Long narapela de Sabat Jisas i go long sinagog, ating dispela sinagog i stap klostu long Galili. Na em i bungim wanpela man em han sut bilong em i nogut. (Luk 6:6) Ol saveman bilong Lo na ol Farisi i putim ai long Jisas. Bilong wanem ol i mekim olsem? Ol i laik save Jisas bai oraitim dispela man long de Sabat, o nogat. Olsem na ol i askim Jisas: “I stret long oraitim man long de Sabat o nogat?”—Matyu 12:10.

Ol hetman bilong lotu Juda i ting i orait long helpim sikman long de Sabat, sapos hevi i painim em. Olsem, long de Sabat i tambu long stretim bun i bruk o pasim banis long skru i lus, em ol hevi we man i no inap i dai long en. I klia tru olsem taim ol saveman bilong Lo na ol Farisi i askim Jisas long dispela man, i no olsem ol i laik helpim man em han bilong en i nogut, nogat. Ol i painim risen long kilim Jisas i dai.

Tasol Jisas i save pinis long tingting kranki bilong ol. Em i luksave olsem ol i strong long bihainim ol lo bilong ol yet, na ol i no bihainim tok bilong Baibel long wanem kain wok i tambu long mekim long de Sabat. (Kisim Bek 20:8-10) Long bipo, Jisas i bungim kain hevi olsem we ol man i sutim tok long ol gutpela wok em i mekim. Nau em i laik stretim tingting kranki bilong ol saveman bilong Lo na ol Farisi, olsem na em i tokim man i gat han nogut olsem: “Sanap na kam long namel.”—Mak 3:3.

Nau Jisas i tokim ol saveman bilong Lo na ol Farisi: “Sapos wanpela man namel long yupela i gat wanpela sipsip, na dispela sipsip i pundaun i go insait long wanpela hul long de Sabat, orait dispela man bai i holim sipsip bilong en na pulim i kam ausait, a?” (Matyu 12:11) Ol i save olsem ol sipsip em animal we ol man inap kisim mani long en, olsem na ol i no inap larim sipsip i stap long hul i go inap long narapela de, nogut em i dai na ol i no inap salim bilong kisim mani. Na tu, Baibel i tok: “Ol stretpela man i save marimari long ol animal bilong ol, na lukautim ol gut.”—Sindaun 12:10.

Bihain long Jisas i mekim tok piksa bilong sipsip, em i tok moa: “Tasol ol man i winim tru ol sipsip! Olsem na i stret long mekim gutpela samting long de Sabat.” (Matyu 12:12) I klia tru olsem Jisas i no brukim lo bilong Sabat taim em i oraitim dispela sikman. Ol hetman bilong lotu i save olsem tok bilong Jisas i stret, long wanem, em i kamapim gutpela tingting na pasin sori. Olsem na ol i no inap bekim wanpela tok.

Jisas i luksave olsem ol dispela man i gat tingting kranki, na em i bel hevi long pasin ol i mekim. Em i lukluk long ol, na em i tokim dispela man: “Putim han bilong yu i kam.” (Matyu 12:13) Orait dispela man i stretim han na han bilong em i kamap gutpela gen. Dispela man i amamas tru, tasol olsem wanem long ol hetman bilong Juda husat i traim long trikim Jisas?

Ol Farisi i no amamas long dispela samting. Olsem na kwiktaim ol i go bung “wantaim ol lain i bihainim Herot. Ol i laik painim rot bilong kilim Jisas i dai.” (Mak 3:6) Ol Sadyusi em wanpela lain bilong lotu Juda, na ol tu i insait long lain politik bilong Herot. Ol Sadyusi na ol Farisi i save birua long narapela narapela, tasol nau ol i bung wantaim bilong birua long Jisas.