo woti kumwanarume wiya: “Tambarajai nyara yako.” (Mateu 12:13) Paanonga ecitambanuja nyara inonga yakakhokhodara, yatotamba. Mwanarume wodakara maningi, asi vari kupsakaya kusunga Jesu vanozwa kudini?

Kunja ko kudakara ngo kuti nyara yake yatamba, vaFarisi vanobuda vozwirana “no vandhu va Herodi kuti vamuuraye.” (Marco 3:6) Vandhu va Herodhi ava zvingaita kuti vainga vatungamiriri vo zviara vaidaninjwa kuti va Sadhuki. Kazinji vaSadhuki no vaFarisi avacaizwiranepi, asi wari apa vainga vakabatana maningi kuti vahwisane na Jesu.