Jesusqa ichapis Galileapiña kashaspa, Samarikuna Pʼunchaypi uj sinagogaman yaykorqa. Chaypitaj uj runa kasharqa paña makin chʼakisqa (Lucas 6:6). Fariseoswan leymanta yachachejkunawantaj, Jesusta pantachiyta munaspa ñawillankupi purichisharqanku. Chayrayku Jesusta taporqanku: “¿Samarikuna Pʼunchaypi sanoyachiyta atikunchu?”, nispa (Mateo 12:10).

Paykunaqa mana onqosqa runamanta llakikuspachu chayta taporqanku, manachayqa Jesusta imallamantapis juchachayta munaspa. Fariseoswan leymanta yachachejkunawanqa, tullu pʼakisqasta, chaki qʼewisqasta chayri maki qʼewisqasta Samarikuna Pʼunchaypi jampiykuyta juchapaj qhawaj kanku. Paykunaqa nej kanku: “Uj runa wañuy patapi kashajtillan, Samarikuna Pʼunchaypi yanapana tiyan”, nispa.

Chay runasqa Samarikuna Pʼunchaypi casi tukuy ima ruwanata juchapaj qhawaj kanku. Chaytaj mana Diospa Palabranman jinachu karqa. Jesustaj repararqa pantasqata yuyasqankuta (Éxodo 20:8-10). Chantapis mana chay kutillachu Jesusta juchacharqanku allin kajta ruwasqanmanta. Chayrayku Jesusqa imachus sonqonkupi kasqanta yachaspa, makin chʼakisqa runata nerqa: “Sayarispa kay chaupiman jamuy”, nispa (Marcos 3:3).

Chantá leymanta yachachejkunata, fariseostawan qhawarispa nerqa: “Pillapis qankunamanta uj ovejayojlla kaspa, Samarikuna Pʼunchaypi chay ovejan tʼoqoman urmaykojtin, ¿manachu orqhokapunman?”, nispa (Mateo 12:11). Chay runaspajqa, ovejaqa qolqe kaj. Chayrayku paykunaqa mana ovejankuta tʼoqopi qʼayantinkama saqerparinkumanchu karqa. Imajtinchus ovejanku wañunman, ashkha qolqetataj pierdenkuman karqa. Chantapis Diospa Palabranqa, uywasninkuta allinta qhawanankuta kamachej (Proverbios 12:10).

Chantá Jesusqa paykunata entiendechinanpaj nerqa: “¿Manachu runaqa aswan valorniyoj ovejamanta nisqaqa? Chayrayku Samarikuna Pʼunchaypi allin kajta ruwayqa atikullan”, nispa (Mateo 12:12). Arí, Samarikuna Pʼunchaypi uj runata sanoyacheyqa mana juchachu karqa. Jesusqa chay onqosqa runamanta khuyakorqa, imatachus sinagogapi kajkunaman nisqantaj sutʼi karqa. Chayrayku fariseoswan leymanta yachachejkunawanqa, niña imatawanpis niyta aterqankuchu, chʼinllañataj karqanku.

Chaymanta Jesusqa sinagogapi kajkunata phiñasqa qhawarerqa, rumi sonqos kasqankumantataj llakikorqa. Chantá makin chʼakisqa runata nerqa: “Makiykita aysariy”, nispa (Mateo 12:13). Chay runataj makinta aysarerqa, sanoyaporqataj. Payqa sanoyakusqanmanta maytapuni kusikorqa.

Jesusta pantachiyta munajkunarí mana kusikorqankuchu. Astawanpis paykunaqa sinagogamanta llojsiytawan, Herodespa partidonmanta kajkunawan tantakamorqanku.  “Paykunaqa yachachinakorqanku Jesusta wañuchinankupaj” (Marcos 3:6). Herodespa partidonmanta wakenqa, saduceospa religionninkumanta karqanku. Saduceoswan fariseoswantaj chejninakoj kanku. Jinapis Jesusta wañuchinankupajqa, uj yuyaylla karqanku.